Luka 16

Enfumu y'omubiiki mubi

1Yesu yaagaruka yaagira abeegi be ati: Hakaba hariho omuntu omutungi, owaabaire aine omubiiki; baamumuregaho ku arikushiisha ebintu bye. 2Yaamweta, yaamubuuza ati: Eki, eki ndikukuhuriraho, n'enki? Nyoeka oku waatwarize eby'obubiiki bwawe; ahakuba tokishemerera kuba mubiiki wangye. 3Omubiiki yaayebuuza ati: Ngire nta, ahabw'okuba mukama wangye yaaza kumbinga omu tubiiki? Tiinyine maani g'okuhinga, kandi n'okushabiriza nikuunyitsa enshoni. 4Mbwenu naamanya eki ndaakore, kikantaasya omu maka g'abantu, ku ndaabingwe omu bubiiki. 5Yaayeta weena oine eibanja rya mukama we, yaabuuza ow'okubanza ati: Mukama wangye naakwihuza ki? 6Yaamugarukamu ati: Encuro z'amajuta igana. Omubiiki yaamugira ati: Kwata orupapura rwawe oru orikwihurizibwaho, orahukye kushutama, ohandiikyeho makumi ataano. 7Yaabuuza ondiijo ati: Iwe naakwihuza ki? Onu yaamugira ati: Ebitenga by'engano igana. Yaamugira ati: Kwata orupapura rwawe oru orikwihurizibwaho, ohandiikyeho makumi munaana. 8#Efe 5:8. Mukama w'omubiiki otarikwesigwa yaamusiima ahabw'obwengye obu yaagizire; ahakuba abantu b'ensi egi omu busingye bwabo nibakiza abantu b'omushana obwengye. 9#Mat 19:21. Kandi nimbagambira nti: Mwenywanire na #16:9 Mamona n'ekigambo ky'orurimi orurikwetwa Aramaici, amakuru ngu eitungo. Mamona etari y'okuhikiirira, nyentsya ku erihwaho, babaakiire omu maka agatahwaho.

10Oyesigwa omu bikye munonga, niwe ayesigwa n'omu bingi; kandi oteesigwa mu bikye munonga, niwe ateesigwa na mu bingi. 11Ku muraabe mubaire mutari beesigwa mu butungi obutari bw'okuhikiirira, n'oha oribakwatsa obutungi bw'amazima? 12Kandi ku muraabe mubaire mutari beesigwa mu by'abandi, n'oha oribaha ebyanyu eby'okwetegyekyera? 13#Mat 6:24. Tihariho muhuuku orikubaasa kuheereza abakama babiri; ahakuba ku yaakukora atyo, akaayangaho omwe, akunda ondiijo; nari agumira ahari omwe, agaya ondiijo. Timurikubaasa kuheereza Ruhanga na Mamona.

14Abafarisaayo, abaabaire bari abakunzi b'empiiha, ku baahuriire ebyo byona, baamushekyerera. 15#Luk 18:9-14; Enf 6:16, 17. Yaabagira ati: Imwe muri abantu abeehindura abahikriire omu maisho g'abantu, kwonka Ruhanga naamanya emitima yaanyu; mumanye ngu ekirikuhimbisibwa omu bantu n'ekirikunugwa omu maisho ga Ruhanga.

16 # Mat 11:12, 13. Ebiragiro na Baanabi bikaba biriho okuhitysa omu biro bya Yohaana; okuruga obwo enkuru nungi ey'obukama bwa Ruhanga ebuurirwa, kandi omuntu weena abutaahamu n'amaani. 17Nikirahuka eiguru n'ensi okuhwaho okukira akatoonyezi kamwe k'omu Biragiro okuhwaho.

18 # Mat 19:9. Omuntu weena orikushenda omukazi we akashwera ondiijo, naaba ashambaine; kandi orikushwera omukazi obingirwe iba, nawe naaba ashambaine.

Enfumu y'omutungi n'omworo

19Hakaba hariho omutungi, owaabaire ajwara ebijwaro bya bujwa n'emyenda ya bafuta emirungi, kandi ebiro byona akaba asiiba ajarami, naarya gye. 20Kandi hakaba hariho n'omworo, owaabaire naayetwa Laazaaro, ou baabaire babyamya aha irembo ry'omutungi ogwo, omubiri gwe gwijwire ebironda. 21#Mat 15:27. Akaba ayetenga kugaburirwa ebirikuragara ahansi y'emeeza y'ogwo mutungi; kandi n'embwa zikaba ziija, zirigatsa ebironda bye. 22Bwanyima omworo ogwo yaafa, yaatwarwa baamaraika omu kifuba kya Abrahamu. Omutungi ogwo nawe yaafa, yaaziikwa. 23Ku yaahikire okuzimu, yainamura amaisho ge naahururwa, yaareeba Abrahamu hare na Laazaaro ari omu kifuba kye. 24Yaayeta munonga naagira ati: Taata Abrahamu, nsaasira, otume Laazaaro akoze enshonga y'orukumu rwe omu maizi, afukiirize orurimi rwangye; ahabw'okuba nimpururwa omu muriro ogu. 25Kwonka Abrahamu yaagira ati: Mwana wangye, ijuka oku waahairwe ebirungi byawe okiri omu nsi, na Laazaaro nikwo yaahairwe ebibi; mbwenu hati ari aha, ari gye, iwe noohururwa. 26Kandi t'ekyo kyonka, ahagati yaitu naimwe hariho orusa ruhango orwataireho, ngu ruremese abarikwenda kuruga aha kuza ei muri, kandi ngu ruzibire omuntu weena kuruga okwo kwija ahu turi. 27Omutungi yaagira ati: Mbwenu ninkweshengyereza, Taata, omutume owa tata; 28ahakuba nyineyo barumuna bangye bataano, abahabure, nabo barekye kwija omu mwanya ogu ogurimu okuhururwa munonga. 29#2 Tim 3:16. Abrahamu yaagira ati: Baine Musa na baanabi, babe nibo baahurira. 30Omutungi yaagira ati: Ngaaha, Taata Abrahamu; ku haraazeyo ozookire omu bafu, baryayeteisa. 31#Yoh 11:45-53. Yaamugarukamu ati: Ku baraabe banga kuhurira Musa na baanabi, tibarikirizisibwa muntu, n'obu yaakuba ozookire omu bafu.

Currently Selected:

Luka 16: RR64

Highlight

Copy