Obadiah 1
1
1Uvva kiliktuutaa Obadiah-m, Kamanaqtuam Atanġum uqallautaagun nunaqpauruaq Edom pisigivlugu.
Atanġum Tatavsaġniaġaa Edom
Atanġum tiliŋagaa kiliktuiri nunauruanun,
aasii tusaaŋagikput kiliktuutaa:
“Itqanaiyaġitchi! Aŋuyagiaġlakput nunaqpaŋa Edom!”
2Atanġum uqallautigaa nunaqpaŋa Edom,
“Qapaŋasipkaġniaġikpiñ;
iñupayaat suuŋiḷaġiliġñiaġaatin.
3Kamanniraaġutikpich sagluqipkaġaatin.
Annaummiviqaqtutin aulayaitchuamik uyaġagmi;
qutchiksuami iġġimi aimaaġviqaqtutin,
tavraasii uqallakhutin iliŋnun inna,
‘Kia nuqitchumiñaqpaŋa anmun?’
4Aimaaġviḷiuġaluaqtutin
qutchiksivḷugu tiŋmiaqpaich ugluŋisitun,
iḷivlugulu akunġanniittuatun uvluġiat,
aglaan nuqitchumiñaġikpiñ anmun.
5“Tigligayuktit qaigamik unnuami,
tigliguurut pisuktamignik kisian.
Iñuich pukukkamik grape-nik siiġñanik
unitchił̣auraġuurut.
Aglaan akiḷḷiivich suksraiġutipiaŋagaatin.
6Kiŋuniiguruasii Esau-mun, piqpagnaqtuat suġauttasi tigligaŋagaich.
7Ikayuqtikkaluavsi sagluqiŋagaasi;
nunavsiññiñ aninŋagaasi.
Iḷauraaġiŋagaluaqtavsi akiiḷiŋagaasi.
Avilaitqatikkaluavsi niġiqatikaavsi pitqiksiġautiŋagaasi;
innaqtut ilikkun, ‘Immaimña nauŋ pisaasuġniq pigisuuŋaraa?’
8“Uvlumi tatavsaġupku nanaqpaŋa Edom,
suksraunġiġñiaġitka pisaasuqtuat iñuŋi
suli isumattutaiġḷugi.
9Aŋuyaktiŋich Teman tatamaalaniaqtut,
suli iluqaġmik aŋuyaktiŋich Edom tuqutauniaqtut.
Patchisauruat Edom Tatavsaqtaumman
10“Tigligaikavsigiḷḷu tuquġaqavsigiḷḷu
nanmiñiq iḷasi, kiŋuvaaguruat Jacob-mun,
tuqutauniaqtusi suli suksraunġiqsaulusi isuitchuamun.
11Igḷiqsaaqsiññaŋarutin taimani uvlumi
akiḷḷiiŋisa upkuaqpaiyaqtaġmatigik.
Piḷuktigiŋarutin maaniġmiuguŋitchuatun
aullaurriruatun Jerusalem umialgutiŋiññik
aasii autaaqługich avanmun.
12Kamanniraaŋitchin imma
aŋalamaqłuktauniŋatigun nanmiñiq iḷakpich Judah-miittuat.
Quyyatigiŋirruŋ imma
uvluq suksraunġiqsauviat.
Iglautigiŋaitkich imma
nagliksaaqtitaummata.
13Iñugiraġma nunaŋanuktuksrauŋiñŋagaluaqtutin
kamasaaġvigiyyaġlugich nagliksaaqtuat
suli suġauttaiyaġiaġlugich umialgutiŋiññik
tavrani uvlumi nagliksaaġmipkaqługich.
14 #
Is 34.5-17; 63.1-6; Jr 49.7-22; Ez 25.12-14; 35.1-15; Am 1.11, 12; Ml 1.2-5. Kayyaagni makitaruksrauŋiñŋagaluaqtutin
sapisuglugich qimaaruat.
Tigupkaqtuksraġiŋaiñŋagaluaġitin akiḷḷiiŋiññun
tavrani uvlumi nagliksaaġvianni.
God-im Isivġiġñiaġai Nunaqpauruat
15“Uvluq qalliruq Uvaŋa Atanġuruaŋaa,
isivġiiviksraġa nunauruapayaanik.
Edom-miuguruasii, savaaġiŋaratin
savaaguniaġmiut iliŋnun.
Utiġviginiaġaatin savaaġiŋaraqpich.
16Iñugiraġma akuqtuaġiŋagaat tatavsaun
salumaruami uvaŋa qimiqqamni.
Aglaan avativsiññiittuat nunaqpaich akuqtuaġiniaġaat tatavsaun imiġmatun
qakkiññałhaaqtuamik imaligmik qallunmik;
iluqaan akuqtuaġiniaġaat aasii suksraunġiqsaulutik taimuŋa.
Akimaniŋa Israel-gum
17“Aglaan Iġġiani Zion iḷaŋich annagniaqtut,
aasii taamna salumaruaguniaqtuq ini.
Iñuŋisa Jacob pigiliutiniaġaat
nanmiñiq nunaktiŋ.
18Iñuŋich Jacob-guvlu Joseph-guvlu igniqtun iḷiñiaqtut;
suksraunġiġñiaġaich iñuŋich Esau-m
igniqtun suksraunġiqsiruatun.
Kiŋuniġupayaaqtuaq Esau-mun annagniaŋitchuq.
Uvaŋa, Atanġuruaŋaa, uqallaktuŋa.
19“Iñuich samanitchiani Judah-m ittuat iññiġñiaġaat Edom;
avanitchianiittualli salliñġanni iġġich nunannaktaaġiniaġaat Philistia.
Israel-miugurualli piññaktaaġiniaġaik nunaŋik Ephraim-guvlu Samaria-vlu;
iñuŋisali Benjamin-gum piññaktaaġiniaġaat Gilead.
20Anitauŋaruat iñuich paanitchianiñ Israel
utiġniaqtut aasii pisaġilugu Phoenicia takpauŋaaglaan Zarephath-mun.
Anitauŋammiruat Jerusalem-miñ Sardis-miittuat
pisaġiniaġaich inauruat samanitchiani Judah-m.
21Akimaruat iñuŋich Jerusalem-miut
akiiḷiñiaġaich Edom iñuŋich aasii atanniqsuliġḷugi.
Aasii ilaa Ataniq umialguniaqtuq.”
Currently Selected:
Obadiah 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
