Luka 22

Yuda okutunda Yesu

1 # Mat 26:1-5; Mak 14:1, 2. Kandi obugyenyi bw'Emigaati etatumbisiibwe oburikwetwa Okuhingurwaho bukaba nibwenda kuhika. 2Abanyamurwa abakuru n'abahandiiki baacwa obwengye oku baramwite, ahakuba bakaba nibatiina abantu, 3#Mat 26:14-16; Mak 14:10, 11. Sitaane yaataaha omuri Yuda, orikwetwa Iskaryota, owaabaire ari omwe ahari ikumi na babiri,#Yoh 13:2, 27. 4Yaagyenda yaahanuura n'abanyamurwa abakuru n'abaserukare, oku araamubareebeze. 5Baahsemererwa, baaraganisa kumuha empiiha. 6Yaikiriza, yaasherura oburyo bw'okumubareebeza, ahu omutwe gw'abantu gutari.

Yesu okurya Okuhingurwaho n'abeegi be

7 # Mat 26:17-29; Mak 14:12-25. Kandi ekiro ky'Emigaati etatumbisiibwe kyahika; nikyo kiro ekyabaire kitambirwaho omwana gw'entaama gw'Okuhingurwaho.#Kur 12:18-20. 8Yesu yaatuma Petero na Yohaana naagira ati: Mugyende, mututebeekanisize Okuhingurwaho, turye. 9Baamubuuza bati: Nooyenda ngu tukutebeekanisize nkahi? 10Yaabagira ati: Reeba, ku muraataahe omu rurembo, nimwija kubuganwa omushaija oyekoreire enjoga y'amaizi; mumukurate omu nju ei araataahemu. 11Mugire nyineeka muti: Omwegyesa yaakutumaho, naakubuuza ngu; Ekishengye ky'abagyenyi kirahi, omu araariire Okuhingurwaho n'abeegi be? 12Naija kubooreka ekishengye kihango eky'ahaiguru ekicumirwe; mutubonereze omwo. 13Baagyenda, baashanga biri nk'oku yaabambira; baatebeekanisa Okuhingurwaho.

14Eshaaha ku zaahikire, yaashutama aha by'okurya hamwe n'entumwa. 15Yaabagira ati: Nyetengire munonga kuriira hamwe naimwe Okuhingurwaho oku, ntakabonabonesiibwe; 16ahakuba nimbagambira nti: Tindirya Kuhingurwaho okundi, okuhitsya obu kurihikiirizibwa omu bukama bwa Ruhanga. 17Yaakwata ekikopo; yaaherize kusiima, yaagira ati: Mukwate eki, mukibagane, 18ahakuba nimbagambira nti: Tindinywa aha byana by'emizaabibu, okuruga hati okuhitsya obu obukama bwa Ruhanga buriija.

19 # 1 Kor 11:23-25. Yaakwata omugaati; ku yaaherize kusiima yaagubega, yaagubaha, naagira ati; Ogu n'omubiri gwangye, ogwaheebwayo ahabwanyu; mugume mukore mutyo okuunyijukiraho. 20#Kur 24:8; Yer 31:31. Ku baaherize kurya, yaakwata atyo n'ekikopo, yaagira ati: Ekikopo eki niyo ndagaano ensya ehamibwa eshagama yangye, esheesheka ahabwanyu.

21 # Yoh 13:21, 22. Reeba, omukono gw'orikundeebya guri hamwe naanye aha meeza; 22buzimazima Omwana w'omuntu naagyenda, nk'oku kyamuteekateekyeirwe; kwonka orikumureebya aryareeba enaku! 23Baatandika kubuuzana bonka ngu, N'oha aharibo orikwenda kukora ekyo.

Omukuru omu bukama bwa Ruhanga

24 # Luk 9:46. Kandi bakagira empaka, ngu n'oha omuribo orikuteekateekwaho kuba mukuru. 25#Mat 20:25-27; Mak 10:42-44. Yaabagambira ati: Abagabe b'Abanyamahanga babategyeka; n'abaine obushoboorozi aharibo beetwa Abahwezi b'abantu. 26Kwonka imwe mutariba mutyo; omukuru omuriimwe abe nk'omuto; kandi orikutegyeka abe nk'orikuheereza. 27#Yoh 13:4-14. Beitu omukuru n'oha, oshutami aha by'okurya, nari orikuheereza? T'ogwo oshutami aha by'okurya? Kwonka nyowe ndi ahagati yaanyu nk'omuheereza. 28Kandi niimwe abaagumisiriize naanye omu bi naagyeziibwe; 29#Luk 12:32. nk'oku Tata yambiikiire obukama, naanye mbubabiikiire, 30#Mat 19:28. ngu muriire, kandi munywere aha meeza yangye omu bukama bwangye; kandi ngu mushutame aha bitebe by'obugabe, mucwere enganda za Israeli ikumi na ibiri emanja.

Yesu okugamba oku Petero araamwehakane

31 # Mat 26:31-35; Mak 14:27-31; Yoh 13:36-38. Kandi Mukama waitu yaagira ati: Simooni, Simooni, Sitaane akashaba ngu abashungure nk'oburo;#2 Kor 2:11; Amo 9:9. 32#Yoh 17:11, 15. kwonka nyowe nkakushabira, ngu okwikiriza kwawe kutahwaho; kandi iwe, ku oriheza kuhinduka, ohamye ab'eishe-emwe. 33Yaamugarukamu ati: Mukama wangye, nyeteekateekire kugyenda naiwe omu kihome, n'omu kufa. 34Yesu yaagira ati: Ninkugambira iwe Petero, eri izooba enkoko terikwija kugamba, otakeehakanie kashatu ku otarikummanya.

35 # Luk 9:3; 10:4. Yaababuuza ati: Ku naabatumire mutaine nshaho y'empiiha, nari efurebe, n'obu zaakuba enkaito, mweine eki mwabuzirwe? Baagarukamu ngu, Ngaaha. 36Yaabagira ati: Mbwenu hati, oine enshaho y'empiiha, agihagatire, n'oine efurebe atyo; kandi otabiine, atunde omunagiro gwe, agure rurara. 37#Isa 53:12. Ahakuba nimbagambira nti: Ekyahandiikirwe eki kishemerire kuhikiirira ahariinye ngu, Akabarirwa ahmwe n'abasiisi, ahabw'okuba ebyampandiikirweho nibyenda kuhika. 38Baamugira bati: Mukama waitu, reeba zaarurara ibiri nzizi! Yaabagira ati: Ka bihwere aho!

Yesu okushaba n'obusaasi omuri Gesesemaane

39 # Mat 26:30, 36-46; Mak 14:26, 32-42. Yaashohora, yaatemba aha rushozi rwa Zeituuni, nk'omucwe gwe oku gwabaire guri; abeegi be baamukuratira. 40Ku yaahikire okwo, yaabagira ati: Mushabe murekye kuza omu kwohibwa. 41Yaabeeshorooramu hakye nk'aharikurekyerwa eibaare; yaatsimba amaju, yaashaba ati: 42Taata, ku oraabe noikiriza, onyiheho ekikopo eki; kwonka kirekye kuba nk'oku ndikwenda, kureka nka Iwe oku orikwenda. 43#1 Bag 19:5; Byak 27:23. Maraika yaamweyoreka naaruga omu iguru, yaamugumya. 44Ku yaasaasire munonga, yaayezirika kushaba; etuutu ye yaashusha nk'amatondo mahango g'eshagama omu kuragarika ahansi. 45Ku yaaherize kushaba, yaimuka, yaija aha beegi be, yaashanga bagwejegyeire ahabw'okuganya; 46yaababuuza ati: Ahabw'enki mugwejegyeire? Mwimukye, mushabe, murekye kuza omu kwohibwa.

Okukwata Yesu

47 # Mat 26:47-56; Mak 14:43-49; Yoh 18:2-11. Ku yaabaire naakigamba, haija omutwe gw'abantu, n'ogwo orikwetwa Yuda, omwe ahari ikumi na babiri, abeebembeire; yairira haihi Yesu kumnywegyera. 48Yesu yaamubuuza ati: Yuda, noorebya Omwana w'omuntu n'okunywegyera? 49Abaabaire bamuhereire, ku baareebire ebyaza kubaho, baabuuza bati: Mukama waitu, tubateme na zaarurara? 50Omwe aharibo yaatema omuhuuku w'omunyamurwa omukuru, yaamucwaho okutu kwa buryo. 51Yesu yaagira ati: Murekyere aho! Yaamukora aha kutu, yaamukiza. 52Yesu yaabuuza abanyamurwa abakuru n'abakuru b'abaserukare ba hekalu, n'abandi bakuru, abamuhururiire, ati: Mukampururiire nk'oku bahururira omwambuzi na zaarurara n'ebikoni? 53#Yoh 7:30; 8:20. Obu naabaire ntuura naimwe omuri hekalu, timurantaireho ngaro kunkwata; kwonka obunaku obu n'obwanyu, kandi n'obw'obushoboorozi bw'omwirima.

Petero okwehakana Yesu

54 # Mat 26:57, 58, 69-75; Mak 14:53, 54, 66-72; Yoh 18:12-18, 25-27. Baamukwata, baamutwara, baamutaasya omu nju y'omunyamurwa omukuru; kandi Petero yaamukuratira naamugyenda hare. 55Ku baaherize kuhemba omuriro omu kibuga ahagati, baashutama hamwe ahansi, na Petero yaashutama ahagati yaabo. 56Omuzaana yaamureeba ashutami aharikuhweza; ku yaamwetegyereize, yaagira ati: Omushaija ogu nawe abaire ari hamwe na Yesu. 57Petero yaayehakana naagira ati: Mukazi 'we, tindikumumanya. 58Ku hahingwireho akaanya kakye, ondiijo yaamureeba, yaagira ati: Naiwe ori owaabo. Petero yaagira ati: Mushaija 'we, tindi waabo. 59Kandi bwanyima y'eshaaha nk'emwe n'ondiijo yaamwomesereza ati: Buzima omushaija ogu yaaba ari hamwe nawe; ahabw'okuba n'Omunyagalilaya. 60Kwonka Petero yaagira ati: Mushaija 'we, tindikumanya ki orikugamba. Ahonaaho, ku yaabaire naakigamba, enkoko yaagamba. 61Mukama waitu yaahinduka, yaareeba Petero, Petero yaijuka ekigambo kya Mukama waitu, oku amugizire ati: Enkoko etakagambire, noija kuunyehankana kashatu. 62Yaashohora aheeru, yaarira munonga.

Abanyamurwa okucwera Yesu orubanja rw'okumwita

63 # Mat 26:67, 68; Mak 14:65. Abashaija abaabaire bakwaitwe Yesu, baamuteerera enaku, baamuteera. 64Baamukoma aha maisho, baamugira bati: Gamba; owaakuteera n'oha? 65Baamugambaho n'ebindi bingi, nibamujuma.

66 # Mat 26:59-66; Mak 14:55-64. Ku bwaseesire, omutwe gw'abakuru b'eihanga eryo baateerana hamwe n'abanyamurwa abakuru n'abahandiiki; baamutwara omu ishengyero ryabo, nibagira bati: 67#Yoh 10:24. Ku oraabe ori Kristo, tugambire. Yaabagarukamu ati: N'obu ndaabagambire, timurikwija kwikiriza; 68kandi n'obu naakubabuuza, timukangarukamu. 69#Dan 7:13. Kwonka okuruga hati Omwana w'omuntu aryashutama aha rubaju rwa buryo rw'Obushoboorozi bwa Ruhanga. 70Boona baamubuuza bati: Iwe shi, ori Omwana wa Ruhanga? Yaabagarukamu ati: Ndi We nk'oku mwagamba. 71Baagira bati: Kandi nitukyendera ki obwamushinja obundi? Ahabw'okuba itwe twayehuririra ebyaruga omu kanwa ke.

Currently Selected:

Luka 22: RR64

Highlight

Copy