Genesis 8
8
Uliqpaŋaiġman
1God-im piiguŋaiññiġaa Noah niġrutipayaallu itqatigiraŋich umiaqpagmi; anuqłiġuqtinŋagaa, aasii imaiġuraaqsaŋaruq. 2Siiqsinniġich suppuqhiaġaqtuat immamik taġiumiñ itiruamiñ nutqaŋarut, upkuaŋich immat qiḷaŋmi umiŋarut, sialukpaŋaiŋaruq, 3aasii imaiqsaiññaŋaruq 150-ñi uvluni. 4Akimiaq malġuanni (17th) uvlut, tallimat malġuanni tatqich, umiaqpak imaiġurrauŋaruq iġġiŋiññun Ararat-mi. 5Imaiqsaiññaŋaruq, aasii sivulligmi uvlumi, quliŋanni tatqich, qiñiġnaqsiŋarut qaaŋich iġġich.
6Malġukipiaq (40) uvlut pianiŋmata Noah-m agmaŋagaa igalauraq, 7aasii aullaqtitchivḷuni tulugamik. Utiqtaŋaruq tulugaq imaiġataqtillugu. 8Tainnaitkaluaqami, Noah aullaqtitchiḷgitchuq tiŋmiamik iḷitchuġisaqłuni imaq anmuktilaaŋa, 9aglaan immam matuŋavlugusuli iluqaan nuna, tiŋmiaq mitchaaġviksraiñŋaruq. Utiŋaruq umiaqpagmun, aasii Noah-m isaaqłuni mitchaaġman argagmiñun itqutiŋagaa umiamun. 10Utaqqivsaaqqaaqłuni tallimat malġugni uvluni aullaqtilgitkaa tiŋmiaq. 11Utiŋaruq anaqammagu kiŋmiaqaqłuni nutaamik olive akutuqpaŋanik. Tavraasii Noah iḷitchuġiruq imaq anmuŋatilaaŋa. 12Tavra utaqqivsaaŋaruq tallimat malġugni uvluni aasii aullaqtivsaalgił̣ł̣ugu tiŋmiaq; tavrani aglaan utitqiŋiñŋaruq.
13Noah 601-tun ukiuniŋman, sivulliġmi uvluani sivullium tatqim, imaiŋaruq. Noah-m matuiyaŋagaa umiaqpak aasii iḷitchuġiŋaruq nuna paliqsaaniktilaaŋanik. 14Iñuiññaq tallimat malġuŋanni (27th) uvluŋisa tugliuruam tatqim nuna iluqani paliumasiŋaruq.
15God-im uqallautigaa Noah, 16“Niusitchi umiaqpagmiñ ilviḷḷu tuvaaqatillu, iġñiġutitillu, tuvaaqatiŋiḷḷu. 17Niuqatigilugich iluqaisa tiŋmiat, niġrutit, paamġuqtuallu nunami, iñugiaksiyumaut aasii siamillutiŋ iluqaanun nunamun.” 18Tavraasii Noah niuŋaruq umiaqpagmiñ tuvaaqatiniḷu, iġñiiniḷu, tuvaaqatiŋiḷḷu. 19Iluqaġmiŋ niġrutit, paamġuqtuat nunami, tiŋmiallu, piayaaŋiḷḷu niuŋarut.
Noah Aitchuutiqaŋaruq
20Noah ikipkaiviḷiuŋaruq Ataniġmun; atausiullaavlugich qanusiḷḷaat salumarualiaguruaniñ niġrutiniñ suli tiŋmianiñ aitchuutiksraŋaruq, aasii ikipkaqługich suġaił̣ł̣ugich aitchuutigivlugich ikipkaivigmi. 21Tipaat aitchuutigiraŋisa iviġaginiġaa Atanġum, aasii ilimiñun uqallaktuq, “Qakuguunnii nuna piaġiiḷipkatkigñiaŋitkiga iñuich piḷġusiŋich pisigilugich; iḷisimaruŋa mikiniġmiŋniñ qaŋa isummatiŋich pigiitchuagurut. Qakuguunnii suksraunġitqigñiaŋitkitka iluqaisa iñuuruaguruat, savausiġiraptun taaptumani. 22Nuna qaŋapak ilgutilaaŋatun, nautchiiviksraqaġniaqtut kivluiviksraqaġlutiglu. Ataramik inniaqtut qiiyanaqtuaġlu uunaqtuaġlu, upinġaaġlu ukiuġlu, aasisuli uvluġlu unnuaġlu.”
Currently Selected:
Genesis 8: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
