Luka 11

Yesu onosuuziha olobela

(Matewuzhi 6.5-15; 7.7-12)

1Nlabo nimohi Yesu egi olobela mburo mmoheene. Agamarihile, namasuuza mmohi ahimulobaga, wiira: <<Nabwiyani, munisuuzihe olobela wona Zhuwawu asuuzihile anamasuuza aaye>>.

2Vano oliye waasuuziha, wiira: <<Mwaalobelaga mwiirege:

<Baba weehu, ndina neenyu noweela nthithimihiwe.

Omwene weenyu odhe.#11.2 Dhoolebiwa ni madada dhijinji dhini: Omwene weenyu odhe. Okwela weenyu wiireyege vati vano wona odhulu. Mbwenye anamasuuza ajinji enoobuwela wi Okwela weenyu wiireyege vati vano wona odhulu madhu ala kiyalebiwe ni Luka.

3 Munivahe yooja yeehu yowaakwana nlabo ni nlabo.

4 Munilevelele dhoothega dheehu,

wona hiyo nnaalevelela aatene enanthegela.

Kamurumeedhele#11.4 EGerego: Kamunihiye wi nimorele moweehiwani. wi nimorele moweehiwani> >>. # 11.4 Dhoolebiwa ni madada dhijinji dhini: Kamurumeedhele wi nimorele moweehiwani, mbwenye munivulumuse wa Nambure. Mbwenye anamasuuza ajinji enoobuwela wi mbwenye munivulumuse wa Nambure madhu ala kiyalebiwe ni Luka.

5Yesu ahawaaddelagave: <<Moofwanafwaniha muthu mmohi a mwa nyoovo akalana mukwaaye, adhowa amusayelaga vaari ni vaari va mahiyu amwiirela: <Mukwaaga, gibolihe mikaathe miraaru, 6vowi mukwaaga a voolenddoni difiyile vaade vaaga, oogisayela, vano kaginna yoomvaha>.

7<<Vano mukwaayeya ola aakulaga mba-mba eeraga: <Kuginyagule, musiwo boofugeene, anaaga ni miyoya nihikonaanti. Kaginaakwaniha ovenya wi guuvahe enalobiiwe>. 8Yesu ahiwoga, wiira: Ginowaaddelani wi oliye kaafuna wi avenye amvahe mikaathe, vano ahivenya omvaha dhaatedhene dhafuniiye, kamvahelege wi di mukwaaye, mbwenye mwaha wa ntidi.

9<<Mwa ela ginowuwaaddelani wi lobani, munovahiwa; sayelani, munofwanya; kokothani, muneere othuleliwa. 10Vowi aatene enaloba enovahiwa, onasayela onofwanya, musiwo onofuguleliwa wa oyene onakokotha.

11<<Baba baani mwa nyoovo oni mwaanaye amuloba#11.11 Dhoolebiwa dhijinji dhinoweenjedhedha madhu ala, owi: amuloba mukaathe oneere omvaha nibwe. Mbwenye anamasuuza ajinji enoobuwela wi madhu ala kiyalebiwe ni Luka. somba, vamburoni va amvaha nyowa? 12Naari amuloba nzayi, onomvaha walize? 13Ki nyo mugalive abure, munonile waavaha dhego dhapama aniinyu. Kaahi ebaribari wi Babiinyu a odhulu oli apama, kanaavahe mookwaranya Muneba Woweela ale enamuloba?>>

Osumeliwa wa Yesu

(Matewuzhi 12.22-32; Maruku 3.20-30)

14Nlabo nimohi Yesu eegaraga muneba wootakala woohuwoga. Muneba wootakala ogakumilemo, muliba ohuwoga oowogaga, anamwinji yootikinaga. 15Vaari va aliwa amohi yowiiraga: <<Kopolo dhinakumihiiyena mineba dhootakala, dhinadheela wa Belezebu,#11.15 Belezebu thi ndina nnavahiwa Sathana, oli musogoleli a mineba dhootakala. pogo a mineba dhootakala>>. 16Amohiwa yoofunaga omweeha, yoomulobaga etoonyihedho yootikiniha yookumela odhulu.

17Mbwenye Yesu aganonile dhowuubuwela dheewa, ahawiirelaga: <<Omwene oli waatene wagawaneya mwa wooka onobwanyuwa, emudhi yagawaneya murala ni murala dhinotoongwa. 18Akala Sathana onogawaneya mwa yeeka, omwene waaye onalibe addi? Giwogele nda mwaha wa nyoovo muneera wi gineegara mineba dhootakala ni Belezebu. 19Akala miyo gineegara mineba dhootakala mwa Belezebu, ki anamasuuza#11.19 EGerego: ahima. eenyu eneegara ni ddi? Mowinda aliwa enodha yuuthongeni. 20Mbwenye akala miyo gineegara mineba dhootakala ni kopolo dha Mulugu, ebaribareene Omwene wa Mulugu ohufiya.

21<<Muthu a kopolo winna dhowiyiing'anelana eng'anelaga vaade vaaye, dhookalana dhaaye dhinakala dhoohiddeeleya pama. 22Mbwenye adhavo mmohiwa a kopolo dhijinji dhoomukwaranya oliye, amugonjiha, onomwaaka dhookalana dhaaye dhaatedhene dharoromeliiye, onogawagawa dhooreela dhanniiyena.

23<<Muthu ohuneewanana ni miyo dinavaanyihana ni miyo, olene ohunagikamihedha otugumana ni miyo onoomwadha.

24<<Muneba wabure wakuma mwa muthu, onoweeddeedda mwiiddeddereni osayelaga voovuma, waahifwanya, onowiyiirela: <Ginawelela vaade vaaga, vevale vakumiliimi>. 25Vano afiya onafwanya moozheliwa mwene moosasanyedha mwene. 26Eendo onodhowa othukula mineba dhimohi mitanu namiinddi dhoomukwaranya ole, ovolowamo okalaga mwemule. Vano mukalelo woogomihedha wa muthu ole onokala wootthabwa okwaranya mukalelo wowambeela>>.

27Vano dhahipadduwa, Yesu awaaddelaga dhego nda; mwihiyana mmohi a anamwinji ahikuwaga ni ndhu nootaama, wiira: <<Ooreelihiwa di mwihiyana wuubalileni ni mabele yawamwiinyu>>.

28Mbwenye Yesu ahiiraga: <<Moohiyaniha, ootthabwa oreelihiwa baale eneewa madhu a Mulugu ni waalogolela>>.

Etoonyihedho ya Zhonasi

(Matewuzhi 12.38-42)

29Vowi anamwinji yootugumanaga, Yesu ahambeelaga wawaaddela, wiira: <<Ola bu mulogo wabure! Aliwa enaloba etoonyihedho yootikiniha, kinaavahiwe etoonyihedho emohiwa, ehili ya namavuhulela Zhonasi. 30Mowinda wona Zhonasi aali etoonyihedho ya akadda Ninive, Mwaana a Muthu teto onaakale etoonyihedho ya mulogo olena. 31Nlabo noothongiwa wa athu mwene a mwihiyana a omadheelo wa pevo ya kasekase onodha eemele athonge akone mulogo olena, vowi ahidha okumela ogomele elabo wi eewe tthottho dha Salomawu. Moone oli vameentoni veenyu ohumukwaranya Salomawu. 32Teto athu oNinive enodha yiimele ethonge mulogo ola ni waakona; vowi aliwa ehitthwaruwa vowiiwa olaleya wa Zhonasi. Moone, oli vameentoni veenyu ohumukwaranya Zhonasi>>.

Panti ya mwiili

(Matewuzhi 6.22-23)

33<<Kalivo muthu onahiddiha panti alogoha wowiipiteya naari vati va mpika, eehi. Mbwenye, onahela vowooneyela wi enavolowegemo yoonege waara. 34Panti ya mwiili bi meento. Meento aawo yakala apama, mwiili waawo waatene onakala wowaara. Mbwenye yahikala apama, mwiili waawo onakala wa yiihi. 35Osugwe pama, waara oli mmwiilini mwaawo ohukale yiihi. 36Akala mwiili waawo waatene oli wowaara, wahikalena yiihi kukuru emohi, onokala wowaara wona panti yamoneyelaga vaari va we>>.

Yesu onokona onyengetha wa aFarizi ni anamasuuziha a Malamulo

(Matewuzhi 23.1-36; Maruku 12.38-40)

37Yesu agamalile owoga, mFarizi mmohi ahimwiithanaga wi yaje vamohi, vano Yesu ahivolowaga, okaraati vameeza, 38mbwenye mFarizi ahitikinaga, agamoonile wi Yesu onaja ahihabilemo.

39Vano Nabwiya wiira: <<Nyo, aFarizi munahuwa ode wa kopo ni wa muziwo, mbwenye muwari mweenyu muhudhaala dhowaaka ni dhabure. 40Oolodhowa nyo! Ole osasanyile ode kahuwo mmohive osasanyile muwarimwa? 41Mbwenye vowambeela mvahe dha mahala wa arabuli ni murima waatene vano dhaatedhene dhinaakale dhoweelihiwa wa nyo.

42<<Mbwenye muneere woona nyo, aFarizi, vowi munoveleela ya neekumi ya mataakuru oonukwela ni bewu dhoowomiha dhooja dhaatedhene, mbwenye kamunapwatha wogoowa ni odhivela wa Mulugu. Soofuneya mwiiregena nda.

43<<Nyo aFarizi, muneere woona vowi munadhiveliwa okaraatela dhittengu dhowambeela mu nyuba dha matugumano, munadhiveliwa malojelo anriiho mburo dhowooneya.

44<<Nyo aFarizi, muneere woona munaligana ni masiye ehinooneya, athu eneedda vadhuluva ehinonaga yego>>.

45Namasuuziha a Malamulo mmohi ahimwaakulaga, wiira: <<Namasuuziha, mwawogaga nda, munoninyemula ni hiyeene teto>>.

46Vano Yesu, wiira: <<Muneere woona nyoovo teto, anamasuuziha a Malamulo munaathukuliha athu sapo dhoonyemela dhoorusa waakwaniha aliwa, dhedho nyo muhunaandiinyu nivang'onong'ono okahinya ni embuno yeenyu.

47<<Muneere woona nyo, munamaga pama masiye a anamavuhulela ayene yapiwe ni makolo eenyu. 48Nda dhinooniha wi munorumeedhela mabasa a makolo eenyu. Vowi aliwa yahaapa anamavuhulela. Vano nyo munamaga masiyeya. 49Mwa ela tthottho dha Mulugu wiire: <Ginodha gaarumihedhele anamavuhulela ni arumiwi, aliwa enodha yaape, amohiwa mwaathamagihege>. 50Vowindo athu a mudhidhi ola enodha ekalena muladdu mwaha wa mwazi wa anamavuhulela aatene, yaapiliinyu wambeela omapaddusiwelo wa elabo: 51Mwazi wa Abeli ofiyedha mwazi wa Zakariya, apeliwe vaari va mburo wa mukutho ni nyuba ya Mulugu. Ee, ginowuwaaddelani wi athu a mudhidhi ola enodha ekohiwe.

52<<Muneere woona nyo, anamasuuziha a Malamulo, mumvenyihilevo cavi oothulana tthottho dha ononelamo dha Mulugu. Nyo kamvolowilemo nyooka mwaathiyelele ale yafuna wi evolowege!>>

53Yesu avenyaga vevale, anamasuuziha a Malamulo ni aFarizi yahambeelaga omusanya valubalevene ni omukoha dhoohiyana-hiyana. 54Ni efunelo yoomuwaga muwano wi emmagihe.

Currently Selected:

Luka 11: tke

Highlight

Copy