Luke 13
13
Isumalitqiŋisuaġuvsi Suksraunġiġñiaqtusi
1Jesus uqaġataviksillugu iñuich tavraniinŋarut. Iḷaŋisa uqallautiŋagaat Jesus Galilee-ġmiutigun Pilate tuqunŋaraŋigun aitchuipkaqtillugich ikipkautinik God-mun, auŋich iḷḷativlugich niġrutit auŋiññun. 2Tavra ilaan kiuŋagai, Isumavisi taapkua Galilee-ġmiut piḷułhaaġasugalugich iluqaiññiñ Galilee-ġmiuniñ, tainna tuqutaummata? 3Naumi, aglaalli uqallautigivsi, ilivsi isumalitqiŋisuaġuvsi iluqasi, tainnatun suksraunġiġñiaġmiusi. 4Qanuqtauq aasii taipkua 18-guruat kattaqikkaŋi nasiqsruġviata Siloam tuqułługich, Isummatigivisigik piḷułhaaqłutiŋ tuqutaunasugalugich iluqaiññiñ iñuuruaniñ Jerusalem-mi? 5Naumi. Uqallautigivsi, ilivsivsauq isumalitqiŋisuaġuvsi iluqasi, tainnatun suksraunġiġñiaġmiusi.
Uuktuun Siiġñiḷaitchuakun Fig-nik Napaaqtuq
6Tavra Jesus quliaqtuaġutiŋagai uumiŋa uuktuunmik sivuniġivlugu uqautigianikkani. Iñuk fig napaaqtuanik nautchirriŋaruq siiġñaqaġviŋmiñun, aasii qaivḷuni ivaqłiavigiŋagaa siiġñanik aasii paqinŋaitchuq. 7Tavra ilaan uqallautiŋagaa napaaqtumik qaunaksri, Uvva, piŋasuni ukiuni ullaguugaluaġiga ivaqłiavluŋa siiġñanik mattumaŋŋa fig napaaqtuaniñ, aasii paqilaitchuŋa. Kippuuŋ. Summan nunaiġutchautauniaqpa? 8Tavra qaunaksrim napaaqtunik kiuŋagaa, Aŋuun, iḷaksianagu ukiivsaallagli. Nivaŋniaqtuŋa avataagun aasii iḷḷiqilugu nagguksautinik. 9Aasii siiġñikpan ukiutqigu piḷḷuataġniaqtuq, aglaan siiġñiŋiḷgitpan, kipiyumiñaġniaġiñ.
Jesus Iłuaqsigaa Qilluutituqtuaq Aġnaq Savaisillugich
10Tavra iḷaŋanni Jew-guruat savaiññiŋata Jesus iḷisaurriŋaruq aŋaiyyuviŋmi. 11Tavra tavraniinŋaruq aġnaq ilitqusiqł̣uqaqtuaq naŋititchiruamik ilaanik 18 ukiuni. Taamna aġnaq isivilaiñŋaniqsuq tainnatun sivisutigiruamik. 12Tavra Jesus tautukamiuŋ aġnaq, ququaŋagaa aasii uqallautivlugu, Aġnaaq, atanġiqsitaurutin naŋirrutiŋniñ. 13Tavra Jesus aksiŋagaa aġnaq, aasii tavrauvvaa isivvaġiksiŋaruq, suli nanġaŋagaa God. 14#Ex 20.9, 10; Dt 5.13, 14.Tavrali umialiŋnaŋa aŋaiyyuvium, piavsaŋaruq pisigivlugu Jesus iłuaqsiriñiŋa Jew-guruat savaiññiŋanni. Tavra ilaan uqallautiŋagai iñuich, Itchaksrat uvlut ittut savagviksravut, qairaġutitchi taapkunani uvluni iłuaqsirauyaqtuġlusi, savaiññiġum uvluŋiḷaaŋiñi. 15Tavra Atanġum kiuŋagaa, Ilivsi ukpiŋŋuaqtuasii, atausiullaavlusi savaitchuani pituiqł̣ugich qimuktisi naagga kakaktisi niġrutiqaġviŋmiñ tasikuaqługich imiqtitchaqtuġuugisi savaitchuani. 16Aasiiḷivsauq una aġnaq, Abraham kiŋuniŋa, Satan-gum nagliksaaqtinŋaraŋa 18 ukiuni, atanġiqsitaksrauŋitpa nagliksaaqtitauniŋaniñ savaitchuani? 17Taamna uqallausiġimmagu iluqaġmiŋ akiḷḷiḷiqsuqtiŋi kanŋutchaŋarut aasiiḷi iñuich iluqaġmiŋ quviasukpaŋarut pisigivlugich iluqaisa quvianaqtuat sut ilaan savaaġiŋaraŋi.
Uuktuun Nautchiaksrakun Atiqaqtuaq Mustard-mik
(Matthew 13.31-32; Mark 4.30-32)
18Tavra Jesus uqallautiŋagai, Sutun itpa God-im atanniqsimmataa iñuŋnun? Sumik uuktuusiġñiaqpigu nausaiññaġniŋa? 19Arriqaqtuq mustard-mik nautchiaksramik mikiniqsrapiaġataŋannik nautchiaksrat. Nunaliqirim nautchirriutigaa nunamiñun, kanġaqsruutigivlugu nautchiaqaġviŋmiñun, aasii nauŋaruq napaaqtuqpaġuqłuni, aasii tiŋmiat ugluliuqłutiŋ qisiqsiutiŋiñun.
Uuktuun Imaksrakun
(Matthew 13.33)
20Suli Jesus uqallatqiŋaruq, Sutun itpa God-im atanniqsimmataata nausaiññaġniŋa? 21Arriqaqtuq imaksratun aġnam akutaŋatun palauvaŋmun. Imaksram puvlaktitkaa iluqaan akutaq.
Niġukitchuaq Isiġiaq
(Matthew 7.13-14, 21-23)
22Jesus iglauŋaruq nunaaqqisigun nunaaqqiuratigullu iḷisaurrivḷuni, suli iglauvluni tuŋaanun Jerusalem. 23Tavra iñuum uqallautiŋagaa, Ataniiq, annaurrauruat iñukitchumaaqpat? Tavra Jesus uqallautiŋagai, 24Isiġniaġniq qiḷaŋmun ittuq isiġniataŋmatun kapittuakun isiġiakun. Isiġniḷupiaġitchi kapittuakun isiġiakun, qanuq uqallautigivsi, iñugiaktuat isiġniaqsaaniaġaluaqtut isiġumiñaiññiaqtut.
25Taimanigu piñiaqtuq iñuktun igluqpiraqtuatun makinniaqtuatun aasii umiglugu upkuaq. Upkuaqpagu makitasaġataġniaqtusi siḷami aasii tigluktuaqsiḷusi upkuamun uqaġlusi, Ataniiq, upkuiġuttutigut. Ilaan kiuniaġaasi, Nalugivsi sumiŋŋaqtuagutilaavsiññik. 26Tavraasii kiuniaġiksi, Niġisuusugaugut imiqłutalu piqatigivlutin, suli iḷisaurrivḷutin nunaaqqivsiŋni. 27#Ps 6.8.Ilaa uqallatqigñiaqtuq, Uqallautigivsi, nalugivsi sumiñ qairuagutilaavsiññik. Aullaġitchi uvamniñ, iluqasi piḷuusiqirit. 28#Mt 22.13; 25.30.#Mt 8.11, 12.Tavrani qianiaqtusi suli tiriqtillugich kigutisi, tautukkuvsiuŋ Abraham Isaac-lu Jacob-lu iluqaisalu uqaqtiŋi God-im atanniqsimaviani God-im, ilivsiḷi siḷamiutaupkaġlusi. 29Suli iñuich qaiñiaqtut nunapayauraniñ aasii aquvitqataulutiŋ niġġiviŋñun God-im atanniqsimaviani. 30#Mt 19.30; 20.16; Mk 10.31.Tavraasii, iḷaŋich aqulliurut paŋmapak isiqqaaġniaqtuat qiḷaŋmun, suli iḷaŋich sivulliurut aqulliuniaqtuat.
Jesus Piviuttaġigaa Jerusalem
(Matthew 23.37-39)
31Taavrumanipiallak ikarraġmi iḷaŋich Pharisees qaiŋarut, aasii uqallautivlugu Jesus, Aullaġiñ maaŋŋa, qanuq amma Herod tuqutchukkaatin. 32Tavra ilaan uqallautiŋagai, Aullaġlusi uqallautiyaqtuqsiuŋ taamamna pisukkaaq, anittaiñiḷuŋa ilitqusiqł̣uŋnik suli iłuaqsiriñiḷuŋa naŋirrutinik uvlupak uvlaakullu, aasii uvluk piŋayuaŋni naallugu savaaġa. 33Iglauruksraupiaqtuŋa Jerusalem-mun uvlupak uvlaakullu uŋaliagullu, qanuq uqaqtaa God-im tuqutauruksrauŋitchuq uniuġlugu Jerusalem.
34Jerusalem-miut. Yaqhii Jerusalem-miuguruasii, tuquġairuasii uqaqtiŋiñik God-im uyaġagniglu miḷḷuuqługich tamatkua God-im tiliraŋi iliŋnun. Qanutun akulaisigilugu katitchumiñaġaluaġaġigivsi iluqasi atautchimun, tiŋmiatun katitchiruatun piayaamiñik isaqquŋmi ataaŋnun, aasii tainna pitqulaitchusi. 35#Ps 118.26.Uvva, iglusi suksraaqtaupiallaŋniaqtut. Aasii uqallautigivsi, taututqikkumiñaitkivsiŋa uqallakkumiñaqsiḷġataġlusi, God-im piḷḷuataqtilliuŋ iñuk qairuaq pisivlugu Ataniq.
Currently Selected:
Luke 13: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
