John 18
18
Jesus Tigurauruq
(Matthew 26.47-56; Mark 14.43-50; Luke 22.47-53)
1Jesus aŋaiyyutigianikamigich taapkua uqaluich, ilaa aullaŋaruq iḷitchitquraniḷu ikaaqługu kuuġuuraq Kidron isiqłutiŋ napaaqtut nauviannun Gethsemane-mun. 2Judas-gum, aitchuutiginniktuam ilaanik, iḷisimaŋammiñiġaa taamna ini, qanuq Jesus akulaitchuami kasimaqatigisuugai iḷitchitqurani tavrani. 3Tavra Judas aullaŋaruq piqasiqł̣uni aŋuyaktinik, suli iḷaŋiññik munaqsrich tilikkaŋiññik aŋaiyyuliqsiqpaich Pharisee-ḷḷu. Tavruŋaŋarut naniġuaqtuqłutiŋ satkuliraqłutiglu. 4Tavra Jesus, iḷisimavluni supayaamik piñiaqtuamik inmiñun, saarvaŋaruq aasii uqallakłuni ilaiññun, Kiña ivaqpisiuŋ? 5Ilaisa kiuŋagaat, Jesus Nazareth-miu. Tavra Jesus uqallautiŋagai, Ilaaguruŋa. Judas, aitchuutiginniktuaq ilaanik, makitaqatauŋaruq ilaiññun.
6Jesus uqallautimmatiŋ ilaagunivḷuni, taluqsratchakłutiŋ utiqqiaŋarut aasii ulġuvlutiŋ nunamun. 7Jesus apiġitqiŋagai, Kiña ivaqpisiuŋ? Ilaisa kiuŋagaat, Jesus Nazareth-miu. 8Jesus kiuŋagai, Uqallautiŋasugaavsi ilaagunivḷuŋa. Tavra ivaġuvsiŋa, ukua iḷitchitquratka aullaġlich. 9Taamna taŋŋiutausalgiññiqsuq uqaluŋnun Jesus uqallausiġiŋaraŋiññun aŋaiyyukami, Taapkunaŋŋa aitchuutiŋniñ uvamnun tammaiŋitchuŋa atautchimik-unnii. 10Tavrani Simon Peter savikpaqaqłuni, amuŋagaa aasii anauvlugu aŋaiyyuliqsiqpaich qaukłiata kivgaŋa, aasii taliqpianik siutaiqł̣ugu. Kivgam atqa Malchus. 11#Mt 26.39; Mk 14.36; Lk 22.42.Jesus uqallautiŋagaa Peter, Iḷḷiuŋ savikpaiñ puuŋanun. Isumavich akuqtuġniaŋiññasugalugu uvamnun nagliksaaġutiqpak Aapama sivunniŋakkaŋa uvamnun?
Annas Apiqsruqtuġaa Jesus
12Tavra aŋuyaktit atanauraŋatalu Jew-guruat munaqsriŋisalu tiguŋagaat Jesus aasii qiḷiqsruivḷugu. 13Aullautiqqaaŋagaat Annas-mun, qanuq aaparuaġimmagu Caiaphas-gum. Taamna Caiaphas aŋaiyyuliqsiqpaich qaukłiat taavrumani ukiumi. 14#Jn 11.49, 50.Caiaphas-gum uqallautiŋagai Jew-guruat anniqsuutaupiaġniaġnivḷugu iñuk atausiq tuqukpan pisilugich iñupayaat.
Peter-m Piiḷaaġigaa Jesus
(Matthew 26.69-70; Mark 14.66-68; Luke 22.55-57)
15Simon Peter-m allavlu iḷitchitquram maliŋagaak Jesus. Iḷitchitquraq taamna iḷisimaŋavlugu aŋaiyyuliqsiqpaich qaukłiata, isiġumiñaŋaruq piqatigivlugu Jesus siḷalliġuaŋanun inaata aŋaiyyuliqsiqpaum. 16Peter qikaŋaruq siḷami paami. Tavra alla iḷitchitquraq, iḷisimakkaŋa aŋaiyyuliqsiqpaich qaukłiata, aniŋaruq aasii uqallautivlugu niviaqsiaq upkurriqiri, itqutiŋagaa Peter. 17Niviaqsiam upkurriqirim apiġiŋagaa Peter, Iḷagiŋitkaluaqpatin uuma iñuum iḷitchitquraŋisa? Ilaa uqallaŋaruq, Iḷagiŋitkaanŋa.
18Tavra kivgat munaqsriḷḷu igniqsuŋarut qanuq qiiyanaqłuni, aasii qikaġniqsut pasiaqłutiŋ. Peter iḷagiŋagaat qikaqłuni pasiaqtuaq.
Aŋaiyyuliqsiqpaich Qaukłiata Apiqsruqtuġaa Jesus
(Matthew 26.59-66; Mark 14.55-64; Luke 22.66-71)
19Tavra aŋaiyyuliqsiqpaich qaukłiata apiqsruqtuŋagaa Jesus iḷitchitquraŋigun iḷisaurrutiŋigullu. 20Jesus kiuŋagaa, Uqaŋaruŋa iñuŋnun salapqiruakun, ataramik iḷisaurrisuuruŋa aŋaiyyuviŋiññiḷu aŋaiyyuvikpaŋmiḷu, iluqaġmiŋ Jew-guruat katirvikaaŋannun. Uqaŋaitchuŋa sumik nalunautchiḷuŋa. 21Summan apiqsruqpiŋa? Apiqsrukkich iñuich naalaġniritka qanuq uqaŋatilaamnik ilaiññun. Iḷisimarut uqautigiŋaramnik. 22Taamna uqallausiġianiŋmagu, iḷaŋata munaqsrich qikaqtuam saniġaani patiŋagaa Jesus uqallakłuni, Tainna kiuraksraġiviuŋ aŋaiyyuliqsiqpaich qaukłiat? 23Jesus kiuŋagaa, Uqaŋaguma killukuaġluŋa, iḷitchuġipkaġuŋ iñuŋnun killukuaġutiga. Aasii nalaulluŋa uqaġuma, summan patikpiŋa? 24Tavra Jesus qiḷiqsruiŋavlugu, Annas-gum aullaqtitkaa Caiaphas-mun aŋaiyyuliqsiqpaich qaukłiannun taavrumani ukiumi.
Peter-m Piiḷaaġivsaaġaa Jesus
(Matthew 26.71-75; Mark 14.69-72; Luke 22.58-62)
25Tavra Simon Peter qikaŋaruq pasiaqłuni. Iñuich iḷaŋisa uqallautiŋagaat, Iḷagiŋitpatin iḷitchitquraŋisa taavruma iñuum? Ilaa piiḷaaŋaruq aasii uqallakłuni, Iḷauŋitchuŋa. 26Iḷaŋata kivgaŋisa aŋaiyyuliqsiqpaich qaukłiata, nanmiñiŋata iñuum Peter-m siutaiŋakkaŋata, apiġiŋagaa, Tautuŋaitpigiñ Jesus piqatigivlugu Gethsemane-mi? 27Peter piiḷaatqiŋaruq. Aasii tavrauvvaa tiŋmiaq nipanŋaruq.
Jesus Apiqsruqtuġaa Pilate-gum
(Matthew 27.1-2, 11-14; Mark 15.1-5; Luke 23.1-5)
28Tavra iñuich aullautiŋagaat Jesus igluqpaŋaniñ Caiaphas isivġiġviŋmun igluqpaŋaniittuamun kavanam. Uvlaatchaurauŋaruq. Jew-guruat isiŋitchut isivġiġviŋmun salumaiḷisuŋił̣ł̣utiŋ niġiḷḷasukłutiŋ Itqaunmi Qulaurrusiqiviŋmun. 29Tavra Pilate anniqiŋagai aasii uqallautivlugich, Sumik pasikkutiqaqpisi uumuuna iñukun? 30Ilaisa kiuŋagaat, Una iñuk pitquranik navguirauŋitpan aitchuutiginayaitkikput iliŋnun. 31Pilate uqallautiŋagai, Pisiuŋ ilivsiññik aasii isivġiġḷugu ilivsi nanmiñiq pitquravsigun. Jew-guruat uqallautiŋagaat, Uvagut tuqutchipkaqtauyumiñaitchugut iñuŋmik pitquraŋisigun Rome-miut. 32#Jn 3.14; 12.32.Taamna taŋŋiutausaŋaniqsuq uqaluŋmun Jesus uqallautaanun qanutchikun tuqqutikun tuquniaqtilaamiñik.
33Pilate isitqiŋaruq isivġiġviŋmun aasii ququaqługu Jesus uqallautivlugu, Ilivich Umialigivatin Jew-guruat? 34Jesus kiuŋagaa, Taamna uqallausiġiviuŋ iliktuġruiññaq, naagga allat uqallautivatin uvapkun? 35Pilate kiuŋagaa, Jew-gunasugiviŋa? Jew-guqativich nanmiñiq aŋaiyyuliqsiqpaiḷḷu qaiñŋagaatin uvamnun. Sumik piŋavich? 36Jesus kiuŋagaa, Umialguŋitchuŋa mattumuŋa nunamun. Umialguguma mattumuŋa nunamun, kivgatka aŋuyakkayaqtut aitchuutautquŋiḷḷuŋa Jew-guruanun. Umialguŋitchuŋa nunam iñuŋiñun. 37Tavra Pilate uqallautiŋagaa, Uvva umialgurutin? Jesus kiuŋagaa, Ilivich uqallaktutin umialgunivḷuŋa. Taamna pisigivlugu aniŋaruŋa. Suli qaiŋaruŋa nunamun quliaqtuaġisukługu iḷumun ittuaq. Iñupayaam ivaqłiaruam iḷumun ittuamik naalaġnigaaŋa. 38Pilate apiġiŋagaa, Suuva iḷumun ittuaq?
Jesus Tuquruksraġuġaat
(Matthew 27.15-31; Mark 15.6-20; Luke 23.13-25)
Taamna uqallausiġiqqaaqługu, anitqiŋaruq Jew-guruanun, aasii uqallautivlugich, Iḷitchuġiruŋa patchisiksraisilaaŋanik. 39Aglaan ilivsi piḷġusiqaqtusi uvaŋa tigutaaqtauŋaiqsitchitquvluŋa iñuŋmik Itqaġviŋmi Qulaurrusiqiviŋmun. Tigutaaqtauŋaiqsitchitquvisiŋa Umialgannik Jew-guruat? 40Iliŋich nipaallatqiŋarut, Ilaaniŋiḷaaq aglaan Barabbas-mik. Barabbas tigligayuktiqpauŋaruq.
Currently Selected:
John 18: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
