Luka 12

Yesu onowawaaddela ni waalibiha anamasuuza aaye

1Mudhidhi olene yahitugumanaga athu macikwi ni macikwi, ofiyedha onyingalanaga mmohi ni mmohiya. Yesu ahambeelaga wawaaddela anamasuuza aaye, wiira: <<Pole-pole ni emela ya aFarizi weewa oli oleketha. 2Kayiivo yookuneeleya ehinaadhe yooneya; naari yoologohiwa ehinaadhe enoneya. 3Mwaha wi dhaatedhene dhinawogeliinyu wiipipini dhinovuweya mutaneene; dhinawogeliinyu vati-vati mba, dhinoodha dhilaleyiwe vathaddo.

4<<Vano nyo akwaaga ginowuwaaddelani: Muhawoovege ale enapa mwiili, mbwenye osogolo kinaanda wiirana yego emohiwa. 5Mbwenye miyo ginowuwaaddelani wi oofwaneelela omoova; mmoovege Mulugu, onapa, akalana owodha woovokedha omunddoni woohuthima. Ee: Mmoovege oliyeene, baahi. 6Mwiiwe. Anamandwi atanu kinagulihiwa korowa#12.6 Korowa ndha dhaali korowa dha gwingwi dhing'onong'ono dhafuneya vang'onove, dheeriwa asesi. biili? Vano dhiyevileve Mulugu kanamuddiwaala naari mmohi. 7Ofiyedha ni mathitheene a mmuruni mweenyu maatene eheelengiwa. Muhoove, nyo muli oofuneyesesa waakwaranya anamandwi ajinji.

8<<Miyo ginowuwaaddelani wi olene onagirumeedha vameentoni va athu teto miyo, Mwaana a Muthu, ginodha gimurumeedhe vameentoni va angero a Mulugu. 9Mbwenye ole onagikoodde vameentoni va athu miyo ginodha gimukoodde vameentoni va angero a Mulugu. 10Aatene alene enagaaba miyo, Mwaana a Muthu, enoleveleliwa, mbwenye wa ale enanyemula Muneba Woweela, kidha eleveleliwa.

11<<Mwathukuliwaga munyuba dha matugumano dha aZhudewu, mudhowiwagana omathongiwelo ni anamathonga muladdu, muhukubanyege wi munaakule havi, naari munawoge havi. 12Mwaha wi mudhidhi oyene Muneba Woweela onowusuuzihani yowaakula>>.

Musibe wa mureeli oolodhowa

13Muthu mmohi vaari va anamwinji ahiiraga: <<Namasuuziha, mmwaaddele ddibilaaga wi agigawelewo mureelelo wa babiihu>>.

14Mbwenye Yesu ahimwaakulaga, wiira: <<Mulobwana we, ogisakule okala namathonga naari namagawela a dhoohala dheenyu baani?>> 15Vano ahawiirelaga aatene yaaligi vevale: <<Pole-pole murabele ogonjihiwa nrima mwa dhaatedhene, vowi egumi ya ebaribari ya muthu kinahiddeeleya ni mwaha wa dhooreela, naari dhinjiveve>>.

16Vano ahaawogela musibe, wiira: <<Ahikalawo muthu ooreela, mudda dhaaye dhahivaha dhooja dhijinji. 17Nuwindo, wambeela wuubuwelelaga mmurimani mwaaye yeeka, eeraga: <Giire havi? Vowi kaginna voohela dhilo#12.17 Dhilo Naari wi: milimo. dhaaga dhi>.

18<<Aheenjedhave, wiira: <Giire ayi, gibwanyule dhiringwi dhaaga, gimage dhiringwi dhimohi dhuulubale wi gihaddelemo dhilo dhaaga ni dhookalana dhaaga. 19Gamala giyiirele miyo meenka: <<We ohukalana dhooreela dhijinji dhoologoleleya, dhowaakwana yaaka dhijinjidhene; ovume, oje, ong'we, ohagalale!>> >

20<<Mbwenye Mulugu omwiirela: <We oolodhowa! Mahiyu alena onowaakiwa egumi yaawo, ki dhego dhuugeliliiwe dhinakale dhawani?>

21<<Nda dhinompadduwela ole oneyuugelela dhooreela yeeka, kahuwo ooreela ni Mulugu>>.

Dhoosanyeyela dha egumi

(Matewuzhi 6.25-34)

22Yesu ahiwoga ni anamasuuza aaye, wiira: <<Mwa ela ginowuwaaddelani: Kamukale oosanyeyela egumi yeenyu, mwiiraga: <Nnaaje ddi? Nnaware ddi?> 23Vowi egumi sili yoofuneya ohiyana ni yooja, mwiili onokwaranya yoowara. 24Mwawoone anakugu kinadhala, kinahadda, naari kinakanna eringwi naari matata, Mulugu onowaavaha dhooja; nyo muli oofuneya okwaranya balame! 25Kalivo muthu akathamiheyaga, onaakwanihe weenjedhedha nlabo nimohi na egumi yaaye. 26Vano akala kamunaakwaniha wiirana yego eng'onong'ono munakalela ddi oosanyeyela dhimohidha? 27Moone monnuwelo a todo dha mukokolani. Kadhinalaba, naari kadhinaluwa. Ginowuwaaddelani wi naari mwene Salomawu munthithimihoni naaye naatenene, kaafiyedhe owara oligana ni todo dha mukokolani. 28Ki akala Mulugu onowaawariha manasi a mukokolani, eliwo peenove, omenseloni wiwa evokedhiwa vamunddoni, kanoowariheni nyo athu ooyeva nroromelo? 29Muheeddege moosanyeya, muubuwelelaga wi: <Nnaaje ddi? Nnaang'we ddi?> 30Vowi athu a elabo ya vati ehinamuroromela Mulugu, binasanyeyelesesa dhego dhedhi. Mbwenye nyo, Babiinyu ohunona wi munorabulela dhedhi. 31Vowambeela mwa dhaatedhene, musayele Omwene wa Mulugu, vano dhimohi dhiwa muneere weenjedhedhiwa.

32<<Kamoove nyo, nikwedda ning'onong'ono na mabila, vowi Babiinyu ohudhiveliwa wuuvahani Omwene waaye. 33Gulihani dhaatedhene dhinniinyuna korowadha mwaavahe oorabula. Mwiisayelele mathumba a korowa ehinataleya ni mudhidhi mudhuugelele, dhooreela dheenyu dhoohumala odhulu. Vowi wule owiiya kinafiyawo, naari oswa kunaanda okwenya. 34Vowi vevo vinaakale dhooreela dheenyu teto murima weenyu onakale vevo.

Wiimelela wi olabe

35<<Mukalege owiimageene mmwiinuni mweenyu, panti dheenyu dhoohiddadhene. 36Vano nyo mukale oofwanafwana ni athu enamujejihedha nabwiya eewa okuma omathangani a matelo, adhaaga oliye akokotha enomfugulela mowaaguva. 37Oreelihiwa baalene amwiimeleli enafwanyiwe yiing'anelaga nabwiya adhaaga. Ebaribareene ginowuwaaddelani wi onodha aakaraatihe vameeza, nabwiyinyeene mwiinya aagawelege dhooja. 38Akala onaafiye vaari ni vaari va mahiyu, naari njijiji na omaselo, aafwanya ehigonile ooreelihiwa enaakale amwiimeleli alene. 39Teto munone nda: Mwiinya a vaade ahaanonege mudhidhi onadha mbava, eerege wiing'anela kaahiyege nyuba yaaye okupuliwa. 40Vano nyo mwiisasanyedhe, vowi miyo, Mwaana a Muthu, ginadha mudhidhi ohunoobuweleliinyu>>.

41Peduru ahimukohaga, wiira: <<Nabwiya, musibe ola munaniwogela hiyo, naari athu aatene?>>

42Nabwiya ahiiraga: <<Musadoro oororomeleya, oowaraala baani? Ole omuthomile nabwiye okala pogo ookwaranya amwiimeleli akwaaye wi aagawelege dhooja mudhidhiya waakwana? 43Ooreelihiwa di mwiimeleli oyene nabwiye adhaaga onamfwanyiiye eeragana ndo. 44Ebaribareene ginowuwaaddelani wi nabwiye onomwiira musadoro a dhookalana dhaaye dhaatedhene. 45Mbwenye mwiimeleli ole onoobuwelela mmurimani mwaaye, eera: <Nabwiya onoseliwa kanadhawo>, ambeela waaddwadha amwiimeleliya anaahiyana ni anaalobwana, vano ajaga ang'waga, alezelaga. 46Nabwiya a mwiimeleli ole onoodha nlabo nihinajejihiiye naari wora ehinoniliiye. Oneere omooniha goyi vajinji, amudhowihe mburo mmohive ni athu oohuroromela.

47<<Mwiimeleli ole ononile efunelo ya nabwiya aaye, ahivirihamo efunelo ya nabwiya aaye, onowoonihiwa goyi vajinji yoowaxuliwa. 48Mwiimeleli ole ohunonile dhinafuna nabwiya aaye, aviriganiha goyi yaaye enakala vang'ono. Ovahiwe dhijinji onokohiwa dhijinji, ohiyedhiwe dhootthabwa onolobiwa dhootthabwa>>.

Yesu kadhiilena murenddele mbwenye wiiddaniha

49Vano Yesu ahiiraga: <<Miyo gidheele ovoka munddo mwiilaboni, gahifuna ogahiddile! 50Enofuneya wi gaakele obathizo wa goyi, murima waaga kukaraateye ofiyedha wi dhiireye! 51Munoobuwelela wi gidhiilena murenddele elabo ya vati? Naari, moohiyaniha, ginowuwaaddelani wi gidheele omwalaniha. 52Wambeela dhiinova odhowa osogolo, athu atanu a nyuba emohive eneerege ofiyedha omwalana. Araaru ewanege ni abiili, abiili ewanege ni araaru. 53Baabi oneerege omwalana ni mwaanaye-mulobwana, mwaana-mulobwana oneerege omwalana ni ababe, mmeenya oneerege owana ni mwaanaye-mwihiyana, mwaana-mwihiyana oneerege owana ni amaaye, nzala oneerege owana ni nzaliye, vano nzaliye oneerege owana ni nzala>>.

Dhitoonyihedho dha mudhidhi

54Yesu ahawiirelaga anamwinji: <<Moonaga murabo dhidheelaga onadhowela nduwa, muni: <Muzongwe onoodha>, nda wiireya. 55Vano yoobaga pevo ya kasekase munowiira: <Oneere okala oviha>, nda wiireya. 56Nyo muli anamanyengetha! Muhunona otapulela mukalelo wa elabo ni odhulu. Muhunonele ddi otapulela mukalelo wa mudhidhi ola wa dhiinova?

57<<Ki mwa nyo weekiinyu muhunaandela ddi onona eli yapama? 58Akala mwiiddani aawo onowuudhowana omuthegoni, osayele wiiwanana mmarihe muladduya mundila wi dhinaapadduwe oothukulele wa namathonga, namathonga oodhowena wa namafugela, namafugela oofugele mukaambura. 59Miyo ginowuwaaddelani wi kunaanda okumamo ohulivile korowa yoogomihedha>>.

Currently Selected:

Luka 12: tke

Highlight

Copy