Luka 15

Musibe wa nibila noorimeela

(Matewuzhi 18.12-14)

1Anamakoha-musoko aatene ni <<anamathega alubale>> yoomususedhaga Yesu wi emwiiwe. 2AFarizi ni anamasuuziha a malamulo yegi omwaaba, yiiraga: <<Ola onowawaakela anamathega ajaga vamohi ni aliwa>>.

3Vano Yesu ahaawogelaga musibe ola, wiira: 4<<Baani mwa nyo oni aganna mabila zana (100), nirimeelavo nimohi, kanaahiye mukokolani mabila makumi matanu ni mannayi nuudha matanu ni mannayi (99), adhowa asayelaga nrimeele ofiyedha ofwanya? 5Agafwanyile onothukula veefuddi ni odhaaliwa ohagalala. 6Vano nuudhowa vaade. Ahawiithana akwaaye ni amwaaddamani awiirelaga: <Agalalani ni miyo mwaha wowi gihifwanya nibila naaga narimeelile>. 7Ginowuwaaddelani wi ni mukalelo mmohive onokala ohagalala wuulubale odhulu mwaha wa namathega mmohi onatthwaruwa, ohiyana makumi matanu ni mannayi ni atanu ni annayi (99) ooharihamo ehinafuneya otthwaruwa.

Musibe wa korowa yoorimeela

8<<Naari mwihiyana baani, oni aganna korowa dha gwingwi kumi, arimeeliha emohi, kanahiddiha panti, azhela mba asayelaga pama ofiyedha afwanya? 9Vano agafwanyile, onowaatugumanya akwaaye ni amwaaddamani eeraga: <Agalalani ni miyo mwaha wowi gihiddodda korowa yagirimeele>. 10Miyo ginowuwaaddelani wi ni mukalelo ola, onokala ohagalala vameentoni va angero a Mulugu mwaha wa namathega mmohi otthwaruwile>>.

Musibe wa mwaana ooholowa

11Yesu ahiwelelaga owoga, wiira: <<Mulobwana mmohi anna ahima anaalobwana abiili. 12Amung'onong'onoya mwa aliwa ahimwaaddela babe, wiira: <Babani, mugigawele epaddi ya dhooreela dhigifwaneele>. Oliye omugawelawo dhooreeladha.

13<<Vigavirile malabo ooyeva, muzombwe ole amung'onong'onoya ahitugumanyaga dhego dhaaye dhaatedhene, omaruwa, odhowa elabo emoheene yoolapela, wewo ahinoonga dhookalana dhaaye dhaatedhene ni mukalelo wabure woohuubuwelana dhoosogolo. 14Agamalile onoonga dhaaye dhaatedhene mwiilaboni mule, mwahidha dala yuulubale, oliye wambeela okanna goyi. 15Vano ahidhowaga okala ni mulobwana mmohi a mwiilaboni mwemule, omuruma omidda waaye wi akameelege kumba dhaaye. 16Wewule oofuna agarubalile maddeya yaaja kumba, mbwenye kaalivo amvaha maddeyaya.

17<<Ahuubuwelaga otthwaruwa wiyiirela yeeka: <Anamalaba angaasi a ababa enaja erubalaga mowaakwana, miyo gikwaga dala wuno! 18Baahi, ginovenya gidhowege wa ababa, gineere wawaaddela wi: Babani, gihithegela odhulu ni vameentoni veenyu. 19Vano kaginafwaneela wiiriwa mwaaninyu; mugaakele wona namalaba eenyu>. 20Ahivenyaga odhowa wa ababe.

<<Adheelaga woolapelawene babe ahimoonaga, omweeddiwela thagaraga. Ahimuthamagelaga, omukubaarela, ombezhari.

21<<Vano mwaana ahiiraga: <Babani, gihithegela odhulu ni vameentoni veenyu. Vano kagifwaneelele wiiriwa mwaaninyu>.

22<<Babe ahawaaddelaga amwiimeleli aaye, wiira: <Dhaanaani mowaaguva yoowara yooriyesesa, mmuwarihe teto mmuwarihe pethe mwimbunoni ni sapatho mmanyaloni. 23Mmudhena mwaana a ng'ombe ooruva mumpe. Niirena mathanga, nihagalale. 24Mwaha wowi mwaanaga ola ahikwa vano ohukanna egumi, ahirimeela, ohufwanyeya>. Vano wambeela ohagalala.

25<<Mwaana a mulubale aaligi omidda awelagawo, aaddamelaga vaade eewilege wiiba ni wiina. 26Omwiithana mwiimeleli mmohi, omukoha, wiira: <Eneereya ddi?> 27Oliye omwaakula, wiira: <Ddibilo didhiile, ababo waaruma wi epe mwaana a ng'ombe yooruva mwaha wowi ohumwaakela, aganna egumi>.

28<<Mwaana a mulubale otakaleliwa, kaafunaga ovolowa, babe ahikumelaga vaade, ombebeedhaga wi avolowe. 29Mbwenye oliye ahawaakulaga ababe, wiira: <Vihivira yaaka dhijinjidhene guwiimelelagani, gihilupile malamulo eenyu, mbwenye kamunagivahe naari mbuzi wi giirena mathanga ni akwaaga. 30Mbwenye mwaaninyu ola onoongile dhooreela dheenyu ni ahiyana ooraruwa, muhumpela mwaana a ng'ombe ooruva>.

31<<Vano babe ahimwaakulaga, wiira: <Mwaanaga, we mudhidhi waatene onakala ni miyo, dhaatedhene dhili dhaaga saawo. 32Mbwenye yaali yoofuneya wi nihagalale, nithabe mwaha wi ddibilo ola ahikwa vano ohukanna egumi, ahirimeela vano ohufwanyeya> >>.

Currently Selected:

Luka 15: tke

Highlight

Copy