Luka 6

Nabwiya a sabuddu

(Matewuzhi 12.1-14; Maruku 2.23 ofiyedha 3.6)

1Sabuddu mmohi, Yesu aviraga mmiddani mwa tirigu. Anamasuuza aaye yegi okothola ni madada mangala a tirigu, othikithaga, otakunaga. 2AFarizi amohiwa yahikohaga, wiira: <<Dhinakooddihiwa nlabo na sabuddu, muneerelana ddi?>>#6.2 Malamulo a Mozezi enokooddiha olaba nlabo na sabuddu. Moone Okuma 20.8-11; Deteronomiyo 5.12-14.

3Yesu ahawaakulaga, wiira: <<Nyo kamweelengile dheerile Davidi ni akwaaye aganna dala? 4Wi ahivolowaga nyuba ya Mulugu, othukula mikaathe dhoreelihiwa oja. Waavaha ale yannigiiyena. Mikaathe nde dhihinarumeedhihiwa ojiwa bure mbwenye anamakutha weekiiwa>>. 5Yesu aheenjedhedhaga, wawaaddela: <<Miyo Mwaana a Muthu gili Nabwiya a sabuddu>>.

6Sabuddu mmohiya, ahivolowaga nyuba ya matugumano egi osuuziha. Vano mwemule mwahikalaga mulobwana mmohi akwile ndada na moono wooja. 7Anamasuuziha a Malamulo ni aFarizi yoomusugwaga, esayelaga woona akala aamuyilihe muthu nlabo na sabuddu wi ekalena yoomusumelana. 8Mbwenye Yesu aganonile moobuwelelo eewa, ahimwiirelaga mulobwana ole. <<Venya, osusedhe vaari va>>. Oliye ovenya, okala owiimeleene.

9Vano Yesu ahawiirelaga aliwa: <<Ginowuukohani [munoona havi]? Nlabo na sabuddu dhinarumeedhiwa siivi? Wiira dhapama, naari wiirana dhabure? Ovulumusa, naari opa?>>

10Vano ahaasugwaga, yamwaapeelelege, omwiirela mulobwana ole <<Katapula ndada naawo>>. Oliye wiirana ndo, ndada oyila. 11Mbwenye aliwa yahitakaleliwaga vajinjivene, okanganelaga mwakaleligiisu esayelaga dhoofuna omwiirana Yesu.

Osakuliwa wa arumiwi kumi ni abiili

(Matewuzhi 10.1-4; Maruku 3.13-19)

12Nlabo nimohi mwa mudhidhi olene, Yesu ahidhowaga wi alobele omwaangoni. Ahivireliwaga mahiyu maatene alobelaga wa Mulugu. 13Vano ogasile ahawiithanaga anamasuuza aaye, waasakulavo kumi ni abiili, mwa aliwa ayene yaavahiliiye teto ndina na arumiwi: 14Simawu, amvahiliiye ndina na Peduru; ni Andire, ddibile; Tiyago ni Zhuwawu; Filipi ni Baritolomeyo; 15Matewuzhi; ni Tome; Tiyago, mwaana wa Alifiyu; ni Simawu, eeriwa muZeloti;#6.15 AZeloti Aliwa yaali a nikuru na aZhudewu yeethukulela oPalextina wona anamurala. Aliwa yoofuna wiinyuwela mwa pwere wi yaagonjihe ni wawiigara aRoma. 16Zhuda, mwaana a Tiyago; ni Zhudasi a oEsikariyothi, ole ampelekile Yesu.

Mareeliho ni oddilu

(Matewuzhi 5.1-12)

17Yesu vamohi ni anamasuuza aaye akitaga omwaangoni. Ahiimelaga vamusewasewani vatugumanege, anamasuuza ajinjeene ni muthithi mulubale wa athu yadheelaga murudda waatene wa oZhudeya ni oZheruzalemi ni a seresere ya nyaza ya oTiru ni oSidoni. 18Yadheelege omwiiwa ni oyilihiwa dhiredda. Ale yarabulihiwa ni mineba dhabure yooyilihiwa. 19Anamwinji aatene yoosayelaga omukahinya, vowi kopolo dhookuma mwa oliye, waayilihaga aatene.

20Vano Yesu ahawang'anaga anamasuuza aaye, wawaaddela, wiira:

<< Ooreelihiwa di nyo mwihinna yego,

vowi Omwene wa Mulugu bweenyu.

21 Ooreelihiwa di nyo mwinna dala dhiinova,

vowi munoodha murubale.

Ooreelihiwa di nyo munaandda dhiinova,

vowi munoodha muteye.

22 Ooreelihiwa di nyo athu yowiiddani,

ekoodda weedda ni nyo, yuuruwanagani,

enyemulaga ndina neenyu wona nabure,

mwaha wa Mwaana a Muthu.

23<<Teyelani nlabo nenddo agalalani ni olupa mwaha wi yootthettheeliwana yeenyu si yuulubale odhulu. Vowi yeere ndo awale-wale eewa ni anamavuhulela.

24 <<Mbwenye ooddilu di nyo oreela,

vowi muhaakela yowuuhagalasani.

25 Ooddilu di nyo munarubala mudhidhi ola,

vowi munodha mvoliwe.

Ooddilu di nyo munateya dhiinoveva,

vowi munodha mukubanye ni wuundda.

26 Ooddilu di nyo yootamaalagani athu aatene,

vowi awale-wale eewa yeerile ndo ni anamavuhulela ooratha. >>

Waadhivela amwiiddani

(Matewuzhi 5.38-48)

27<<Mbwenye ginowuwaaddelani nyo munagiiwa: Mwaadhivelege amwiiddani eenyu. Mwawiirelege dhapama ayene enowiiddani. 28Mwaareelihege ayene enowuulumelelani, mwaalobelelege ale enowoonihani goyi. 29Ole onooddwadhani mbarutuni, mmurugunusedhe kukuru emohi. Onowaakani kasaako, kammukooddihedhe wuwaakani maleyaya. 30Mwaavahege aatene enoolobani, ole onathukula eli yeenyu, kammusanye wi oowelihedheni. 31Dhaatedhene dhinafuniinyu wi athu yuwiirelegeni, nyo teto mwawiirelege aliwa.

32<<Mwaadhivelaga ale enoodhivelani baahi, munadha muthuviwe ddi? Teto ni anamathegeene enowaadhivela alene enaadhivela aliwa. 33Mwawiirelaga dhapama alene enowiirelani dhapama, munadha muthuviwe ddi? Anamathegeene teto enowiirana ndo. 34Mwaabolihaga alene munajejihiinyu wi yuuwelihedheni, munadha muthuviwe ddi? Vowi ni anamathegeene enobolihihana anamathegave, ejejihedhaga owelihedhiwa yankeene. 35Mbwenye nyo, mwaadhivelege amwiiddani eenyu, mwawiirelege dhapama ni obolihiha muhujejihedhaga waakela yego. Mweera ndo, yoothuviwa yeenyu enaakale ejinji. Vano munaakale aana a aMudhulu-dhulu. Vowi oliye di apama ni alene ehinamutamaala ni agongomwa. 36Kalani athagaraga wona Babiinyu oli athagaraga.

Kammukonege muthu

(Matewuzhi 7.1-6)

37<<Muhuthongege, kamudha muthongiwa. Muhukone kamudha mukoniwa. Mulevelelege wi mudhe muleveleliwe. 38Mvahege munodha mvahiwe mpimo wapama woopinyeedha woosukuseleya wootekuma. Moowomeliwa murima muneere ovahiwa, vowi ni mpimo oyene munaapimiinyuna akwiinyu, munodha mpimiwena>>.

39Vano oliye aheenjedhedhaga, owoga mwa musibe, wiira: <<Dhili dhoofwaneelela wi muliba ohoona amusogolele muliba ohoona mukwaaye? Kinamorele mmuliddini aabiileene? 40Namasuuza kanamukwaranya namasuuziha aaye, mbwenye aatene alene enavirihamo masuuziho enokala wona anamasuuziha eewa.

41<<Onooniwe ekata mwiintoni mwa ddibilo, wula ohusugwaga emiri eli mwiintoni mwaawo mwaha wa ddi? 42Onaanda addi omwiirela ddibilo: <Ddibilaaga, gihiye givenyihemo ekata eli mwiintonimo>, ohoonaga emiri eli mwiintoni mwaawo? Namanyengetha, vowambeela ovenyihemo ekata eli mwiintoni mwaawo, vano oneerege woona pama wi ovenyihemo ekata eli mwiintoni mwa ddibilo>>.

Muthanko ni dhoovaha dhiwa

(Matewuzhi 7.15-20)

43<<Kuliwo muthanko wapama onavaha dhoovaha dhabure, naari muthanko wabure onavaha dhoovaha dhapama. 44Muthanko oli waatene onononeya ni dhoovaha dhiwa. Mwaha wi kinahapiwege makwaaju mmiingani, naari kadhinahapiwege manga mmurothoni. 45Muthu apama onokumiha dhooreela dha mmurimani mwaaye teto muthu abure onokumiha dhabure dha mmurimani mwaaye. Mwaha wi mulomo onowoga dhidhaalile mmurimani.

Oowaraala ni oolodhowa

(Matewuzhi 7.24-29)

46<<Mwaha wa ddi munagiithaniinyu <aNabwiya> wula mwihiiragana dhinowaaddeliimini? 47Olene onadha wa miyo, eewa madhu aaga, avirihagamo, gineere wuwoonihani onaliganiiyena. 48Onaligana ni mulobwana mmohi amagaga nyuba yaaye, ahitiba miliddidha vakothokwani oddiihiha osiddela. Vano mwihinje wahidhaala, mahinje ale yahitekumela ode, yahifwanya nyuba kayathikeyile. Mwaha wi nyubaya yahimageya pama. 49Vano ole oneewa madhu aaga ahaavirihagamo, onaligana wona mulobwana amagile nyuba yaaye ahisiddela, kaatibele mooddiihiha. Vano mahinje edhaaga, yahitekumela nyuba ele mowaaguva yahitongwa. Obwanyuwavo yaatene>>.

Currently Selected:

Luka 6: tke

Highlight

Copy