Ruth 2
2
Ruth Savaktuq Nauriaqaġviŋiññi Boaz-gum
1Naomi iḷaqaġniqsuq atiqaqtuamik Boaz-mik, umialgumaruq suli iñuich naalaġnisuumagaat, nanmiñiq iḷagimagaa Naomi-m tuvaaqataata Elimelech-gum. 2#Lv 19.9, 10; Dt 24.19.Uvlut iḷaŋanni Ruth-gum uqallautiniġaa Naomi, “Nauriaqaġvigmuglaŋa pukugiaġluŋa palauvaksranik unisaŋiññik pukuktuat. Iḷisimaruŋa imma iḷaŋata savaktit suginiaŋitchugnaġaat pukukkuma.” Naomi-m kiugaa, “Kiami, paniiŋ.”
3Tavraasii Ruth nauriaqaġvigmuŋaruq aasii pisuagaqsivḷuni aquatigun savaktuat, pukukłuni palauvaksranik tamauŋa uniñŋaraŋiññik. Tavra nauriaqaġviŋani Boaz-gum pukuksimaruq.
4Aaqagulimman Boaz tikiññiqsuq Bethlehem-miñ aasii paġlavlugi savaktini. “Atanġum itqatigilisi!” uqallaktuq. “Atanġum quviasaaġlisin!” iliŋisa kiugaat.
5Boaz-gum apiġigaa savaktuat qaukłiat, “Kiñaamna taavamna niviaqsiaq?”
6Aŋutim kiugaa, “Allaniñ nunaninŋaqtaq, Moab-miñ qairuaq, Naomi piqatigivlugu. 7Apiġiraani maliġiyumiñaġmagaaġmi aquatigun pukuktuat pukugukhuni palauvaksranik. Uvlaatchauraq isagutiŋaruaq, uvva akkupak nutqaqpaalluktuq piḷaiŋaiqsiaqsaqłuni taġġisimaaġvigmi.”
8Boaz-gum uqallautigaa Ruth, “Ikayuutiksramik uqallautillaglakpiñ. Allani pukugnak palauvaksranik uuma nauriaqaġvium avataagun. Maani aġnat savaqasiqsaġitin; 9qiñiġlugich sumi pukugmagaisa aasii itqasiġḷugich. Piraksriŋagitka savaktitka aŋutit piyuaquŋił̣ł̣utin. Aasiisuli imiġuliġuvich imiġiaqtuqsaqtutin qattaniñ iliŋisa immiŋaraŋiññiñ.”
10Ruth puttuq kiiñamiñik aksikł̣ugu nuna, aasii uqallakhuni Boaz-mun, “Summan uvva isumaalugiviŋa? Summan uvva nakuugutiviŋa uvaŋa allamiñ nunaniŋŋaqtauruaŋaa?”
11Boaz-gum kiugaa, “Tusaaŋagitka iluqaisa piŋaratin aakaruaġnun tuvaaqatin qaŋa tuqumman. Iḷisimaruŋa uniñŋagikkiñ aapallu aakallu nanmiñiġlu anniviiñ nuna aasii tamauŋa nuułłutin avataannun iñuich naluraqpich sivuani. 12Atanġumtuq akiḷiusiaksriḷḷisin piŋarakkun. Atanġum God-iŋata Israel naamaruamik akiḷiusiaqaqtillisin, ullaŋagapku ilaa qaunagitquvlutin!”
13Ruth-gum kiugaa, “Aŋalalluatiġiŋma, aŋuun. Tutqiksipkaġiŋma uqautilluataqłuŋa, uvvaluuvvaa nalliummatiŋitkaluaqtilluŋa kivgaġnun.”
14Niġiñaqsimman Boaz-gum uqallautigaa Ruth, “Qaiḷutin punniqtuġiñ kiñisaaġutin.” Tavraasii aquptaaqasiŋagaich savaktit aasii Boaz-gum aitchuŋagaa iliktitanik palauvaksranik. Niġiŋaruq siḷvilġataqhuni, aasiisuli iḷakuqaŋammiuq. 15-16Aullaanigman pukugiaqhuni palauvaksranik, Boaz-gum piraksriiŋagaich savaktini, “Pukuktitchiuŋ palauvaksranik qiḷiqsruŋaruat unnii inaanniñ, uqallautinasiuŋ sumik nutqaqtitchaġlugu. Aasiisuli nuqitchiḷusi palauvaksranik qiḷiqsruŋaruaniñ pukuaksraŋiññik.”
17Tavraasii Ruth pukuŋaruq palauvaksranik unnuksraaġataqtillugu, aasii ivsulaanikkamigi iḷitchuġiruq pukuktilaamiñik uqumaisigiruanik iñuiññaq tallimatun (25). 18Aggisiŋagaich pukuani aasii tautuktiłługich aakaruamiñun. Qaił̣ł̣ugiḷḷu niġigami iḷakuni. 19Naomi-m apiġigaa, “Sumi pukukpigich ukua palauvaksrat uvlupak? Kia nauriaqaġviani savakpich? God-imtuq ikayuġliuŋ aŋun iliŋnik ikayuiruaq!”
Ruth-gum uqallautigaa Naomi savagnivḷuni nauriaqaġviani aŋutim atiqaqtuam Boaz-mik.
20 #
Lv 25.25. “Atanġum quviasaaġliuŋ Boaz!” Naomi uqallaktuq nipatuvluni. “Atanġum piiguyuitkai unniqsuqłiiŋakami iñuuruanullu tuquŋaruanullu.” Uqallavsaaqtuq, “Taamna aŋun nanmiñiq iḷagigikpuk, iḷauruq tamatkunuŋa qaunaksriksrautigiraptignun.”
21Ruth uqallaktuq, “Uvva nakuuniqsraŋa, uqallautiraani pukukkumiñaġnivḷuŋa savaktimiñi naatchiḷġataqtillugich pukuamignik.”
22Naomi-m uqallautigaa Ruth, “Aaŋ, paniiŋ, iluałhaaġniaqtuq pukukkuvich aġnani savaktuani Boaz-gum nauriaqaġviŋiññi. Piyuaqpiaġaatin pukugiaġuvich allam nauriaqaġviŋanun.” 23Tavraasii Ruth-gum savaqasiŋagaich pukukhuni palauvagnik naatchiḷġataqtillugi palauvagniglu palauvaksraniglu. Tavra iñuuniaqatigiŋagaasuli aakaruani.
Currently Selected:
Ruth 2: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)