Matei 15

Sar sas o sikiarimos katar le purane

1Atunči le Farizianuri ai le zakonaria avile anda o Jerusalem paša o Jesus, ai phenen: 2Sostar tjire vortača šinen von so kerenas le phure? Ke von či xalaven penge vast, kana von žian te xan.

3Vo del le palpale: Ai tume, sostar šinen tume le poronki le Devleske te keren sar si tumaro zakono? 4Ke o Del phendias: De pativ tjire dades ai tjiria da; ai, kudo kai dela armaia peske dades vai peska da avela dino strafo te merel. 5Numa tume, tume phenen: Kudo kai phenel peske dadeske vai peska dake: E partia muře mištimaski kai me šai dav tumen si thodini rigate le Devleske, 6či mai trubul t'ažutil peske dades vai peska da. Tume kadia len tele e vorba le Devleski te keren sar si tumaro zakono. 7Athaitoria, o Esai mišto phendias pe tumende, kana vo phendias:

8Kado narodo del ma pativ pa le vušt.

Numa lesko ilo dur lo mandar.

9Intaino von den ma pativ,

kai sikiaren zakonuri kai si poronki katar le manuš.

Le dieli kai keren te avel mahrime o manuš

10Akhardias vo peste o narodo, vo phenel leske: Ašunen, ai hatiaren. 11Nai so den ande o mui ke mahril le manušes; numa sogodi anklel anda lesko mui, kudo mahril le manušes.

12Atunči leske vortača pašile paša leste, ai phenen leske: Žianes tu ke le Farizianuri xoliaile katar le vorbi kai von ašunde?

13Vo del palpale: Sako kopači kai či thodias te bariol muřo dad avela ankaladi avri. 14Muken le; von si koře kai ningeren kavre kořen, t'avela ke jekh kořo ningerel jekhe kavre kořes, von perena vi le dui ande jekh groapa.

15O Petri, lias e vorba, phenel leske: Phen amenge so si kudia paramiči.

16Ai o Jesus phenel: Vi tume, vi akana či mai san godiaver? 17Či hatiardian tume ke sogodi xan žial ande le pořa, porme musai t'anklel avri? 18Numa so anklel anda o mui avel anda o ilo, ai kudo si kai mahril le manušes. 19Ke si anda o ilo ke aven le nasul ginduri, le mudarimata, le kurvimata, le lažaimata, le čorimata, le xoxaimata ai le pupuimata. 20Eta le dieli kai mahrin le manušes; numa te xas bi te xalaves le vast, či mahril le manušes.

E žiuvli streino patial pe ande o Jesus

21O Jesus, gelotar kothar, gelo ande e phuv e Tira ai o Sidon. 22Ai eta, jekh žiuvli anda o Kanan, kai avelas anda kudia rig, tsipil pe leste: T'avel tuke mila mandar, Baria, Šiav katar o David! muři šei si pria but mardi katar o demono.

23Vo či dias la palpale či jekh vorba ai leske vortača pašile ai phenen leske zorasa: Trade la, ke voi tsipil pala amende.

24Vo del palpale: Me sim tradino ferdi pala le bakroře xasarde katar o kher anda o Israel.

25Numa voi avili te del čanga angla leste, phenelas: Baria, ažutisar ma!

26Vo del palpale: Nai mišto te len o manřo katar le šiavoře, ai te šiuden les ka le tsinoře žiukel.

27Ei, Baria, phenel voi, numa le tsinoře žiukel xan le kotorořa kai peren pa e skafidi lenge birevongi.

28Atunči o Jesus phenel lake: Žiuvlio, tjiro patiamos si baro; t'avel tuke sar tu kames.

Ai, ande kudo časo, laki šei sastili.

O Jesus sastiarel bute nasvalen

29O Jesus gelotar anda kudo than ai avilo paša e maria anda e Galilea. Anklisto pe o plai, vo bešel tele. 30Atunči pašilias paša leste jekh baro narodo, sas lensa bange, koře, mutsi, langane, ai but aver nasvale. Thode le ka leske punře ai vo sastiardias len; 31kadia ke o narodo sas lenge drago ke dikhen ke le mutsi den duma, ke le langane sas saste, ke le bange phiren, ke le koře dikhen ai o narodo vestil le Devles anda o Israel.

O Jesus pravarel štar mii ženen

32O Jesus, akhardias peske vortakon, phenel: Mange si but mila anda kado narodo; ke eta trin dies kai von si paša mande, ai von či xale khanči. Me či kamav te tradav le bokhale, daratar ke či mai avela le zor pe e vurma. 33Le vortača phende leske: Sar šai lasa ame ande kado than pusto dosta te pravaras jekh kasavo baro narodo?

34O Jesus pušel lendar: Sode si tumen manře?

Efta, den von palpale, ai uni tsinoře maše.

35Atunči vo thodias te bešel o narodo pe e phuv, 36lias le efta manře ai le maše, řudjisardias, phaglias le ai dias le ka peske vortača te den le ka o narodo. 37Sa xale ai pravardile, ai andine efta košnitsi pherde kotora kai ašile. 38Kudala kai xale sas štar mii manuš, bi t'aven gjinde le žiuvlia ai le šiavoře. 39Atunči, vo tradias o narodo, anklisto ande o čuno, ai gelo ande e rig o Magadan.

Currently Selected:

Matei 15: KALD

Highlight

Copy