Yohaana 3

Nikodemu n'eby'okuzaarwa obwa kabiri

1 # Yoh 7:50; 19:39. Hakaba hariho omuntu ow'omu Bafarisaayo, orikwetwa Nikodemu, omwe aha bategyeki b'Abayudaaya. 2Omushaija ogwo akaija ahari Yesu nyekiro, yaamugira ati: Rabi, nitumanya ku ori omwegyesa owaarugire ahari Ruhanga; ahakuba tihariho muntu orikubaasa kukora obumanyiso obu orikukora, kureka Ruhanga yaaguma nawe. 3#Mat 18:3; 1 Pet 1:23. Yesu yaamugarukamu ati: Buzimazima ninkugambira nti: Omuntu, ku aba atazairwe bwa kabiri, tabaasa kureeba bukama bwa Ruhanga. 4Nikodemu yaamubuuza ati: Omuntu naabaasa ata kuzaarwa yaakuzire? Naabaasa kugaruka omu nda ya nyina, azaarwe? 5#Ezk 36:25-27; Efe 5:26. Yesu yaagarukamu ati: Buzimazima ninkugambira nti: Omuntu, ku aba atazairwe maizi na Mwoyo, tabaasa kutaaha omu bukama bwa Ruhanga. 6#Yoh 1:13; Zab 51:5. Ekizaarwa omubiri kiba omubiri, n'ekizaarwa Omwoyo kiba omwoyo. 7Otatangaarira eki naakugambira nti: Mushemereire kuzaarwa obwa kabiri. 8#Ezk 37:9. Omuyaga guhuuha nigugarura ei gurikwenda, iwe ohurira okuhuuha kwagwo, kwonka tomanya i gurikuruga, n'obu yaakuba ei gurikuza; n'ozairwe Omwoyo weena nikwo aba. 9Nikodemu yaamugarukamu ati: Ebyo nibibaasika bita? 10Yesu yaagarukamu, naagira ati: Ori omwegyesa w'Abaisraeli, kandi torikumanya bigambo ebyo? 11#Yoh 8:28. Buzimazima ninkugambira nti: Itwe tugamba eki turikumanya, tuhamya eki twareebire; kwonka imwe timwikiriza kuhamya kwaitu. 12#Luk 22:67. Obu mbagambira eby'ensi, mutabiikirize, muryaikiriza muta, naabagambira eby'omu iguru? 13#Efe 4:9. Tihariho oratembire omu iguru, kureka Ogwo owaashuumire okuruga omu iguru, niwe Mwana w'omuntu ori omu iguru.

14 # Kub 21:8, 9. Kandi nk'oku Musa yaahanikire enjoka omu ihamba, nikwo n'Omwana w'omuntu ashemereire kuhanikwa, 15ngu omuntu weena orikumwikiriza aheebwe amagara agatahwaho. 16Ahakuba oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho. 17#Yoh 12:47; Byak 17:31. Mumanye ngu Ruhanga taratumire Mwana we omu nsi kugicwera orubanja, kureka ngu ensi ejunwe ahabwe. 18#Yoh 5:24. Orikumwikiriza, tarikucwerwa rubanja; kwonka otarikumwikiriza, aherize kurucwerwa, ahabw'okuba taikiriize iziina ry'Omwana wa Ruhanga omwe nyamunegyere. 19Kandi oru nirwo rubanja, omushana gwizire omu nsi, abantu baakunda omwirima okukira omushana; ahakuba emicwe yaabo ekaba eri mibi. 20#Efe 5:13. Omuntu weena okora ebibi ayanga omushana, kandi taija ha mushana, ngu emicwe ye erekye kuhanwa. 21Kwonka okora eby'amazima aija aha mushana, ngu emicwe ye ereebekye butunu ku yaakoreirwe omuri Ruhanga.

Yohaana okugaruka kuhamya Yesu

22Bwanyima y'ebyo Yesu n'abeegi be baataaha omu ishaza rya Buyudaaya; yaagumayo nabo, naabatiza. 23Kandi na Yohaana akaba naabatiriza Enoni haihi na Salimu, ahabw'okuba aho niho amaizi maingi gaabaire gari; abantu baingi baija, baabatizibwa. 24Kandi obwo Yohaana akaba atakatairwe mu kihome. 25Haabaho empaka ahagati y'abeegi ba Yohaana n'Omuyudaaya aha by'okweyeza. 26#Yoh 1:26-34. Baija ahari Yohaana, baamugira bati: Rabi, omushaija owaabaire ari hamwe naiwe seeri ya Yorudani, ou waabaire noohamya, reeba nawe naabatiza, abantu boona nibagyenda ah'ari. 27Yohaana yaagarukamu naagira ati: Omuntu tabaasa kweha kintu kyona, kureka biri akihairwe okuruga omu iguru. 28#Mak 1:2. Imwe mwenka nimuhamya ku naagambire nti: Nyowe tindi Kristo, kwonka nkatumwa kumwebembera. 29#Mat 9:15. Oine omugore niwe kishwera; omugambi w'obugyenyi, ku ayemerera aha rubaju rwa kishwera yaamuhurira, ashemererwa munonga ahabw'okuhurira eiraka rye; n'ahabw'ekyo okushemererwa kwangye oku kuhikire. 30We ashemereire kuguma naakura, naanye nkaguma ningaruka ahansi.

31Orugire omu iguru naakira boona; ow'ensi aba ari ow'ensi, kandi agamba eby'ensi. Orugire omu iguru naakira boona; 32eki yaareebire n'eki yaahuriire, nibyo ahamya; kwonka tihariho muntu oikiriza ebi ahamya. 33Oikiriza eby'okuhamya kwe, aba ahamize eki, ngu Ruhanga n'Ow'amazima. 34#Yoh 1:33. Ou Ruhanga yaatumire agamba ebigambo bya Ruhanga; ahakuba Ruhanga ku aza kuha Omwoyo, tamurenga. 35#Yoh 5:20. Ishe akunda Omwana, kandi amurekuriire byona. 36#1 Yoh 5:12. Orikwikiriza Omwana aine amagara agatahwaho; kwonka otarikworobera Mwana, taribona magara; kureka ekiniga kya Ruhanga kiguma ahariwe.

Currently Selected:

Yohaana 3: RR64

Highlight

Copy