Luka 7
7
Oyilihiwa wa mwiimeleli a sinturiyawu
(Matewuzhi 8.5-13)
1Yesu agamalile owoga madhu maatene ale wa nlogo, ahivolowaga oKafaranawu. 2Mwemule mwahikala sinturiyawu#7.2 Asinturiyawu yaali asogoleli a anyakoddo zana (100) a aRoma. ahikalana mwiimeleli amudhiveliiye vajinji. Mwiimeleli ole oobulela vajinji ahalilege vang'ono wi akwe. 3Sinturiyawu ole ageewile dhawogiwa dha Yesu, ahaarumaga apogo amohiwa aZhudewu wa oliye wi yamulobe amuyilihe mwiimeleli aaye. 4Egafiyile wa Yesu, yahimulobaga ni ntidi, yiiraga: <<Muthu ole doofwaneelela wi mmwiirele dhedhi, 5mwaha wi onodhiveliwa ni nlogo neehu, ohufiyedha onimagela nyuba ya matugumano>>. 6Yesu ahidhowaga ni aliwa. Aaddamelaga vang'ono ofiya vaade, sinturiyawu ole ahaarumaga akwaaye wi yeere: <<Nabwiyani kamukukumuwe, kagifwaneelele wi mvolowe mba mwaaga. 7Mwahaya buuyene, gihidheliimi meenka goonile yowi naari kagifwaneelele wi giwoge ni nyo. Mbwenye muwoge ndhu nimohive baahi, mwiimeleli aaga onoyila. 8Mwaha wowi ni miyeene ginothongiwa teto gihikanna anyakoddo ginaathongiimi. Geera: <We kadhowa>, oliye onodhowa; wa mmohiwa: <We kadha>, onodha. Geera mwiimeleli aaga: <We kasasanya ela>, onosasanya>>.
9Yesu ageewile madhu ale, ahitikinaga, orugunuwa wawaang'ana ale yamuharaga, wiira: <<Ginowuwaaddelani wi naari muEzarayeli kagifwanyilemo nroromelo nuulubale nootthabwa wona ndda>>. 10Vano aliba orumiwa ewelelaga vaade yamfwanyilege mwiimeleli agayilile.
Yesu onomvenyiha mwaana a maamukwele
11Voovira mudhidhi vang'ono, Yesu ahidhowaga oluwani neeriwa Nayiimi, vamohi ni anamasuuza aaye ni athu ajinjeene. 12Aaddamelaga ofiya vamulago va nluwa ndde,#7.12 Wale-wale maluwa majinji yowaabeliwa cinga. Nyuba dhaatedhene dhakala muwari mwa cinga, yathawiha koddo dhodheela dhilabo dhimohi. ahigumanaga ni athu yathukulege muruthu edhowaga omasiye, aaligi mwaana mmohive a maamukwele. Athu ajinjeene a muluwani mule yaaligi ni maamukwele ole. 13Nabwiya agamoonile ahimweeddiwelaga thagaraga, wiira: <<Kawuundde>>.
14Agafiyile vakukuuve ahikahinyaga ntete ale yathukulege wiimela. Yesu wiira: <<Muzombwe, miyo ginolamula, kavenya!>> 15Mwanookwa ahivenyaga okaraati wambeela owogaga. Vano Yesu omuwelihedha wa amaaye.
16Athu aatene yowoovaga. Yoomutamaalaga Mulugu, yiiraga: <<Namavuhulela mulubale ohooneya vaari va hiyo, Mulugu oheeddela nlogo naaye wi akamihedhe>>. 17Muselu ola wawoga dha oliye wahivuwaga oZhudeya ni mirudda dhaatedhene dhowaaddamela.
Zhuwawu Namabathiza onowaaruma anamasuuza aaye wa Yesu
(Matewuzhi 11.1-19)
18Anamasuuza a Zhuwawu yahidhowaga omwaaddela dhego dhaatedhene dhende. Zhuwawu ahawiithanaga abiili mwa aliwa, 19waaruma wa Nabwiya wi yamukohe: <<Akala duuliyeene ajejihiwa odha,#7.19 Duuliyeene ajejihiwa odha enamwaagana Muthikitheliwi, oyene aZhudewu aatene yamujejihedhiiwa ofiya, Misiya, naari wi Kirixtu. naari nimujejihege mmohiwa?>>
20Anamasuuza ale egafiyile vaaligi Yesu, yahiiraga: <<Zhuwawu Namabathiza ohuniruma wi nuukoheni: <Akala dinyeene eeriwa onodha naari nimujejihege mmohiwa?> >> 21Mudhidhi olene ahaayilihaga athu ajinji dhiredda, dhabure dhimohi dhaakathamiha ni okumiha mineba dhabure ni wawooniha aliba ohoona ajinji. 22Yesu ahawaakulaga, wiira: <<Dhowani mwamwaaddele Zhuwawu nde dhooniliinyu ni dhiiwiliinyu: aliba ohoona enowoona, aliba otopinya enoweedda, aliba maredda#7.22 Maredda mu ewogelo ya eGerego kinaagana mareddave mbwenye teto dhiredda dhoohiyana-hiyana dha nikupa na muthu. enoweelihiwa, aliba ohiiwa enowiiwa, anookwa enovenyihiwa ni oorabula enolaleyeliwa Muselu Wapama. 23Oreelihiwa duuleene ohunokuuwa mwaha waaga>>.
24Egavenyilevo anamarumiwa a Zhuwawu, Yesu ahambeelaga owoga ni athu mwaha wa Zhuwawu, eeraga: <<Mwadhowile mwiiddeddereni woona ddi? Bango yoothikeya ni pevo? 25Ki-to mwagele woona ddi? Muthu oowara guwo dhoofeewa? Ale enawara dhapama enakala mburo dhooddiddilela, enakala mmavade mwa mamwene. 26Ki-to mwagele woona ddi? Namavuhulela? Ee, miyo ginowuwaaddela wi oliye onomukwaranya namavuhulela. 27Ola di oyene onawogiwa mMalebani Ootaleleya wi:
<Miyo ginomuruma osogolo waawo
murumiwi aaga, oyene
onaasasanyedhege dila vasogolo vaawo>. # 7.27 Malakiya 3.1.
28Miyo ginowuwaaddelani wi mwa oobaliwa ni mwihiyana kaavo oomukwaranya Zhuwawu, mbwenye mung'ono muuMweneni wa Mulugu, oyo dili oomukwaranya oliye>>.
29(Vano athu oohiyana-hiyana aatene ofiyedha anamakoha-musoko yeewilege madhu a Yesu. Baayene yaakwanihile odidela ebaribari ya Mulugu, vowi yahirumeedha obathiziwa ni Zhuwawu. 30Mbwenye aFarizi ni anamatapulela a Malamulo kayaakwanihile efunelo ya Mulugu, vowi aliwa kayarumeedhile obathiziwa ni Zhuwawu.)
31Yesu ahiwogaga, eeraga: <<Ginaafwanafwanihe ni aani mulogo wa mudhidhi ola, ki enafwanafwana ni aani? 32Enafwanafwana ni ahima ekaraatile vamusika, nikuru nimohi yaakuwelaga, amohiwa yiiraga:
<Hiyo nuhuwoobelani mvilovilo,
nyo kamwiinile,
nihiiba jibo ya vamakwelo,
nyo kamuunddile>.
33Zhuwawu Namabathiza ohudha, ahijaga mukaathe, ahing'waga vinyu, nyo muni: <Ohukanna muneba wabure>. 34Ohudha Mwaana a Muthu ajaga, ang'waga, nyo muni: <Ole muliba nrima namang'wa vinyu akwaaye ba anamakoha-musoko ni anamathega!> 35Mbwenye ale enarumeedha tthottho dha Mulugu, enowooniha wi dila yaaye si ya ebaribari>>.
Mwihiyana oothega onothikithela makura manyalo a Yesu.
36Yesu ahoobiwaga ni mFarizi mmohi wi aje vaade vaaye, agavolowile mba mwa mFarizi, Yesu ahikaraatigi vamajelo. 37Moone, muluwani mule, mwahikalaga mwihiyana mmohi aali oothega. Ageewile dhowi Yesu onaja mba mwa mFarizi, ahidhaagana garaafwa na alabasuturu,#7.37 Alabasuturu naali nibwe noozhazhaala na mooneyelo oweela nasasanyiwana mino, milinga ni magaraafwa a makura oonukwela. mwaaligi makura oonukwela a mutheengo wookwima. 38Ahikokoraga odduli wa Yesu, waaddamela vamanyaloni aaye, anddaga, onyethihaga ni mitori manyalo a Yesu ahuhuraga ni nthithi, ombezharigi manyalo, amukuthulelaga makura oonukwela.
39Vano mFarizi ole amoobilege Yesu agoonile nde, ahambeelaga wuubuwela mmurimani mwaaye, eeraga: <<Yesu ola ahaakale namavuhulela, eere onona wi omukahinyile baani, mwihiyana ola dowi havi: vowi <namathega> >>.
40Yesu ahiwogaga ni mFarizi, wiira: <<Simawu, gihikanna madhu wi guwaaddele>>.
Oliye ahiiraga: <<Namasuuziha, wogani>>.
41Yesu ahiiraga: <<Yahikalawo athu abiili yafiyaarile korowa wa namafiyaariha, mmohi afiyaarile korowa dha parata#7.41 Korowa dha parata Naari wi: denariyo. Denariyo yaali korowa yawale ya parata ya oRoma mutheengo waliveliwa namalaba alaba nlabo nimohi. dhowaakwana mazana matanu (500), mmohiya makumi matanu (50). 42Vowi kayaakwaniha oweliha, mwiinya ahaalevelela aabiileene. Ki weevo, mwa abiili ala onamutthettheelese muliba ofiyaariha duuvi?>>
43Simawu ahimwaakulaga, wiira: <<Ginoonelamo aleveleliwe dhijinji>>.
Yesu ahimuwogagana, wiira: <<Ohaakula pama>>.
44Ageere ndo, Yesu ahimurugunuwelaga mwihiyana ole omwiirela Simawu: <<Onomoona mwihiyana ola? Miyo gahivolowa mba mwaawo, kugivahile mahinje oohuwana manyalo, mbwenye ola ohugikuthulela mitori manyalo aaga. 45Ohuhuraga ni mathithi aaye. We kugibezhari mbwenye ola givolowileve kamaalile ogibezhari manyalo aaga. 46Kugikuthulele makura mmuruni mwaaga mbwenye ola ohugikuthulela manyalo aaga ni makura oonukwela. 47Mwa ela ginowuwaaddelani wi dhoothega dhaaye dhijinji, dhihileveleliwa. Vowi ohooneyiha odhivela wujinji mbwenye ole oleveleliwe dhooyeva onadhivela vang'ono>>.
48Nuwindo, ahiwogaga ni mwihiyana, wiira: <<Dhoothega dhaawo, dhihileveleliwa>>.
49Ale yaaligi ni Yesu vamajelo yahambeelaga owoga weekiiwa, yiiraga: <<Ki olaya baani onafiyedha olevelela dhoothega?>>
50Mbwenye Yesu ahimwaaddelaga mwihiyana ole, wiira: <<Nuuvulumusile thi nroromelo naawo dhowa ni murenddele>>.
Currently Selected:
Luka 7: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
