Luka 13

Otthwaruwa naari okwa

1Mudhidhi olene, yahikalavo athu amohiwa yamwaaddelile Yesu dha aGalileya, ayene Pilatu yathongiliiye wi epiwe ekuthaga mikutho dha aneenyama wa Mulugu. 2Vano Yesu ahawiirelaga: <<Munoobuwela wi aGalileya ale yaali oothegesesa okwaranya aGalileya amohiwa, mwaha woopiwa ndale? 3Ginowuwaaddelani nyo wi naari! Mbwenye munoodha munoongeye mwaatene ni mukalelo mmohive, mwahitthwaruwa. 4Naari kumi ni atanu ni araaru ale yamoreliwe sanja yootaama ya oSilowami, yaapa: munoobuwela wi yaali oothega okwaranya athu aatene ookala muZheruzalemi? 5Ginowuwaaddelani nyo wi naari! Mbwenye munoodha munoongeye mwaatene mooligana ni aliwa, mwahitthwaruwa>>.

Musibe wa namutaambwi oohuvaha

6Yesu aheenjedhedhave, owoga musibe ola: <<Muthu mmohiwa ahikanna namutaambwi#13.6 Naari wi: namutaambu. aaye amudhaliliiye mmiddani mwa mithanko, ahidha wi ahapemo dhoovaha dha namutaambwi mwemule, mbwenye kaafwanyilemo. 7Vano ahimwaaddela namalaba, wiira: <Vihivira yaaka thaaru, gidhaaga osayela dhoovaha dha namutaambwi munamutambwinimo gihimfwanyagamo. Omukakatthe! Onanoongela ddi theya ahivahaga?>

8<<Namalaba ahaakulaga, wiira: <Nabwiyani, mwihiye yaaka emohi ofiyedha gitibe mowaapeeleliha gihele manyowe. 9Wavaha dhoovaha yaaka elena sapama, mbwenye akala kunavahe munoodha mukakatthe> >>.

Mwihiyana mmohi ayilihiwe nlabo na sabuddu

10Nlabo nimohi na sabuddu Yesu aasuuzihaga athu mu nyuba ya matugumano. 11Mwemule mwahikala mwihiyana mmohi, anna muneba wabure, wambulelihe yaaka kumi ni yaaka tanu ni thaaru. Mutana waaye waali wookoromana kaanda wiinuuwa. 12Vano Yesu agamoonile, ahimwiithanaga omwiirela: <<Mwihiyana we, ohutapuliwa oredda wanniiwena>>. 13Ahimuhelaga madada, oliye mowaaguva ahogoowaga, omutamaalaga Mulugu.

14Mpogo a nyuba ya matugumano ahitakaleliwaga vowi Yesu ahiyiliha nlabo na sabuddu, ahawaaddelaga aatene yaaligi vevale, wiira: <<Ehikalawo malabo matanu ni nimohi oolaba, mudheege muyilihiwe malabo ayene, mbwenye sabuddu naari>>.

15Mbwenye Yesu ahimwaakulaga, eeraga: <<Nyo muli anamanyengetha! Kalivo muthu onatapula ng'ombe yaaye naari buuru aaye nlabo na sabuddu, ayana wi dhang'we mahinje? 16Ki mwihiyana ola oli mwaana a Abarahamu, Sathana ammagiliiye yaaka kumi ni tanu ni yaaka thaaru. Kafwaneelele otapuliwa oredda wanniiyena nlabo na sabuddu?>>

17Vano Yesu agawogile nda amwiiddani aaye yahikannaga manyazo, mbwenye athu aatene vevale yahidhiveliwaga ni dhego dhootikiniha dheeriiyena nde.

Musibe wa kogolo ya mpeza ni emela

(Matewuzhi 13.31-35; Maruku 4.30-34)

18Mooharela Yesu ahiiraga: <<Omwene wa Mulugu onaligana ni ddi? Ginafwanafwanihe ni ddi? 19Onaligana ni kogolo ya mpeza, eyene muthu yathukuliiye akuthela mmiddani mwaaye. Omela okala muthanko mulubale, balame dha odhulu odha omagamo dhitunji mmijinddani mwiwa>>.

20Ahiiragave: <<Ginafwanafwanihe ni ddi Omwene wa Mulugu? 21Onaligana ni emela mwihiyana yathukuliiye ataganyihedha ni malanta maraaru a saambale, ofiyedha onyakuwa naatenene>>.

Musiwo woopurana

(Matewuzhi 7.13-14)

22Voolenddoni waaye, woodhowa oZheruzalemi Yesu oweedda mmaluwani ni mmiruddani asuuzihaga. 23Muthu mmohiwa ahimukohaga, wiira: <<Nabwiyani, enavuluwa booyeva?>> 24Mbwenye Yesu ahimwaakula, wiira: <<Wiilibihedheni wi mvolowe musiwo woopurana. Ginowuwaaddelani wi ajinji enodha esayelege ovolowa mbwenye kidha yaakwaniha ovolowa. 25Adha avenya mwiinya a nyuba afuga omulago, vano nyo munodha mwiimele ode mukokothege esewo ni owoga, mwiiraga: <Nabwiya, nithuleleni hiyo>.

<<Oliye onodha owaakuleni, eeraga: <Kaguunonileni, muli awuuvi nyo?>

26<<Vevo munodha mwambeele owoga, mwiiraga: <Hiyo nooja, noong'wa ni nyo teto muhusuuziha mundila dha owanuhu>.

27<<Oliye onodha owiireleni: <Kaguunonileni muli awuuvi. Venyavoni vameentoni vaaga, mwaatene owiira dhabure!>

28<<Vevo munoodha muundde ni owurawura meeno vomoona Abarahamu, Ezaaki, Yakobo ni anamavuhulela aatene muuMweneni wa Mulugu, mbwenye nyo munodha mutukumedhiwe ode. 29Athu ajinji enodha edheelege omadheelo wa nduwa ni omadhowelo wa nduwa ni omadheelo wa pevo ya kasekase ni omadhowelo, ekale vamajelo muuMweneni wa Mulugu. 30Mowindo, ehikalawo oogomihedha enaakale owambeela teto ehikalawo owambeela enaakale oogomihedha>>.

Okubanyedha dhoovuhuleliwa mwaha wa Zheruzalemi

(Matewuzhi 23.37-39)

31Mudhidhi mmohive yahidhaaga aFarizi omwaaddela Yesu, wiira: <<Venyawoni wuno mwaha wi Heroddi onafuna oopeni>>.

32Oliye ahawaakulaga, wiira: <<Mudhowe mwamwaaddele kwaddwe oyo: <Peeno ni menselo ginakumiha mineba dhabure ni oyiliha dhiredda, nlabo na neethaaru ginomariha mabasa aaga. 33Mbwenye enofuneya geedde olenddo waaga peeno ni menselo ni muroddo mwaha wi kadhinarumeedheya namavuhulela akwele ode wa Zheruzalemi!>

34<<Zheruzalemi, Zheruzalemi we, onaapa anamavuhulela waavonyaga ni mabwe ale enarumihedhiwiiwe, aa! Dila ngaasi gifunaga waatugumanya anaawo wona mwanaku onaatugumanya anaaye mmompeloni mwaaye, we ohufunaga! 35Vuruwanani, nyuba yeenyu ela enoodha esadduwe nddebe. Miyo ebaribareene ginowuwaaddelani wi kamudha mugoona ofiyedha mwiire: <Ooreelihiwa di ole onadha mu ndina na Nabwiya>#13.35 Masaalimu 118.26.>>.

Currently Selected:

Luka 13: tke

Highlight

Copy