Luka 23

1Nikuru naatene nahivenyaga vamutugumanoni, omuthukula Yesu omudhowanaga wa Pilatu. 2Vano wewule yahambeelaga omusumela, yiiraga: <<Muthu ola nimfwanyile aholosaga nlogo neehu. Ahiihaga wi kipelekege musoko wa Sezari, onawoga wi oliye di Kirixtu#23.2 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 35, 39. aroromelihiwe, teto di mwene>>.

3Pilatu ahimukohaga, wiira: <<We oli mwene a aZhudewu?>> Yesu ahimwaakulaga, wiira: <<Onawoga di nyo>>. 4Vano Pilatu ahawaaddela apogo a anamakutha ni anamwinji wiira: <<Kagimfwanyilena muladdu>>.

5Mbwenye aliwa yahikalelaga ntidi yiiraga: <<Onowaadugurula athu asuuzihaga Zhudeya aatene obaja oGalileya ofiya wuno>>.

6Pilatu ageewile dho Galileya ahikohaga akala muthu ole aali muGalileya. 7Aganonile wi mwene aaye di Heroddi, ahimusukumela wa Heroddi. Mudhidhi oyene, Heroddi akalaga oZheruzalemi.

8Heroddi agamoonile Yesu, ahihagalala vajinjivene vowi oofunesesa omoona wambeela wale. Mooligana ni dheewiiye dha oliye, oojejihedha wi oneere wiirana ntikiniho. 9Ahimukohaga moohiyana-hiyana, mbwenye Yesu kamwaakulilege yego. 10Apogo a anamakutha ni ale yasuuziha malamulo yaaligi vevale, yegi omusumela ni dhego dhijinji. 11Vano Heroddi ni anyakoddo aaye yegi omvevusa embeddaga. Yahimuwarihaga yoowara ya omwene, omuwelihedha wa Pilatu. 12Nlabo nenddo Pilatu ni Heroddi, yahaandanaga vowi wale yahiiddana.

13Vano Pilatu ahaatugumanyaga apogo a anamakutha ni asogoleli ni nlogo, 14wawiirela: <<Nyo munogidheelana muthu ola wona namaholosa nlogo, gigamukohile vameentoni veenyu kagimfwanyilena muladdu omusumeleliinyu. 15Naari vang'onong'ono, Heroddi kamfwanyilena muladdu, wofwaneelela opiwa, bu mwahaya omuweliheliiye wa hiyo>>. 16Vano miyo ginomuwaxuliha, geera ndo gimutapule. 17[Mudhidhi wa Paxkwa ahilemeelela omutapula oomagiwa mmohi.]

18Anamwinji aatene yookuwaga, yiiraga: <<Mumpe ola, mmutapule Baraba!>> 19(Baraba ola afugeleliwe ni mwaha wa ovuruvuru muluwani teto ni ompa muthu.)

20Pilatu afunagave wi amutapule Yesu, ahikalelaga ntidi owoga ni aliwa. 21Mbwenye aliwa yegi okuwa: <<Mmukomele! Mmukomele vamuraddini!>>

22Vano dila ya neethaaru ahaakohaga, eeraga: <<Yabure wiiriliiyena ddi? Ebaribareene kagimfwanyilena muladdu wofwaneelela okwa, ginomuwaxuliha nuwindo gimutapule>>.

23Aliwa yoolibihedhaga okuwa vajinjivene wi mukomeleni vamuraddini. Okuwa weewa wahambeelaga ogonjiha. 24Pilatu orumeedha yooloba yeewa. 25Omutapula ole yamulobigiisu afugeleliwe mwaha wa ovuruvuru ni ompa muthu, vano ompeleka Yesu moofuna mweewa.

Okomeliwa wa Yesu vamuraddini

(Matewuzhi 27.32-44; Maruku 15.21-32; Zhuwawu 19.16-27)

26Emudhowagana Yesu, yahimwihiddaga muSirenewu eeriwa Simawu, akumaga mmavade, omukapathiha muraddi wi amuharegena Yesu. 27Yegi omuhara athu ajinjeene, a nlogo ni ahiyana yakukuthaga vathimarimani emuunddelaga. 28Mbwenye Yesu ahirugunuwaga, wiira: <<Ahiyana oZheruzalemi kamuguunddele miyo; mwiyuunddele weekiinyu vamohi ni aniinyu! 29Vowi malabo enodha eneeriwege: <Oreelihiwa baale ehinabala, ehibalile, naari ehaamwihile!>

30<<Malabo ayene enodha yambeele wiirela mwaango: <Nibidhuwele hiyo!> Vano epathakala: <Nikuneele hiyo!>#23.30 Ozeya 10.8. 31Ki akala muthanko mukiiti, onowiiriwana ndo wowumma onadha wiiriwena havi?>>

32Yahithukuliwaga amohiwa abiili, yaaligi anameerana dhabure vamohi ni Yesu wi yoonihiwe goyi yoopiwa. 33Egafiyile mburo weeriiwa <<Egarigadhi>>, vevale yahimukomelaga vamuraddini oliye ni abiili ale, mmohi omoononi wooja, mmohi wuung'otoni. 34Vano Yesu ahiiraga: <<Babani, aleveleleni [vowi kinonile dhineeriisu]>>. Yahombezelaga gari, voogawana dhoowara dhaaye.

35Nlogo naaligi vevale negi, woona dhaatene, apogo yegi ombedda, yiiraga: <<Waavulumusa athu amohi, wiivulumuse weeka akala ebaribareene oli Kirixtu, oosakuliwa a Mulugu>>.

36Teto anyakoddo, yoomunyemulaga yahimwaaddamelaga wi emvahe vinyu oonyuunya, yahiiraga: 37<<Akala we oli mwene a aZhudewu wiivulumuse weeka>>.

38Vadhulu vamuraddi vahilebiwaga: <<OLA DI MWENE A AZHUDEWU>>.

39Mmohi wa anameera dhabure yakomeliwigiiyena oomunyemulaga oliye, eeraga: <<We kuli Kirixtu, ole aroromelihiwe? Wiivulumuse weeka vamohi ni hiyoya>>.

40Mmohiya ahimwaakulaga, omusumulula, wiira: <<Hiyo nigali othongiwa vamohi ni oliye, we kunamoova Mulugu? 41Hiyo nihifwaneelela orabula mwaha wi nnalivela dhabure dheriihu. Vano ola keerile yego yabure>>.

42Aheenjedhedhaga, eeraga: <<Yesu, mwaguubuwelele mwavolowa muuMweneni mweenyu>>.#23.42 Dhoolebiwa ni madada dhimohi kadhineera: <<Yesu, mwaguubuwele mwavolowa muuMweneni mweenyu>>, mbwenye dhini: <<Yesu, muguubuwele mwadha mudha wona Mwene>>.

43Yesu ahimwaakulaga, wiira: <<Ebaribareene ginowuwaaddela peeno veva onakala vamohi ni miyo mburo wooriya odhulu>>.

Okwa wa Yesu

(Matewuzhi 27.45-56; Maruku 15.33-41; Zhuwawu 19.28-30)

44Mudhidhi waaddamelaga, wa wora ya neekumi nabiili ya mutana yiihi yahikuneelaga elabo yaatene ofiyedha mudhidhi wa neethaaru wa ciguwo. 45Guwo yagawa nyuba ya Mulugu#23.45 Guwo yagawa nyuba ya Mulugu yaali guwo yatomeyiwe munyuba ya Mulugu yagawa Mburo Woweela ni Mburo Woweelesesa. Moone Okuma 26.33. yahitaleyaga vaari ni vaari, ng'ee! 46Yesu ahikuwaga ni ndhu nootaama, eeraga: <<Babani, ginopeleka mmadadani mweenyu muneba waaga!>> Nuuwoga madhu ala, okwa. 47Sinturiyawu#23.47 Asinturiyawu yaali asogoleli a anyakoddo zana (100) a aRoma. aaligi vevale vowoona nde ahimutamaalaga Mulugu, eeraga: <<Ebaribareene muthu ola aali ooharihamo>>. 48Muthithi wagumanilege woonelaga dhowiireya nde wahivenyagavo nuwiikubanyiha ekukuthaga vathimarimani veewa. 49Vano ale yamunonilege Yesu, vamohi ni ahiyana yamuharaga okumela oGalileya, yahikalagave voolapela vene yoonelaga dhowiireya nde.

Ologohiwa wa Yesu

(Matewuzhi 27.57-61; Maruku 15.42-47; Zhuwawu 19.38-42)

50Ahikalawo mulobwana mmohi eeriwa Zhuuze. Aali muthu apama, ooharihamo, mmohi a anamathonga a aZhudewu. 51Kaadhiveliwena dheerile nikuru ndde. Aali mukadda Arimateya mudhi mulubale wa oZhudeya. Oojejihedha Omwene wa Mulugu. 52Ahidhowaga wa Pilatu, omuloba mwiili wa Yesu. 53Ovenyihavo vamuraddini, ohuruwedha ni guwo yoweela ya liinyu. Ohela munsiyeni natopiwe vanibweni wona nikungu. Nsiye ndde mwaali muhunaheliwege muruthu. 54Naaligi nlabo noosasanyedha, omambeelelo wa sabuddu.

55Ahiyana yakumilege oGalileya ni Yesu yahidhowaga woona nsiye ni ologohiwa wa mwiili wa Yesu. 56Yahivenyaga odhowa osasanyedha dhoonukwela ni makura. Nlabo na sabuddu yahivumaga mooligana ni Malamulo.

Currently Selected:

Luka 23: tke

Highlight

Copy