Mako 10

Eby'okushenda abakazi

1 # Mat 19:1-9. Bwanyima Yesu yaimuka yaarugayo, yaaza omu ishaza rya Buyudaaya na seeri ya yorudani; emitwe minti y'abantu yaagaruka yaateeranira ahu yaabaire ari; yaayeyongyera kubeegyesa nk'omucwe gwe oku gwabaire guri. 2Kandi Abafarisaayo baija ah'ari, baamubuuza nibamutega bati: Beitu Ebiragiro biikiriza omuntu kushenda omukazi we? 3Yaabagarukamu ati: Musa akabaragiira ata? 4#Bir 24:1. Baagarukamu bati: Musa akaikiriza omuntu kuhandiika ebaruha y'okutaana n'omukazi we, ngu abone kumushenda. 5Yesu yaabagira ati: Eki yaabahereire ekiragiro ekyo n'ahabw'obugangaazi bw'omu mitima yaanyu; 6kwonka okuruga aha kuhangwa kw'ensi, Ruhanga akahanga omushaija n'omukazi. 7#Kut 2:24. Omushaija nikyo atsigiraho ishe na nyina, akaguma n'omukazi we, 8n'abo bombi bakahinduka omuntu omwe; baba batakiri babiri kureka omwe. 9N'ahabw'ekyo eki Ruhanga yaateeraine hamwe, omuntu atarikitaanisa.

10Ku baabaire bari omu nju, abeegi be baagaruka baamubuuza aha kigambo ekyo. 11#Luk 16:18. Yaabashobororera ati: Omuntu weena orishenda omukazi we, akashwera ondiijo, biri ashambaine, kandi aitsire obushwere aha mukazi we; 12n'omukazi ku aritaana na iba, yaashwerwa ondi, biri ashambaine.

Yesu okuha abaana omugisha

13 # Luk 18:15-17; Mat 19:13-15. Kandi bakamureetera abaana bato ngu abakoreho; abeegi be baagambira kubi abaabareeta. 14Kwonka Yesu ku yaakireebire, yaabagwerwa kubi, yaabagira ati: Murekye abaana bato baije ahariinye, mutabazibira; ahabw'okuba obukama bwa Ruhanga n'obw'abari nk'abo. 15#Mat 18:3. Buzimazima nimbagambira nti: Omuntu weena otaikiriza bukama bwa Ruhanga nk'omwana muto, taributaahamu na kakye. 16yaabakiikira, yaabaha omugisha, abataireho engaro.

Eby'omutsigazi omutungi

17 # Luk 18:18-30; Mat 19:16-30. Ku yaabaire naagyenda omu muhanda, omushaija yaija nairukanga, yaamutsimbira amaju, yaamubuuza ati: Iwe Mwegyesa murungi 'we, nkaakora ki okuhungura amagara agatahwaho? 18Yesu yaamugarukamu ati: Noonyetera ki omurungi? Tihariho murungi, kureka Ruhanga wenka. 19Noomanya ebiragiro, Otariita, Otarishambana, Otariiba, Otaribeiherera ondiijo, Otarigobya, Otiine sho na nyoko. 20Omushaija yaamugarukamu ati: Mwegyesa, ebyo byona nkabyerinda okuruga omu buto bwangye. 21#Mat 10:38. Yesu ku yaamureebire, yaamukunda, yaamugira ati: Mbwenu nooburwaho kimwe; irooko ogyende, otunde byona ebi otungire; ebi oraihemu, obihe abooro; nibwo oritunga eitungo omu iguru; haza oije onkuratire. 22Ku yaahuriire ebyo, yaahinduriza ahamaisho, yaagyenda aine enaku nying, ahabw'okuba akaba aine eitungo ringi.

23Yesu nikwo kubabuzyamu amaisho, akagira abeegi be ati: Ka nikiremeera abatungi okutaaha omu bukama bwa Ruhanga! 24#Zab 62:10; 1 Tim 6:17. Abeegi be baatangaarira ebigambo bye. Kwonak Yesu yaabashobororera ati: Baana 'mwe, nikiremeera abeesiga obutungi okutaaha omu bukama bwa Ruhanga. 25Nikirahuka engamira okuraba omu nyindo y'empitirizo, okukira omuntungi okutaaha omu bukama bwa Ruhanga. 26Baatangaara munonga, baamubuuza bati: Mbwenu shi hoona, n'oha orikubaasa kujunwa? 27#Kut 18:14. Yesu yaabareeba, yaabagarukamu ati: Ekyo tikirikubaasika ha bantu, kwonka ahari Ruhanga byona nibibaasika. 28Petero nikwo kumugambira ati: Reeba itwe tukatsigaho byona, twakukuratira! 29Yesu yaamugarukamu ati: Buzimazima nimbagambira nti: Tihaine muntu owaatsigireho enju, beene ishe, banyaanya, nyina, ishe, abaana, nari ekibanja kye ahabwangye n'ahabw'engiri, 30otariheebwa omu biro bya hati ebirikukira ebyo emirungi igana, enju, beene ishe, banyaanya, baanyina, abaana, ebibanja, hamwe n'okuhiigwa, kandi omu biro bya bwanyima akaheebwa amagara agatahwaho. 31Kwonka baingi ab'okubanza baryaba aba bwanyima, n'aba bwanyima baryaba ab'okubanza.

Yesu okumanyisa eby'okufa kwe

32 # Luk 18:31-34; Mat 20:17-19. Obwo bakaba bari omu muhanda nibainamuka Yerusaalemu, kandi Yesu akaba abeebembeire; bo baatangaara, na'baabaire bamukuratiire baatiina. Yaagaruka yaayekiikana bari ikumi na babiri, yaatandika kubagambira ebirikwija kumubaho;#Yoh 11:16. 33ati: Reeba, nitwinamuka Yerusaalemu; Omwana w'omuntu aryaheebwayo aha banyamaurwa abakuru n'abahandiiki; baryamucwera orubanja rw'okumwita, bamuheyo aha Banyamahanga; 34baryamushungisa, bamucwere amacwante; baryamwasha, baryamwita; kandi aryazooka bwanyima y'ebiro bishatu.

Obukuru omu bukama bwa Ruhanga

35 # Mat 20:20-28. Kandi Yakobo na Yohaana, beene Zebedaayo, baamwirira haihi, baamushaba bati: Mwegyesa, nitwenda otukorere eki turaakushabe kyona. 36Yaabagarukamu ati: Nimwenda ngu mbakorere ki? 37Baamugarukamu bati: Twikirize omwe ashutame aha rubaju rwawe rwa buryo, n'ondi aha rwa bumohso omu kitiinisa kyawe. 38#Luk 12:50; Rom 6:3. Yesu yaabagarukamu ati: Timurikumanya ki murikushaba. Nimubaasa kunywa aha kikopo eki ndikunywaho, nari okubatizibwa okubatizibwa oku ndikubatizibwamu? 39#Byak 12:2. Baamugarukamu bati: Eego, nitubaasa. Yesu yaabagarukamu ati: Ekikopo eki ndikunywaho naimwe muryakinywaho; n'okubatizibwa oku ndikubatizibwamu, muryakubatizibwamu. 40Kwonka okushutama aha rubaju rwangye rwa buryo nari shi aha rwa bumohso, tiinye nkuha; kureka n'okwabo abaakucumiirwe. 41Kandi eikumi ku baakihuriire, baatandika kugwerwa kubi Yakobo na Yohaana. 42#Luk 22:25-27. Yesu nikwo kubeeta, akabagira ati: Nimumanya ngu abo abeetwa abategyeki b'abanyamahanga babategyekyesa eikama, n'abakuru baabo babaragiiza obushoboorozi. 43Kwonka omuriimwe tikwo kiriba; weena oryenda kuba omukuru omuriimwe, ashemereire kuba omuheereza waanyu; 44n'oryenda kuba ow'okubanza omuriimwe, ashemereire kuba omuhuuku wa boona. 45Ahabw'okuba omu mazima Omwana w'omuntu taraizire kuheerezibwa, kureka okuheereza abandi, n'okuhayo amagara ge okucungura baingi.

Yesu okuhumuura Batimaayo

46 # Luk 18:35-43; Mat 20:29-34. Kandi bakataaha Yeriko; ku yaabaire naaruga Yeriko n'abeegi be n'omutwe gw'abantu baingi, omusheegi Batimaayo, mwene Timaayo, empumi akaba ashutami aha rubaju rw'omuhanda. 47Ku yaahuriire ngu orikwija ni Yesu owa Nazareesi, yaatandika kwamuza n'eiraka rihango, naagira ati: Yesu, omwana wa Daudi, ongirire embabazi! 48Kandi baingi baamuteisa, ngu acureere; kwonka we yaagumizamu naagamba munonga ati: Mwana wa Daudi, ongirire embabazi! 49Yesu yaayemerera, yaagira ati: Nimumwete. Baamweta, baamugambira bati: Huumura; imuka, naakweta. 50Nawe yaanaga omwenda gwe, yaabandatuka, yaija ahari Yesu. 51Yesu yaamubuuza ati: Nooyenda ngu nkukorere ki? Ogwo mushaija yaamugarukamu ati: #10:51 Rabooni, amakuru ngu, Mwegyesa. Rabooni, niinyenda ngu mpumuukye. 52Yesu yaamwikiriza ati: Irooko, okwikiriza kwawe nikwo kwakukiza. Ahonaaho yaahumuuka, yaamukuratira omu muhanda.

Currently Selected:

Mako 10: RR64

Highlight

Copy