Okutandika 37

Ebirooto bya Yosefu

1Yakobo akatuura omu nsi ya Kanaani, ei ishe yaashuhuukiiremu. 2#1 Sam 2:22-24. Ebi nibyo byabaire aha ruzaaro rwa Yakobo.

Yosefu akaba naariisa amasyo hamwe na bakuru be, aine emyaka ikumi na mushanju; omu kukura kwe akanyeeta na batabani ba Biliha n'aba Zilupa baka ishe; kandi Yosefu akaba agambira ishe ebibi ebi baabaire bakora. 3Kandi Israeli akaba akunda Yosefu okukira abandi baana be boona, ahakuba akaba ari omwana ou yaazaire yaabaire omugurusi; n'ahabw'ekyo akamubaziiriza ekanzu ndaingwa y'amabara. 4#Kut 49:23; Yoh 7:3, 5; 1 Yoh 2:11. Bakuru be ku baareebire ishe naamukunda okubakira boona, baamwanga, tibaabaasa kugamba gye nawe.

5Yosefu yaaroota ekirooto; ku yaakigambiire bakuru be, baayeyongyera kumwanga. 6Yaabagira ati: Nimbeeshengyereza muhurire ekirooto eki ndootsire; 7#Kut 42:6. tubaire nituboha ebiba omu misiri; ekiba kyangye kyaimuka, kyayemerera; ebyanyu biba nabyo byayemerera byayehinguririza ekyangye, byakiinamira. 8Bakuru be baamubuuza bati: Noogira ngu oryaba omugabe waitu? Buzima oryatutegyeka? Baayeyongyera kumwanga ahabw'ebirooto bye n'ebigambo bye. 9#Kut 46:29. Yaagaruka yaaroota ekindi kirooto, yaakigambira bakuru be, naagira ati: Ngarukire naarota ekindi kirooto; eizooba n'okwezi n'enyonyoozi ikumi n'emwe nibiinyinamira. 10Ku yaakigambiire ishe na bakuru be, ishe yaamuteisa, yaamugira ati: Ekyo ni kirooto ki eki orootsire? Noogira ngu nyowe na nyoko na bakuru baawe buzima turyaija twiname ahansi omu maisho gaawe? 11#Byak 7:9. Bakuru be baamugirira eihari, kwonka ishe yaaguma naijuka ekyo kigambo.

Bakuru ba Yosefu okugira enaama y'okumwita

12Bwanyima bakuru be baaza kuriisa amasyo ga ishebo haihi na Shekemu. 13Israeli yaagira Yosefu ati: Bakuru baawe tibarikuriisiza Shekemu? Ija mbakutumeho. Yaamugarukamu ati: Ntuma, Taata. 14#1 Sam 17:18. Ishe yaamugira ati: Irooko oreebe bakuru baawe ku baraabe bari gye n'amasyo ku garaabe gari gye, ogarukye ongambire. Nikwo kumutuma, akaruga omu Ruhanga rwa Heburooni, akaza Shekemu. 15Ku yaahikireyo, omuntu yaamushanga naagyendagyenda omu bwerere; yaamubuuza ati: Noosherura ki? 16Onu ati: Ninsherura bakuru bangye; ninkweshengyereza, ngambira ahu bariisiize. 17Omushaija yaamugarukamu ati: Bafurukire, ahakuba mpuriire nibagira ngu, Tuze Dosani. Atyo Yosefu yaakurata bakuru be, yaabashanga Dosani.

18 # Mak 12:7; 14:1; Yoh 11:53. Ku baamureebire akiri hare, atakabahikire haihi, baagira enaama y'okumwita. 19Baagambirana bati: Reeba, ruroota yaija. 20#Enf 1:11; 6:17. Mbwenu murekye tumwite, tumunagye omu kiina; turyagira tuti: Enyamaishwa endi y'abantu ekamurya; haza tureebe ebirooto bye ahu biriherera. 21#Kut 42:22. Reubeeni yaakihurira, yaamubakiza, yaagira ati: Katurekye kumwitira kimwe. 22Yaagaruka yaabagira ati: Mutasheesha eshagama, mumunagye aha omu ihamba omuri eki kiina, kwonka emikono yaanyu etagira eki yaamukoraho. Akagira atyo ngu abone kumubakiza, amugarurire ishe.

23Yosefu ku yaahikire bakuru be, baamujuura ekanzu eri endaingwa ei yaabaire ajwaire, 24baamutwara, baamunaga omu kiina; ekyo kiina kikaba kirimu busha, kitarimu maizi. 25Baashutama kurya; ku baimukize amaisho, baareeba omutwe gw'Abaishimaeli nibaruga Gileadi, baine engamira zeekoreire emigaju n'emibazi na sumuruna, nibabitwara Misri. 26#Kut 4:10. Yuda yaagira beene ishe ati: Nikitugasira ki kwita murumuna waitu, tukashereka eshagama ye? 27#Kut 42:21. Mwije tumuguze Abaishimaeli, emikono yaitu erekye kuba niyo yaamwita; ahabw'okuba ni murumuna waitu, kandi turi ab'orura rumwe. Beene ishe baamwikiriza. 28#Kut 39:1; Byak 7:9; Mat 27:9. Omuri ako kaanya abashuubuzi b'Abamidiani baarabaho; banu baiha Yosefu omu kiina, baamuguza Abaishimaeli shekeli makumi abiri z'efeeza; baatwara Yosefu Misri.

29Reubeni ku yaagarukire aha kiina, yaashanga Yosefu atarimu, yaataagura ebijwaro bye; 30yaagaruka ahari beene ishe, yaagira ati: Omwana tariyo; mbwenu ntoore hi? 31Baatwara ekanzu ya Yosefu, baita empaya y'embuzi, baagijabika omu shagama yaayo; 32#Kut 37:23. egyo kanzu ndaingwa baagitwarira ishebo, baagira bati: Tugwire aha kanzu egi; reeba ku eraabe eri ey'omwana waawe, nari etari yo. 33Yakobo yaagimanya, yaagira ati: N'ekanzu y'omwana wangye; enyamaishwa endi y'abantu emuriire; tihariho kubanganisa, Yosefu ataagataagwirwe. 34Yakobo yaataagura ebijwaro bye, yaayezirika ekiguniya, yaamara ebiro bingi naacurira omwana we. 35#Kut 42:38. Batabani be na bahara be boona baimuka baija kumwebesa enaku; yaayanga, yaagira ati: Ndyarugaho, nshangye omwana wangye okuzimu ninkicura. Nikwo ishe yaamucuriire atyo. 36Kandi Abamidiani abo ku baahikire Misri, baamuguza Potifaari, omwe aha bakuru b'engabo za Faraho, owaabaire ategyeka abarinzi.

Currently Selected:

Okutandika 37: RR64

Highlight

Copy