Philippians 4
4
Iḷisaurrutit
1Aniqatiitkaa, taamna pisigilugu asiñuutipkaqsaiḷipiaġitchi tamatkunaŋŋa iḷisaurrutiniñ Atanġum iñuusiġitqukkaŋiñiñ ilivsiññun. Piqpagnapiaqtusi uvamnun suli tautugulipiaġataġivsi. Ukpiqtuaġuġniqsi pisigivlugu quviasugniaqtuŋa akiḷiusiaqaġluŋalu qiḷaŋmi. 2Apiġigiptik Euodia Syntyche-lu atisitquvlutik aniqatigiisun iḷiḷutik atausiŋŋuqatigiŋakaptitku Ataniq. 3Aasii apiġimmigikpiñ iḷumun savaqatiiŋ, ikayuquvlugik taapkuak aġnak, qanuq siġġaqivlutik savaqatigiiŋaruk ikayuqłuŋa tusaayugaaġiksuaq siaminman, piqatigivluguptauq Clement allallu savaqatitka, atiŋich ittuat makpiġaaŋiñi God-im iñuuruatigun.
4Atanġum quviasuusiġḷisi ataramik. Uqallautigivsaaġiga, quviasugitchi. 5Iñupayaat piavsaurraŋaiġḷugich. Ataniq qaiyasiruq. 6Uŋiarrisigiŋaiġḷugich supayaat aglaan supayaat aŋaiyyutigiguvsigik apiġilugu God pigiraksraġikkavsiññik, ataramik quyyavigilugu. 7Tainna piguvsi piginiaġiksi God-im tutqiksirrutaa kaŋiqsianikkumiñaisaktakkaqsi. Ilaan tutqiutiqaqtinmasi suuramikunnii uŋiarrisiqaġniaŋitchusi, qanuq atausiŋŋuqatigiŋagiksi Christ Jesus.
8Aqulliq uqallautiksraġa tuyuutimni uvva aniqatiitkaa, isumagituiññaqsigik taŋŋiqsimaaġuglugich sut nakuuruat nanġausiaqaġnaġumiñaqtuallu, ami sut iḷumun ittuat, nakuuniqsrauruat, nalaunŋaruat, piḷuutaitchuat, iviġaumanaqtuat, uqautikkusiaqaġluataġnaqtuallu. 9Iñuusiġisigik sut iḷisasi akuqtukkasiḷu uvaŋa uqalumniñ iñuusimñiḷḷu. Aasii God-im tutqiutiqaqtitchiruam uvaptiŋnik nayuġniaġaasi.
Quyanaaġutit Aitchuutitigun
10Qanutun quyatchaktigiruŋa suli qanutun nanġaqtigigiga Ataniq pisigivlugu ikayutqiksalgiññavsiŋa. Iḷisimaruŋa ataramik tuyuġumasuugaluaqtilaavsiññik ikayuutiksravsiññik piyumiñaqsiraġikavsi, aglaan piviksraisiqtuŋavlusi tuyulaiñŋarusi. 11Taamna uqallausiġiŋitkiga pisigilugu piiḷḷiuġniġa qanuq iḷitchiŋaruŋa apaigiyumiñaqsiŋavlugu pigikkaġa. 12Iḷisimaruŋa qanuqitilaaŋanik piiḷḷiuqtuni, iḷisimammiuŋa-suli qanuqitilaaŋanik iḷaŋaniiqsuni. Uumiŋa iḷitchiŋaruŋa, sumipayaaq qanutchimun tikiutigaluaqama niqaiḷḷisaaŋiññama naagga kaaksiugaluaqama, piiḷḷisaaŋitkaluaqama naagga piiḷḷiuliġaluaqama qanuqpallayuitchuŋa. 13Suaŋŋatiqaqtuŋa manimmiyumiñaqługu qanusiḷimaaq nalautaksraq suaŋŋatigivlugu Christ suaŋŋasiutaa uvamnun.
14Aasiivsauq nagliktauŋammiusi piqataukavsi iłuiḷḷiuġutimni. 15Ilivsi Philippi-ġmiut iḷisimarusi, alġaqsruisugaaqama tusaayugaaġiksuanik aullaqłuŋa Macedonia-miñ, nalliataunnii aŋaiyyuliqiruat ikayuŋaitkaanŋa aitchuiḷutiŋ aglaan ilivsi kisivsi. 16#Ac 17.1.#2 Co 11.9.Thessalonica-miitilluŋa tuyuŋarusi uvamnun ikayuutinik malġuiqsuaqłusi. 17Aitchuusiaqaqsiññaġuŋitkaluaġmiuŋa, aglaan akiḷiusiaqallasitqummigivsi taimanigu pisigilugu nagliktuiñiqsi uvamnik. 18#Ex 29.18.Paŋmapak piqaqtuŋa iluqaiññik pigiraksraġikkamnik, sippaksraqaqtuŋaunnii, aitchuusiaqaqłuŋa iḷaŋaniñ aitchuutivsiññik tuyuutigikkavsiññik Epaphroditus qaimman. Tamatkua tivraġiksuatun ikipkautitun aitchuutauruatun God-mun ittut, akuqtuġnaġumiñaqłutiŋ iviġaumanaqłutiglu ilaanun. 19Aasiiḷi God-igikkaġma piqaqtinniaġaasi iluqapayauraŋiññik pigiraksraġikkavsiññik inuaŋaitchuanik quviasaaġusianik qiḷaŋmiñ, pisigilugu atausiŋŋuqatauŋaniqsi Christ Jesus-mun. 20God-ikput Aapalu nanġaqtauli isuitchuamun. Amen.
Paġlasuiqsaaġutit
21Paġlagivut iluqaisa Christ Jesus ilaaguaqtaŋi God-mun. Aniqatiit nayuutiruat uvamnun paġlagaasi. 22Iluqaġmiŋ ukpiqtuat paġlagaasi, paġlałhamaaġaasi umialgum Caesar-m igluqatiŋisa. 23Ataniq Jesus Christ naglikkutiqpaqaġli ilivsiññun.
Currently Selected:
Philippians 4: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
