Luka 16

Musibe wa musadoro oowaraala

1Yesu ahawaaddelaga anamasuuza aaye: <<Wahikala mulobwana mmohiwa oreela ole anna musadoro olene athu yamusumeliiwa vameentoni va nabwiye wi ononoonga dhooreela dhaaye. 2Vano nabwiye ahimwiithana omukoha, wiira: <Gineewiimi wawe si ddi? Waakulele dha omusadoro waawo mwaha wi dhiinova kunafwaneelela okala musadoro aaga>.

3<<Musadoro ole wiira mwa yeeka: <Gineere ddi? Vowi nabwiya aaga onogiigara mu omusadoroni. Olima mmiddani kaginaakwaniha, oloba teto onogikaliha manyazo. 4Miyo gihinona yowi giire, wihina athu yagaakelele mmavade mweewa geegariwa mu omusadoroni>.

5<<Ahawiithanihaga mmohi ni mmohi alene yamfiyaarele nabwiye. Omukoha owambeela, wiira: <Wamfiyaarile nabwiya aaga avi?>

6<<Oliye omwaakula: <Yoofiyaari yaaga si mino zana (100) dha makura>.

<<Nuwindo, musadoro wiira: <Okaraati, othukule kaarata ya yoofiyaari yaawo olebevo mowaaguva makumi matanu (50)>.

7<<Vano ahimukohaga a nabiili, wiira: <Ki we, wafiyaare avi?>

<<Oliye omwaakula: <Masakwi zana (100) a tirigu>.

<<Omwiirela: <Thukula kaarata ya yoofiyaari yaawo olebevo makumi matanu ni maraaru (80)>.

8<<Vano nabwiye a musadoro oonyengetha ole, ahimutamaalela mwaha wa oxaga waaye wewiliiye. Mwaha wi athu a elabo ya vati booxaga okwaranya mulogo weewa oli mowaara. 9Mbwenye miyo ginowuwaaddelani: Mulabihe dhooreela dha elabo yoonyengetha ela wi akwiinyu dhooreeladha dhoomalelani enodha yuwaakeleleni mmisasani dhoohumala.

10<<Ole oli oororomeleya ni dhooyeva, onororomeleyave teto ni dhijinji; ole ohunaharihamo ni dhooyeva kanaharihamo ni dhijinji. 11Vowi nyo mwahikale a ebaribari ni dhooreela dhoonyengetha, onoororomeleni baani ni oreela wa ebaribari? 12Akala muli oohuroromeleya ni weeddiha dhego dha mmoheene, onoovaheni baani weeddiha dhooreela dheenyu?

13<<Kalivo mwiimeleli onaanda wawiimelela anabwiya abiili; sowi oneerege omwiidda mmohi amudhivelege mmohiwa, naari oneerege omwiiwelela mmohi, mmohiwa amunyemulege. Kadhinaandeya omwiimelela Mulugu, wiimelela teto dhooreela>>.#16.13 EGerego: mamom.

Malamulo ni Omwene wa Mulugu

14AFarizi, ale yaali a nrima, yeewaga dhaatedhene dhedhile, yoombeddaga. 15Yesu ahawiirelaga: <<Nyo munowiihelamo wona owaakwanelesesa vameentoni va athu mbwenye Mulugu ohunona mirima dheenyu. Vowi dhinariihedheya vameentoni va athu, vameentoni va Mulugu dhinakala dhoonyemuwa.

16<<Malamulo ni anamavuhulela yahivuhulela ofiyedha mudhidhi wa Zhuwawu. Okumela vevale odhowa osogolo onolaleyiwa Muselu Wapama wa Omwene wa Mulugu, vano athu aatene enaakwaniha ovolowa mwemule ni kopolo, baahi. 17Sookweya vajinji ovira odhulu ni elabo ya vati, ohiyana wi omorevo mujebo mmohi wa Malamulo.

18<<Aatene enamwalana ni mwihiyanaaye, amutela mmohi onooraruwana, ole onamutela mwihiyana omwalanile ni mamune, onoomuraruwana.

Musibe wa mureeli ni Lazaro

19<<Ahikalawo mulobwana mmohi ooreela awaresa dhoowara dha mutheengo mulubale dha liinyu oofeewa ni owiirihedha mathanga malubale, akala ni mukalelo wa athu ooreelesesa malabo maatene. 20Ahikalawo teto muliba ooloba-loba eeriwa Lazaro, anna makwadda mwiili waatene akalesa vamulago va muliba oreela ole; 21oofunesesa oja dhoonyenyeya dhamoresa vameeza a muliba oreela. Ofiyedha anabwa yodheesa onyangulaga makwadda aaye.

22<<Dhahipadduwa muliba ooloba-loba agakwile, angero yahimuthukulaga omudhowana wakala Abarahamu. Agakwile muliba oreela yahimudhowana omulogoha. 23Arabulaga, omunddoni mburo wa anookwa, ahisugwa odhulu, omoona Abarahamu ni Lazaro agali nikukuru. 24Nuwindo, ahikuwaga, wiira: <Babani Abarahamu, mugeeddiwele thagaraga, mmurume Lazaro anyethihe mmahinjeni otompini wa embuno yaaye adhena addiddilihena nlumi naaga, vowi ginorabula mmunddoni mula>.

25<<Abarahamu ahimwaakulaga, wiira: <Mwaanaga, wuubuwelele wi wahaakela dhego dhapama dhoohagalasa egumi yaawo, wewule Lazaro aakelile dhoorabula. Mbwenye dhiinova, oliye onahagalala wuno, we onoorabula. 26Ohiya dhaatedhene vaari va hiyo ni nyo vihikala jiji, vowi eli wuno enafuna odha wo, kinaakwaniha, naari eli wo, enafuna odha wuno kinaakwaniha.

27<<Nuwindo, ahikalelaga ntidi, eeraga: <Babani, miyo ginowuulobani wi mmurume Lazaro adhowe vaade va ababa 28mwaha wi gihikanna addibilaga atanu. Awaaddele wi naaliweene enaadhe teto mburo ola wa masooso>.

29<<Abarahamu ahimwaakulaga, wiira: <Aliwa ehikanna Mozezi ni anamavuhulela, yawiiwelelege aliweene>.

30<<Mbwenye oliye ahikalelaga ntidi: <Naari, babani Abarahamu, akalavo mmohi ovenyile muukwani adhowa awoga ni aliwa, enotthwaruwa>.

31<<Abarahamu ahimwaakulaga, wiira: <Akala aliwa kinamwiiwelele Mozezi ni anamavuhulela, nivang'onong'ono kinafunege ogonjihiwa wi ehiye naari muthu mmohi avenye omakwelo> >>.

Currently Selected:

Luka 16: tke

Highlight

Copy