Wambeela 26

Ezaaki ni Rabeka oGerari

1Yahidha dala mwiilaboni wona mwa malabo alene a Abarahamu. Ezaaki ahithawela oGerari, elabo ya aFilisti, wewo waali mwene Abimileki. 2Nabwiya ahooneyelaga wa Ezaaki, wiira: <<Ohudhowe wEgubuddu, omage elabo eyene gineeriimi guutoonyihedhe. 3Okale elabo elena. Miyo ginakalege ni we, ginowuureeliha. Ginowuuvaha dhilabo dhedhi vamohi ni anaawo, gaakwanihelaga olibela wewo geeriliimina ni ababo Abarahamu.

4<<Ginoodha guuvahe anamabaliwelamo ajinji wona ttendderi dha odhulu. Ginoodha gaavahe aliwa dhilabo dhaatedhene. Malogo maatene a elabo ya vati enoodha ereelihiwe mwa anamabaliwelamo aawo 5mwaha wi Abarahamu oogiiwelela, oohariha dhaatedhene dhamurumiimi: malamulo aaga, magano aaga ni masuuziho aaga>>.#26.5 Mulugu ahimwaaddela Ezaaki wi mwaha wowiiwelela Abarahamu Ezaaki eere waakele mareeliho. Mulugu ahimulibiha Ezaaki wi teto eewelelege. Verisikulu yooharela nihoona wi Ezaaki ahiiwa pama muselu wa Mulugu vano wiiwelela nlamulo: <<Ohudhowewo wEgubuddu>>. Hiyo teto aatene enofuneya wi nimwiiwelelege Mulugu.

6Ndala Ezaaki ahikala oGerari. 7Alobwana a elabo ele yahimukohaga dha mwihiyanaaye, oliye ahawaakulaga wi aali murogoriye, oovaga opiwa wi ehale ni Rabeka vowi ahitthabwa oriya.

8Vigavirile mudhidhi mwijinji, nlabo nimohi Abimileki, mwene a aFilisti, agali vazhaneelani, ahimoonaga Ezaaki aaredhaga ni mwihiyanaaye Rabeka. 9Abimileki ahimwiithanaga Ezaaki, omukoha, wiira: <<Ebaribari ole di mwihiyanaawo! Wawogela ddi wiiraga di murogoraga?>> Ezaaki ahaakulaga, wiira: <<Goova opiwa mwaha wa oliye>>. 10Abimileki ahimuwogagana, wiira: <<Oniireliiwe ddi? Mmohi a hiyo ahaararuwe ni mwihiyanaawo we wafuna omuthegihe>>. 11Abimileki ahaalamulaga athu aaye aatene, wiira: <<Oyene oneere amukahinye mulobwana ola naari mwihiyanaaye onoodha apiwe!>>#26.7-11 Ezaaki kaarathe, amuroromelege Mulugu wi amukamihedhe. Eerilena yoothega emohive wona dheerile Abarahamu muniivuru Wambeela 20. Ahiratha mwaha wowoova. Kamuroromele Mulugu wi amukamihedhe. Ahima eehu enahara dhifwanafwaniho dheehu wona muneeddeliihu mwiilaboni ela, wona Ezaaki aharile efwanafwaniho yabure ya babe. Ki we? Oli efwanafwaniho ya pama ya anaawo?

12Yaaka elene, Ezaaki ahilimawo mudda ahihadda dhooja dhijinji; ebaribareene Nabwiya ahimureeliha. 13Ezaaki oovira areelagave, ahikanna dhooreela dhijinji. 14Ahikalana mabila ni ng'ombe dhijinji vamohi ni anamalaba ajinji. AFilisti yoomukalela nrima. 15Mowindala yahivuhelela maceela ayene anamalaba a ababe Abarahamu yaatibiliiwa wale.

16Abimileki ahiwogaga ni Ezaaki, wiira: <<Okwaranyemo mwiilaboni mu, ohutthabwa oreelawa onikwaranya hiyo>>. 17Ezaaki ahivenyamo, odhowa omaga seresere ya nddiba na oGerari, okalaga wewo. 18Vevale Ezaaki ahivuhula maceela alene ababe Abarahamu yaatibiliiwa, ayene aFilisti yaavuheleliiwa Abarahamu agakwile. Ahithwa mandina eewa maceela ale ayene yathwiwe mudhidhi wa Abarahamu. 19Nddiba ndde anamalaba a Ezaaki yahitiba ceela emohi omfwanya needduuddu. 20Mowindo, amakambuzi a mabila a oGerari yookangana ni amakambuzi a mabila a Ezaaki, yeera mahinje ale beewa. Ezaaki ahithwa ndina na ceela ele Eseki#26.20 Eseki enatapulela okangana. vowi egali vaceelani vevale yahambeelaga okangana. 21Nuwindo anamalaba a Ezaaki yahitiba ceela emohi; amakambuzi a mabila a oGerari teto yookanganela. Vevale Ezaaki ahithwa ceela ele Sitina.#26.21 Sitina enatapulela wiiddana.

22Ezaaki ahitamavo vevale, otiba ceela emohi, eyene yahatatamulile muladdu. Ezaaki ahithwa ndina na Rehoboti,#26.22 Rehoboti enatapulela mburo woorambalala. wiira: <<Nabwiya ohunivaha mburo wowiithaala, nnoodha ninjivemo>>.

Waandana woopanganela wa Ezaaki ni Abimileki oBerexeba

23Agavenyile vevale agele oBerexeba. 24Mahiyu alene Nabwiya ahooneyelaga wa Ezaaki, wiira:

<<Miyo gili Mulugu a ababo Abarahamu.

Ohoove, miyo gili ni we.

Va mwaha wa namalaba aaga Abarahamu,

ginowuureeliha ni wuuvaha anamabaliwelamo ajinji>>.

25Ezaaki ahisasanyaga vevale ebuwa ya mukutho wa Nabwiya, olobelaga mu ndina naaye vevale. Ahimagavo musasa waaye, anamalaba aaye wambeela otibavo ceela.

26Nlabo nimohi Abimileki ahivenyaga oGerari ni mukamihedhi aaye, Awuzati, vamohi ni Fikoli, musogoleli aaye a anyakoddo, wi yagumane ni Ezaaki. 27Vevale Ezaaki ahaakohaga, wiira: <<Mwadheela ddi, nyo muhugifunaga? Kahuwo nyeene mugiigarile elabo yeenyu?>> 28Aliwa yahimwaakulaga, wiira: <<Sowi nihoona wi Nabwiya oli ni we, nuhuubuwelela wi yaali yapama ogumana ni we. Nnofuna osasanya waandana woopanganela ni we. 29Olibele ohuniirele yootakala wona hiyo nuhuwiireliihu, nowuukameela pama, nuupaganya ni murenddele. Dhiinova oli muthu ooreelihiwa ni Nabwiya>>.

30Ezaaki ahaasasanyedhelaga mathanga, oja, ong'wa.#26.30 Omusasanyedha mathanga waali mukalelo wowooniha wi ohurumeedha yowuubuwela yeewa. Oja vamohi waali mukalelo wowiirihedha nipangano vaari va aliwa. 31Omenseloni wiwa bebeheene, yahilibelelaga waandana woopanganela mmohi ni mukwaaye. Ezaaki ahaapaganyaga, ovenya vevale mmurenddeleni.#26.26-31 Akala amwiiddani eehu enonaaddamela efunaga murenddele ni hiyo, soofuneya wi nirumeedhele yowuubuwela ni odhivela wa Mulugu. Dhigumi dheehu dhootikiniha dhinofwaneelela dhawiithanege athu, naari amwiiddani eehu.

32Nlabo nendde anamalaba a Ezaaki yahimwaaddelaga wi ehimala ceela ele, aliwa wiira: <<Nihaafwanya mahinje>>. 33Ezaaki ahithwa ndina na ceela ele Xeba.#26.33 Xeba mu ewogelo ya eHeberi enatapulela olibela. Berexeba enatapulela ceela yoolibela. Moone Wambeela 21.3. Mwaha wa ela nluwa ndde ofiyedha peeno nneethaniwa Berexeba.

34Esawu aganna yaaka makumi mannayi, ahimutela Zhuditi, mwaana a muHeti eethaniwa Beeri, teto ahimutela Basemati, mwaana a muHeti mmohi eethaniwa Eloni. 35Mukalelo wa ahiyana ala wowaarusa Ezaaki ni Rabeka.#26.35 Soofuneya nixixege okala mwa murenddele ni amooya eehu!

Currently Selected:

Wambeela 26: tke

Highlight

Copy