Galatians 6
6
Ikayuutisitchi Avanmun
1Aniqatiit, iñuk piḷuksipkaqtaukpan qanusipayaamik piḷuunmik, ilivsi aŋalatittuasii Ilitqusiġiksuamun utiqtitaksraġigiksi pikałak tautaitchuakun. Qaunagilusi ilivsiññun, iḷaannivsauq ikł̣igutchaktinniaqtauviaġmiusi. 2Ikayuutisitchi avanmun killuqsaqtinniaqtaukavsi. Tainna piguvsi taŋŋiġñiaġisi Christ pitquraŋi ilivsiññun. 3Iñuk kiñaliqaa isumagumi piġuqtiġluni inmiñik, ikayuiyummataiġḷuni piḷuksiruamik, sagluqiruq inmiñik. 4Iñullaa naipiqtuġli inmiñun, aasii nakuuniqpan iñuutchiñi isumakkutigilluataġniaqtuq inmiñik, naipiqtuutiqaŋaiġḷuni iñuum allam piŋaraŋanik. 5Qanuq iñullaa isivġiqsauniaqtuq ilaan nanmiñiq iñuusiġikkaġmigun.
6Iñuk iḷisausiaqaqtuaq God-im uqaluŋiñik, aitchuiyummatiqaqtuksraugaluaqtuq pigikkamiñiñ iḷisaurriruamun. 7Sagluqipkaġnasi, God kipagirauyumiñaitchuq. Nautchialiqiritun kivriruatun qanusiksrapayaanik nautchiaksranik kanġaqsruunmiñik, tainnatun iñuk paaqłiusiaqaġniaqtuq qanutchikun iñuusiġikkaġmigun. 8Qanuq iñuk iñuuruaq pisuġuiqsimaaqtinniaqługu piḷuksisuguuruaq iñuutchiñi, suksraunġiqsauniaqtuq taamna pisigilugu. Aglaan iñuk iñuutuiññaqtuaq Ilitqusiġiksuamun aŋalatiłłuni, iñuuniaqtuq isuitchuamun Ilitqusiġiksuakun. 9Aasii piḷaiġutiŋaiḷḷakput nakuurualiqiniq, qanuq qapiŋitkupta akiññagniaqtugut God-im akiḷiiviksraŋa tikitpan. 10Tavraasii, piviksraqaqtilaaptiktun, nakuurualiqita iñupayaanun, ikayułhamaaġlugich tamatkua ukpiqtuaguruat.
Aqulliich Kiliktuutit Paġlatillu
11Tautuksigik qanutun aŋitigiruat aglaich aglaatka uvamnik ilivsiññun. 12Iñuich tamatkua maliksuktitchiñiaqsaaruat ilivsiññik nalunaiñŋutchiqsautquvlusi Jew-guruatun, iviġaiñiaqsiññaqtut iñuŋnik, nagliksaaqtitausuŋił̣ł̣utiŋ pisigilugu ukpiġniq kisianun Christ tuqqutaanun aŋarraurami annaurriḷḷaruamun. 13Qanuq tamatkua unnii nalunaiñŋutchiqsauŋaruat timimiŋni kamagilaiñmigaich God-im pitquraŋi. Naaggauvva nalunaiñŋutchiqsautqummigaasi, uqavigaaġutigisukłusi ilimiŋnun iḷitchitqurauniḷusi. 14Aglaan uvaŋa uqavigaaġutiqaġuŋipiaqtuŋa supayaamik, aglaatualuk Ataniq Jesus Christ tuquŋaniḷugu aŋarraurami pisigivlugich piḷuutitka. Aasii taamna pisigivlugu, ukpiŋaitchuat piḷġusiŋich tuquŋaruatun iḷiŋarut uvamnun, aasiisuli uvaŋa tuqummatun iliŋiññun. Sivuniqaqtuq taamna, piḷuusiqisuŋaiqsuŋa tavraŋŋaaglaan. 15Qanuq nalliak-unnii nalunaiñŋutchiqsaunġuvlu nalunaiñŋutchiqsauŋiññiġuvlu anniqsuutauŋitchuq, aglaan anniqsuutitualuuruq nutauruamik iñuggusiqsauniq Ilitqusiġiksuakun. 16Aasii iluqaġmiŋ iñuutuiññaqtuat taavrumuuna, God-im iḷumun Israel-ŋi, tutqiutiqaġlich nagliktuunmiglu God-miñ. 17Tavraŋŋaaglaan kialiqaa isumaalluksaaŋaiġḷiŋa, qanuq ikiqaqtuŋa timimni nagliksaaqtitaunipkun pisigivlugu Jesus. 18Nagliktuutiqpaŋata Atanipta Jesus Christ itqatigilisi, aniqatiit. Amen.
Currently Selected:
Galatians 6: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
