Luka 14
14
Yesu vaade va mFarizi mmohi
1Nlabo nimohi na sabuddu, Yesu ahidhowaga vaade va mpogo mmohi a aFarizi wi aje mukaathe, athu yaaligi vevale yegi omusugwesesa. 2Vahikalaga mulobwana mmohi, annaga eredda yoodhibelana mwiili waatene.#14.2 EGerego: hidoropisiya. 3Yesu ahaakohaga aFarizi ni anamatapulela a Malamulo, eeraga: <<Dhinorumeedheya naari kadhinarumeedheya oyiliha nlabo na sabuddu?>> 4Aliwa kayawogilege yego. Vano ahimwihiddaga, omuyiliha ompaganya.
5Vooharela ahaakohaga: <<Mwa nyo oni mwaanaye,#14.5 Dhoolebiwa ni madada dhimohi dhini: <<Mwa nyo oni mwaana a buuru, naari ng'ombe yaaye, egamorele vaceelani…>> Anamasuuza ajinji enoobuwela wi Luka kaalebile wi mwaana a buuru mbwenye alebile wi mwaanaye. naari ng'ombe yaaye, egamorele vaceelani, ahitavulavo mudhidhi oyene nlabo na sabuddu baani?>> 6Mwa ela kayaandilege waakula.
Mburo dhowambeela
7Vano Yesu egi waasugwa aliba wiithaniwa yasakulaga dhittengu dhoosogolo, ahaawogelaga musibe, wiira: 8<<Muthu eethaneliwa mathanga a matelo, ahikaraatelege ettengu yoosogolo, vowi dhinodha dhipadduwe ogakaraatile, adhe owiithaniwa mmohi oothithimiheya owuukwaranya we. 9Adhe ole owiithanile, eerege: <We venya veettenguniva wi akaraativo ola>. Onavenyavo ni manyazo, odhowaga ettengu yoogomihedha. 10Moohiyaniha, weethaniwa, okaraatigi ettengu yoogomihedha; adha ole owiithanile, eera: <Mukwaaga venya okaraati osogolo wuno>. Onothithimiheya vameentoni va aliba wiithaniwa aatene. 11Vowi ole oneegweliha onookitihiwa; oneekitiha onogwelihiwa>>.
12Teto Yesu ahiwogaga ni muliba amwiithanilege, wiira: <<Wafunaga ovaha yooja, naari wiirihedha mathanga, kwawiithanege akwaawo, naari addibilo, naari anaamudhi, naari amwaaddamani ooreela wi dhinaadhe dhipadduwe naaliweene yuwiithane, yuuwelihedhe. 13Mbwenye we wafunaga wiirihedha mathanga, wawiithanege oorabula, ootopinya, ooragala ni oohoona. 14Weeraga ndo oneere oreelihiwa, vowi kinaakalena yowuuwelihedha; yoowelihedhiwa yaawo onaakele omavenyelo wa athu ooharihamo>>.
Musibe wa mathanga malubale
(Matewuzhi 22.1-14)
15Mmohi aaligi vevale ni oliye vameeza, ageewile nda, ahiiraga: <<Ooreelihiwa duule onaje mathanga muuMweneni wa Mulugu>>.
16Yesu ahaakulaga, wiira: <<Mulobwana mmohi ahisasanyedha mathanga malubale wawiithana athu ajinjeene. 17Mudhidhi wa mathanga ogafiyile ahimuruma mwiimeleli aaye wi awaaddele yawiithaniligiiye wi: <Dhaani vowi dhaatedhene dhihaakwanela>.
18<<Mbwenye aliwa yahambeelaga owoga mmohi-mmohi, owambeela ahiiraga: <Gihigula mudda ginafuna gidhowe goone. Ginaloba wi mugilevelele>.
19<<Mmohiya ahiiraga: <Gihigula ng'ombe paara tanu#14.19 AEzarayeli mudhidhi wawale yalima ni ng'ombe, vano yagulihaga, yaguliha biili-biili noona bi madhu ala owi: paara tanu, otapulela ng'ombe kumi. ginafuna gaxixe olimana. Ginaloba wi mugilevelele>.
20<<Mmohiya ahiiraga: <Gihitela dhiinoveva, kaginayawo>.
21<<Mwiimeleli agawelilewo ahimwaaddelaga nabwiye. Vano muliba nyuba ahitakaleliwaga, omwaaddela mwiimeleli, wiira: <Venya mowaaguva, waahare arampa alubale ni dila dha nluwa, waadhena wuno oorabula, ooragala, oohoona ni ootopinya>.
22<<Mwiimeleli ahiiragana: <Nabwiyani, gihiirana dhaatedhene wona mwawogeliinyu. Mbwenye mburo ohukalawoove>.
23<<Vano nabwiye ahimwaakulaga, wiira: <Venya waahare arampa ni dila dha mmavade, waawaddihedhe evolowe athu aatene wi nyuba yaaga edhaale. 24Ginowuwaaddelani wi aatene alene yeethaniwe vowambeela, kaavo naari mmohi oneere alawihe mathanga aaga> >>.
Wiisasanyedha wowaakwanela woomuhara Yesu
25Nuwindo, anamwinji yegi omuhara Yesu; ahaarugunuwelaga, wiira: 26<<Akala muthu onofuna odha wa miyo, aadhivela ababe, amaaye, mwihiyanaaye, addibile, arogoriye naari egumi yaaye vajinji ogihiya miyo, kanakala namasuuza aaga. 27Ole ohunathukule muraddi waaye wi agiharege kanaakale namasuuza aaga.
28<<Mwa nyo oni afunaga omaga nyuba yuulubale vowambeela, ahikaraati eelengela korowa dhinafuneyege wi oone akala oneere omariha baani? 29Dhinampadduwele agambeelile adhe ahimarihe mwaha wi keelengele korowadha mowaakwanela, aatene enamoonege eneerege ombedda, 30yiirege: <Mulobwana ole ahambeela omaga mbwenye kamarihile>.
31<<Naari mwene baani, oni adhowaga owana koddo ni mwene mmohiya, vowambeela ahikaraati oobuwela akala ni anyakoddo aaye macikwi kumi (10.000) onowaakwaniha owanana mwene ole onadha ni anyakoddo macikwi makumi meenddi (20.000)? 32Akala kanaakwaniha onomuruma oomwiimelela alobe mukalelo wa murenddele, mwene mmohiya agali woolapelawene. 33Mowindo mwaatene mwa nyo ohunahiye dhinniiyena kanaakale namasuuza aaga.
34<<Mwiinyu bwapama; ki wakumuwa ninawelihedhena ddi? 35Kunahiddiwana yego, naari okala manyowe, naari vadhuguni; mbwenye onothathiliwa.
<<Winna mabaru owiiwana, eewe>>.
Currently Selected:
Luka 14: tke
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
