Jon 13

Iesu i Sufe Keken Berberat na Fafausum kia

1Aunbiing Ngasa na Liuliu Kulef ken fan Iudaia ka fatat, Iesu i usum le ka fatat mang e aunbiing isi ik la koseng piklinbat usuf Tama. I ier kanaka isi fanu kia igii na piklinbat ma i mais ri papang na farfarop na liu kia.

2Aunbiing ri ienien la na efef ae, Satan ka susuef ta ulo Iudas Iskariot, kalalik ke Saimon, isi in ta ufu Iesu una liman tuui. 3Iesu ka usum ta le, Tama ka luun ta foron tier tikii na piklin rakrakai kia ma i la tinbae sing God ke in fis sabin usuf God. 4Pesu, ka apti koseng inen ae, ka tel ufu nenge kolos ae i kau ta lo na maleh ma ka fis nenge taol na lifa. 5Namih, ka to dan una nenge lus ke ka sufe keken berberat na fafausum kia ma ka salis fasengseng kekri ini taol ae i fis ta u na lifa.

6Iesu ka la usuf Saimon Pita ke Pita ka tara sing i aragii, “Be, Kumguui! On sufe kekeng?”

7Iesu ka kiliis u aragii, “Biil o usum na sani ia tel u igii, isau le namih, on usum.”

8Pita ka tarah, “Biil! Gong o sufe kekeng.”

Ke Iesu ka kiliis u aragii, “Male biil ian sufe iun kekem, ke biil ti su kiam lo iau.”

9Pita ka tarah, “Kumguui, male arae, ke gong o sufe iun kekeng sau, iun limang ke paklung sabin.”

10Iesu ka kiliis u aragii, “Kaltu ae ka susuh tah, ka fuu ta e fo. In sufe iun keke sau, wara le pununfo tikii ka fuu tah. Ma gam fuuh, isau le biil e gam tikii.” 11Iesu ka usum ta lo se in ta ufu una liman tuui, pesu ka use u le, biil e ri tikii ri ka fuu tah.

12 # Luk 22:27 Aunbiing ka sufe tikii ta kekri, ka kau fis na kolos kia ke ka fis una sala ma ka diik ri aragii, “Arafah, gam malal sabin na sani ia ka tel ta u lo gam? 13Gam kam iau ini ‘Tom Fafausum’ ke ‘Kumguui.’ Ma orek kimi i tortores, wara le iau tom e ier ae. 14Ia Kumguui ke Tom Fafausum kimi. Igii ia ka sufe ta kekmi ke gam sabin gamen sufe faliu kekmi. 15Ia ka finngas ta gam ini nenge tintof, isi gam sabin gamek tel u arae ia tel ta u lo gam. 16#Metiu 10:24; Luk 6:40; Jon 15:20Tekentu kanaka ia fas gam, biil ti fafauun i laumet lo famfamu kia ke nenge kaltu ae i kep orek la, biil i laumet lo kaltu ae i wuun u la. 17Male gam usum na foron tier igii ke gamen kalok, male gam misuut lo.

Iesu i Use u le Tikas in Ta ufu na Liman Tuui

Metiu 26:20-25; Mak 14:17-21; Luk 22:21-23

18 # BukSong 41:9 “Biil ia use gam tikii. Ia usum lon fanse ae ia ka fule pes ta ri. Isau le, orek ae na Buk na Gogoh ik suut mang, ae i tarah, ‘Kaltu ae i ien beret turang, ka tapiek tuui kiak.’

19“Ia ka fasfas gam la mang igii, aunbiing biil biitom i tapiek, isi aunbiing in tapiek, ke gamek unune le iau sau e ier ae.#13:19 Na Kisim Bek 3:14 God i orek ta tura Moses ma i foteng asa tom le, “Iau sau e ier ae”. Igii Iesu ka foteng u tom ini as sabin ae. 20#Metiu 10:40; Mak 9:37; Luk 9:48; 10:16Tekentu kanaka ia fas gam, se i somangat pes iau, i somangat pes ier ae i wuun ta iau.”

21Aunbiing ka use ta u arae, ka purngis e bala ke ka use famalal u aragii, “Tekentu kanaka ia fas gam, neng lo gam tom in ta ufu iau una liman tuui.”

22Berberat na fafausum kia ri ka faparia fis ini ri ma ri ka wolpane le, Iesu i use se tutus lo ri. 23Neng lon berberat na fafausum, ier ae Iesu i ier kanaka isi, i kiis fatat ta Iesu. 24Saimon Pita ka fapik kalalik na fafausum ae, aragii, “Diik u, se tutus tom?”

25Ke kalalik na fafausum ae ka gigin fatat Iesu ma ka diik u aragii, “Kumguui, se tom?”

26Iesu ka kiliis u aragii, “Ier sau ae ian falum tigan beret igii na dis ma iak ta u usuf i.” Ke, ka falum tigan beret ae, ma ka ta u usuf Iudas kalalik ke Saimon Iskariot. 27Aunbiing sau Iudas ka ien ta beret, Satan ka susuef lo.

Ke Iesu ka fas u aragii, “Sani ae le on tel u, tel sape u.” 28Isau le, biil tikas lo ri na inen ae, i usum le isi sa Iesu ka tara arae sing Iudas. 29Iudas i parpar la na pitkalang kiri, pesu fale berberat na fafausum ri ka wol le Iesu i fas u isi in fiil ti tier ae ri dar u na inen ae, le in ta ti tier usuf foron lauu. 30Aunbiing sau Iudas i ien tikii beret ae, ka suu koseng ri. Ke ka kubunor.

Iesu i Ta Nagogon Fuuh

31Aunbiing Iudas ka la tah, Iesu ka fas ri aragii, “Igii Kalalik ken Kaltu ka kep memeh ma God i kep memeh lon Kalalik ken Kaltu. 32Male God i kep memeh lo, ke God tom in me Kalalik ken Kaltu ma God in me sape u.

33 # Jon 7:34 “Berberat kiak, ian kiis biitom tura gam na fatuklin aunbiing sau. Gamen im isi iau ma arae sau ia ka fas ta foron famfamu ken fan Iudaia ke igii ia ka fas gam le: Falifu ae ian la ulo, biil ifasi gamen la ulo.

34 # Jon 15:12,17; 1Jon 3:23; 2Jon 1:5 “Igii e nenge nagogon fuuh ia ta u usuf gam: Gamen famais faliu ini gam. Arae sau ia mais ta gam ke gam sabin gamen famais faliu ini gam. 35Male gam famais faliu ini gam ke fanu tikii rin usum le gam berberat na fafausum kiak.”

Iesu i Use Famu u le Pita in Fakawe ufu

Metiu 26:31-35; Mak 14:27-31; Luk 22:31-34

36Saimon Pita ka diik u aragii, “Kumguui, on la uwah?”

Iesu ka kiliis u aragii, “Falifu ae ian la ulo, biil ifasi on la ulo igii, isau le namih, on mih.”

37Pita ka diik u aragii, “Kumguui, isi sani biil ifasi ian mi lo wo igii? Ian lin liu kiak isi wo.”

38Ke Iesu ka kiliis u aragii, “Arafah, on lin liu kiam isi iau, beh? Tekentu kanaka ia fas o, aunbiing to biil biitom in teng, ke fatuul ok fakawe ufu iau.”

Currently Selected:

Jon 13: BJP

Highlight

Copy