2 Timothy 1
1
1Ukua tuyuutit iliŋnun qairut Paul-miñ, Jesus Christ tiliraŋaniñ, qanuq God tainna pitqurimman. Paul tilirauŋaruq quliaqtuaġitquvlugu unniqsuqłiisauŋaruaq iñuggun pigiliutisuukkaqput atausiŋŋuqatigikaptigu Christ Jesus. 2#Ac 16.1.Tuyuutaurut Timothy-mun piqpagivlugu iġñiġimmatun itamnun. God-im Aapauruam Christ Jesus-lu Atanipta iviġaumanautilisin, nagligilisin, tutqiutiqaqtillisillu.
Quyyatillu Qapiŋaisaaġutillu
3Quyyavigigiga God savautikkaġa naġġukkutaitchuakun isumami, isumaqausiatitun maŋŋuuma. Quyyavigigiga ataramik aŋaiyyutimni unnuakkaluami uvlumiḷu, 4itqaqapkulu qulviŋatilaan, kipiġniuqtuŋa tautugukłutin, quviatchakpagukłuŋa. 5#Ac 16.1.Itqaġiga iḷumutuuqtuamik ukpiġutiqaqtilaan, ukpiġutiqausiatun aanavich Lois aakaviḷḷu Eunice. Aasii paŋmapak nalupqisuŋitchuŋa ukpiġutiqaġmiutin. 6Taamna pisigivlugu, itqaqtitchukkikpiñ igliqtitquvlugu God-im aitchuutaa iḷikapkich argatka iliŋnun. 7Qanuq Ilitqusiġiksuam God-im aitchuutaata iqsisaiġaatigut suaŋŋasiŋagaatigullu, piviuttaqqusiqł̣utalu, uvaptiŋniglu aŋalalluataġumiñaqsivḷuta.
8Kanŋutchaktitaunak quliaqtuaġigupku Ataniqput, naaggaunnii uvaŋa tigutaaqtauruaŋaa alġaqsruiñiġa pisigivlugu, aglaan akuqtuġuŋ nagliksaaġniġiñ pisigivlugu tusaayugaaġiksuaq, qanutun God-im suaŋŋasiqsuqpatin. 9God-im annautiŋagaatigut suli ququaqłuta ilaan iñuggusiqł̣uta pisigisuŋaġnagich uvagut savaavut, aglaan pisigivlugu ilaan sivunniutini nagliktuutiqpaniḷu. Ilaa sivunniuŋaruq nuna isagutiŋaiñŋaan nagliktuutikun annautisukłuta Jesus Christ-kun, 10aasii paŋmapak salapqiqł̣ugu niptaġniŋagun Annaurripta Christ Jesus. Christ-gum suksraunġiŋagaa tuqqun aasii qaġġisivlugu iñuggun tuqunaitchuaq tusaayugaaġiksuakun. 11#1 Ti 2.7.God-im piksraqtaaġiŋagaaŋa quliaqtuaġitquvlugu tusaayugaaġiksuaq, tiliraupkaqłuŋa iḷisaurripkaqłuŋalu. 12Aasii taamna pisigivlugu nagliksaaqtuŋa nagliksaaġusivsun. Aglaan kanŋutchaktitauŋitchuŋa, qanuq iḷisimagiga ukpiġvigiŋakkaġa, suli nalupqisuŋitchuŋa ilaan qaunaginiaġaa taamna savaaksrirrutini uvamnun isivġiġvik tikiḷġataqtillugu. 13Ukpiġiŋaiġñagich iḷumun ittuat uqaluich iḷisaurrutitka iliŋnun, maliġuagaksratin iñuuniaġuvich, ukpiġutiqaqtuiññaġlutin piviuttaqqutiqaġlutillu pigikkaptiŋnik atausiŋŋuqatigikaptigu Christ Jesus. 14Qaunagikkich nalaunŋaruat iḷisaurrutit aitchuutauŋaruat iliŋnun ikayuutaagun suaŋŋataata Ilitqusiġiksuam iñuuruam iḷuptiŋni. 15Iḷisimarutin iluqaiññun Asia-miittuanun qimaktilaamnik, iḷagivlugik Phygelus-lu Hermogenes-lu. 16Atanġuptuq nagligiligich igluqatiŋi Onesiphorus, qanuq ilaan akulaitchuami qapiŋaisaaġuugaaŋa. Ilaan kanŋusuutigiŋaitkaaŋa pisigilugu tigutaaqtauniġa, 17aglaan tikipqauraqami Rome-mun ilaan ivaŋagaaŋa, aasii paqiłłuŋa. 18Atanġuptuq nagliktuusiaqaqtilliuŋ Ataniġmiñ isivġiġviŋmi. Iḷisimalluataqtutin qanutun ikayuisilaaŋanik uvamnik Ephesus-mi.
Currently Selected:
2 Timothy 1: INUPIAQ
Highlight
Share
Copy
Want to have your highlights saved across all your devices? Sign up or sign in
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
