Genesis 15
15
God-ivlu Abram-lu Sivunniuġutaak
1Taamna pianiŋman, Abram qiñiqtuuraaŋaruq aasii tusaavlugu Ataniq uqallaktuaq, “Iqsiñak, Abram. Anniyaitkutauniaqtuŋa iliŋnun anayanniuġunmi kamanaqtuamiglu akiḷiusiaksriḷḷutin.”
2Aglaan Abram-gum kiuŋagaa, “Qutchigñiqsrauruatiin Ataniiq, sumun imña akiḷiusiaksraq qaiññiaqtan anniqsuutauniaqpa uvamnun, uvva qitunġaisilluŋa? Kiŋuvaannaktuksratualuk tavra Eliezer, Damascus-miu. 3Aitchuŋaitkigma miqłiqtunik, suli uvva kivgaġma kiŋuvaannaktaaġiniaġmigaich uvaŋa suġallitka.”
4Tavraasii tusaavsaalgitkaa Ataniq uqallaktuaq ilimiñun: “Uuma kivgaġiraqpich Eliezer-m kiŋuvaannaktaaġiniaŋitkaich suġallitin; ilvich nanmiñiq iġñiġiñ kiŋuvaannagniaqtuq.” 5#Ro 4.18; He 11.12.Atanġum annisivlugu uqallautigaa, “Qiviaġuŋ qiḷak aasii kisitchaġaluakkich uvluġiat; tainnatun iñugiaktigiruanik kiŋuvaaqaġniaqtutin.”
6 #
Ro 4.3; Ga 3.6; Jas 2.23. Abram ukpiqsraŋaruq Ataniġmik, tavraasii taamna pisigivlugu Atanġum iviġaumagivlugu akuqtuŋagaa nalaunŋarualiqirauvlugu.
7Tavra Atanġum uqallautigaa, “Uvaŋa Atanġuruŋa, aullatiŋaraqpiñ Ur-miñ Babylonia-miittuamiñ, aitchuġukłutin mattumiŋa nunamik iliŋnun pigitquvlugu.”
8Aglaan Abram-gum apiġigaa, “Qutchigñiqsrauruatiin Ataniiq, qanuġluŋa iḷisimaniaqpik piginiaqtilaaŋanik?”
9Ilaata kiugaa, “Qaġġirriŋŋa immulivigmik, nagruligmik, aŋusallumiglu imnaimik, iluqaisa piŋasunik ukiuqtutilaaqaqtuanik, tiŋmiamiglu, pigeon-miglu.” 10Abram-gum qaġġisiŋagaich niġrutit God-mun, piḷakługich avillaavlugich qitqatigun, aasii akiḷḷiġiiksillaavlugich avvaġiich; aglaan avguŋaitkaik tiŋmiak. 11Tiŋmiat tuquŋaruaqtuqtit niqinukkaluaqtut, aglaan Abram-gum uŋullaqtuŋagaich.
12 #
Job 4.13, 14. Siqiñiq nipiaqsimman, Abram siññaġiksipiaġataqłuni siquniqsuq, aasii iqsiññiuliŋaruq. 13#Ex 1.1-14; Ac 7.6.Atanġum uqallautigaa, “Kiŋuvaaġiniaqtatin tagialaniaqtut nunaŋiḷaamigni; kivgaġiniaġaich, nagliksaaqtitaġiluġiḷḷu 400-ni ukiuni. 14#Ex 12.40, 41; Ac 7.7.Aglaan tatavsaġniaġiga nunaqpak tigutaaqsimaviat, aasii uniññiaġaat umiallaŋalutiŋ. 15Ilvich aglaan iñuuniaqtutin utuqqaliḷġataġlutin, isukłiññiaqtutin tutqigḷutin. 16Kiŋuniġiich sisamaiguruat pianikpata, kiŋuvaatin utiġataġniaqtut mauŋa, qanukkii Amor-miuguruat piḷuksipiaġataqpata kisian tatavsaġnaqsiñiaqtut.”
17Siqiñiq nipianiŋman taaqsimman, puyualaruaq auma puggutami, naniġlu ikualaruaq ayagmi nuiŋaruk aasii akunġatiguaqłutik avguat niġrutit. 18#Ac 7.5.Tavrani tavra Ataniq inillaiŋaruq sivunniuġunmik Abram-mun. Uqallakłuni, “Unniqsuqłiiruŋa aitchuġukługich kiŋuvaatin iluqaanik mattumiŋa nunamik killiŋaniñ Egypt-gum kuukpagmuaglaan atiqaqtuamik Euphrates-mik, 19iḷagilugich nunaŋich Ken-miut, Keniz-miullu, Kadmon-miullu, 20Hit-miullu, Periz-miullu, Rephaim-guruallu, 21Amor-miullu, Canaan-miullu, Girgash-miullu, Jebus-miullu.”
Currently Selected:
Genesis 15: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
