Matthew 22
22
Iesu mi eniya ge jimbari bondoda budo sisina.
(Luke 14:15-24)
1Ango edo Iesu mi tekago eniya ge nenei jigamo eite awamanede sisina: 2“Utuda gisijiari awa engo.#22:2 Utuda gisijiari awa engo da moka awa ‘Nongo edo God mi ainda gisijiarida buro aini awa engo.’ Daotari da (1)mi ainda maida jimbari bondo siya esisina. 3Edo daotari ainda buro embobo piesiri idegesitera, embomai bondoda jipara awa taro gumborote, ata awamane gumbari jipapa ae esitera.
4“Edo tekago imo buro embo nenei piesiri idegetero sisina, ‘Avekave bondoda jipana awa tewo gore, “Giwo! Nato bondo siya etena, edo nato wo kao jijianda ae kao mane gavi de awa dedo odedo taietena, edo rorae berari siya etena. Jimbari bondoda gumbuwo.” ’
5“Ata embomai bondoda jipara awa ge gainyae edo awamaneda jipapada maunsitera. Embo da (1) awa ainda ve urari buroda maunsisina, edo nei ainda ganu bari buroda maunsisina. 6Edo embomai bondoda jipara neneimi awa ainda buro embobode memesi neide kainde pisido detero besitera. 7Ata iji ainde daotarimi ge awa ingido imo sinigambari bajinabé esisina. Edo ainda itoro embobo piesiri idegedo maundo dari betari embobo awa dedo usibesi edo awamaneda nasi bajina dungitera.
8“Ango edo imo ainda buro embobo dao tesiri gumbero awamanede sisina, ‘Jimbari bondo awa siya etena, ata embobo jipana, awamaneda tou ari nato yai itae. Awaembo na awamane jipapa ae. 9Awatedo imomane maundo begata bajinada umbugoda pepeta eite embomai berari tamundo awamane jimbuwo bondoda gumbore.’ 10Ango tesiri buro embobo idegedo maundo begata bajinada pepeta eite embo dave de beyae de berari awa tamundo doregesitera. Edo awamane gisijido kundo gundo jimbari bondoda jiumbari yaida torero embomaimi inono esiri yai awa tonga itae esisina.
11“Ata iji ainde daotarimi embo bondoda gumbera awa etega aintedo torido, imo embo da (1) jimbari ombarijiari piae awa gosisina. 12Awatedo ami embo ainde sisina, ‘Otawo, nongo edo jimbari ombarijiari piaede einda toresi?’ Ata embo ami ge da (1) tae esisina.
13“Edo daotarimi buro embobode sisina, ‘Embo eiwa ipa de tai de bundedo kundo arapada augewo muyaeda idegare, yai embomai ji site edo ji vegeite isima edo ara ainda.’”
14Edo Iesu mi ainda ge gogumbarida sisina, “Embo jiwae awa God mi dao sisina, ata indewae awa ami gerisina.”
Caesar de tax piedo era awa awarita ko awara aeri?
(Mark 12:13-17; Luke 20:20-26)
15Edo Parasi mane idegedo ge jijiritera awa, imo ge tae dumbae ari gido ainde bekumba ge tain. 16Ango edo awamanemi Iesu da yai awamaneda ambodani ae Herod da buro otatawo de pietero maunsitera. Edo awamanemi sitera, “Atopatari, nakare gotera imo awa gebé embo, edo imo gebémi embomai nongo itorote God mi jipapa eira awa atopasido eta. Aindabé imo embo anumba ikane o tuda itera awa kotembae, awatedo rorae ro awamanemi kotembae eteri imo dubo vevera ainyae. 17Awatedo nakare te gore. Ito kotembari rori? Nakare tax ganu Caesar de piedo era awa awarita ko awara aeri?”
18Ata Iesu awamaneda sirigari bebegae awa gido sisina, “Imomane embobo iwawa tote (2)de, ro awaembo imomane na bavedo gotevi? 19Awara, itomane tax ganu awa eu gane.” Ango tesiri awamane ganu da (1) ainda yai kundo guputera. 20Edo Iesu mi awamanede sisina, “Dombu de dao de eiwa andari?”
21Edo awamanemi ainde sitera, “Caesar da.”
Edo Iesu mi awamanede sisina, “Awatedo Caesar da roviravi awa Caesar de piewo, edo God da roviravi awa God de piewo.”
22Edo awamanemi Iesu da ge awa ingido kore edo imo dodo maunsitera.
Sadusi manemi betedo erarida tedogari Iesu de pipisitera.
(Mark 12:18-27; Luke 20:27-40)
23Iji dá ainde Sadusi mane Iesu da yai guputera. Awamane gebé edo era awa, embo betedo erari itae. Awatedo awamanemi ainde tedogositera, 24“Atopatari, Moses mi sisina awa, embo aro jimundo mamai piae eimango betaina, ainda namejimi ainda namejida aro rori awa jimundo mamai piari namejida orobe itarate. 25Awara, iji da (1)de nanonameji berari 7 awa namondekare isiretera. Edo nameji buwomi aro jimundo mamai piae betesiri buwoda gaganimi ainda aro rori jipusina. 26Edo dá ango buwoda gagani daedo mamai piae besisina. Ango eimene gundo tamonde (3)da edo maundo berari 7 awa bebetegesitera. 27Edo ambobéda, eutu awa daedo besisina. 28Ango edo iu ibono berari 7mi eutu eiwa jipusina. Awatedo, iji amboda embomai betarida erara awa, arobé anda aini?”
29Edo Iesu mi awamanede ge mina sisina, “Imomane God da Ove Gaiarida ro tari isira awa gae, edo daedo God da goroba awa gae. Awatedo ge tae dumbae etewa. 30Bebetegarida tekago erari iji ainde awa, embo de eutu de, iu aro ari tao ae, edo jimbari mina piara ari itae, ata God da anelamane utuda ango ara, awatedo na ge awa tetena. 31Ata bebetegarida tekago erarida ge ro God mi imondemane sisina awa ajigedo gaeta? Awa engo, 32‘Na awa Abraham da God, Isaac da God, edo Jacob da God.’#Exodus 3:6 Awatedo God ami sisina, imo awa bebetegarida God ae, ata embomai wasirideda God.” #22:32 Awatedo God ami sisina, imo awa bebetegarida God ae, ata embomai wasirideda God. Abraham de Isaac de Jacob de awa matu besitera, awarata, duberi jiwaebé ainda amboda, God mi sisina, awamaneda God awa imo. Awatedo kaena gotera, awamaneda asisi wasiride God da yai itera.
33Edo embo jisijisi yai ainda usitera ami Iesu da atopatari ge eiwa ingido korebé esitera.
God da ge okain bajinabé bajina awa rori?
(Mark 12:28-34; Luke 10:25-28)
34Ata iji ainde Iesu mi ge mina dave awa Sadusi manede tesiri gido awamanemi tedogari da (1) nei ainda yai piari tao ae dapitera. Edo bino awa Parasi manemi ingido gundo doregesitera. 35Ango edo awamaneda doregarida edo Aodarida jirogari embo da (1)mi Iesu da yai gundo bavedo gain sisina, 36“Atopatari, God da Aodari da ge okain nondawa bajinabé bajinari?”
37Edo Iesu mi embo ainde sisina, “‘Badari ito God awa dubobudo eyo do ito berarimi, asisi ito berarimi, kotembari ito berarimi.’#Deuteronomy 6:5 38Eiwawa God da ge okain gisibé edo bajinabé bajina. 39Edo ainda gagani awa dá ango: ‘Nembu ito dubobudo eyo dá imo akuta dubobudo eta ango.’#Leviticus 19:18 40Ge okain tote (2) eiwa Aodarida edo Peroveta maneda Ove Gaiari#22:40 Aodarida edo Peroveta maneda Ove Gaiari da moka awa God da Ove Gaiarida ge, Genesis maundo Malachi. berarida tutuvi emi jiuri isima edo eira.”
Nongo edo Keriso awa David da mai ri?
(Mark 12:35-37; Luke 20:41-44)
41Ango edo Iesu mi Parasi mane ainmi yai ainda matu doregedo itero awamanede tedogosisina, 42“Keriso awa imomane ro kotembetevi? Embo awa anda mairi?”
Awamanemi ainde mina sitera, “David da mai.”
43Ango tetero Iesu mi awamanede sisina, “Edo awa gebé, ro awaembo Asisi Kotopu mi David gisijiri imo awa ‘Badari’ sisini? Aindabé David mi sisina,
44‘Badari#22:44 Badari da moka einda awa ‘God Mamo’. mi nato Badari#22:44 nato Badari da moka einda awa ‘David da Badari’ o ‘Keriso’. de sisina,
“Ipa be natoda anumbedo namonde daedo
embomai berari gisijiyo!
Ango eiato nane ito gitopo embo
ito tai tuda piana.” ’#Psalm 110:1
45Edo David mi embo awa#22:45 embo awa awa ‘Keriso’. ‘nato Badari’ sisina, nongo edo embo awa ainda mairi?” 46Edo embo da ainmi Iesu da ge inono mina tae. Edo iji ainde edo matawa mambira awa, embo berari adu edo bavedo gain tedogari nei da ji piae.
Currently Selected:
Matthew 22: bhg
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved
