Malika 1

Ioni Tobabitaiso Ieisu nakeda isivetovetonovi

Madiu 3:1-12; Luke 3:1-18; Ioni 1:19-28

1Valea Giamaina dede Ieisu Mesaia Yaubada Natuna paipaina. Nakabavelamu topalimatamatana imai tomo'otoqa inavonedi inavalabubuna.

2Base Yaubada napalopita Aisea igililia Yaubada ivesipupu ivo,

“#Mal 3:1Aivonemu, naqaida gutopalimatamatana aivetuneni inagumeta mukenao inavusia.

3 # Aisea 40:3 Pwayapwayamaiqe topalimatamatananina bonana bwaiginaeqa ieqoleqole ivo,

‘Iave nakeda kwavusia, nakabatauya kwaisivetonovidi.”

4Beqa Ioni topalimatamatananina imai pwayapwayamaiqe tomo'otoqa ibabitaisodi wete Yaubada valeana tomo'otoqa waidie ilalauguguyeni ivo, “Mikapoinaeqa kwainuavila, we Yaubada mikapoina inanuataqonidi. We aibabitaisomi minuavila kanakiakiaya, paina gunabeida mikapoinaeqa kwainuavila.” 5Beqa tomo'otoqa matatabudi imiamia Iudia Polovinisi naqeneye wete Ielusalema taoni naqeneye isauyedi inaqo Ioni inavevaneneqeni. Tutuyanina dikapoina ivesipupuyedi, Ioni ibabitaisodi Bwasi Iolidani waineye.

6We Ioni kaleko mwesimwesiana ikweseni kaisaya kanawavaqa kameli vutuvutunaeqa iyoqonidi, we kanawakila talobwana waineye ivewakileni kaisaya bununaeqa ivalabubunidi. Tutuya puena limwana wete maikawa ikanikani. #1:6 Ioni navekwesena wete namiana ivekiakiaya mesaida Ilaitia gumanina tamo palopita. Kwaiwawai 2 Kinivo 1:8; Sakalaia 13:4; Luke 1:15, 80. 7We tutuya puena tomo'otoqa ivonevonedi ivo, “Muligue tamo tomoqo imaimai. Gumanina veluvelulunaotoqina matautauda Yau, beqa Yau ge kagusala kanakaqeyapayapa kanabulava aisobwanu aiqeuya. 8Yau amaiqa bwasieqa aibabitaisomi, we gumanina muligue imaimaiqa Vaitabu Maqemaqetanaeqa inababitaisomi.”

Ioni Ieisu ibabitaisoi

Madiu 3:13-17; Luke 3:21-22

9No tutuyanina waineye, Ieisu itauya Nasaletaeqa Galili Polovinisi naqeneye inaqo Ioni waineye, we Bwasi Iolidani waineye, Ioni Ieisu ibabitaisoi. 10We tutuyanina bwasieqa ipoia, ikisalaga abame. Abama ikawapiai, we Yaubada Vaitabuna ikiseni kanakisa mesaida malasi iobuma waineye ilugu. 11#Kaba 22:2; Mak 9:7We abame'eqa Yaubada bonana isauyeni ivo, “Komu, Natugu nuapougu. Avenapwayewemu, wete amwasanemu bwaigina.”

Seitani Ieisu ivekautovoni

Madiu 4:1-11; Luke 4:1-13

12Yaubada ivoneni ikakava, we no waineye vedimadimanaeqa Yaubada Vaitabuna Ieisu ivetuneni inaqo pwayapwayamaiqe. 13Noko waineye kaiata 40 naqedie pwayapwayamaiqe imiamia, we Seitani iekautovoni wayaqina kapoina waineye inayatoi. Pwayapwayamaiqe imiamia kaisaya walawalakai gamwadie, we mulineye Yaubada na'anelose abame'eqa imai ikisavekavini.

Tovuata kadikumapuli Ieisu iqoledi

Madiu 4:12-22

14No tutuyanina waineye Kini Elodi gunabeida Ioni Tobabitaiso deli waineye iginoleni,#1:14 Malika 6:14-29 matautauda Ieisu inaqo Galili waineye tomo'otoqa waidie Yaubada valeana ilalauguguyeni. 15No waineye iesipupu ivo, “Tutuya gunabeida imai. Yaubada nakeda kaivauna natomo'otoqa kadiloina paipaidi saiqanaqa inasauyeni. Mikapoinaeqa kwainuavila, we Valea Giamaina kwavetumaqaneni.”

16We tamo kaiata waineye Waya Galili kwadeweye ilalauvasana tovuata kadikailuqa ikisedi, Saimoni metaina Anidulu divuataeqa iyayaubani waya waineye. 17Ikisedi iveqole waidie ivo, “Kwamai kwavemuliegu. Mesaida dede iqana kwakonakonadiqa, we Yau aivevemi banikodiqa tomo'otoqa kwaikonadi kwaimaiedi waigue inavetumaqanegu.” 18No waineye vedimadimanaeqa divuata ibailedi ivemulieni.

19We saiqanaqa iveqanaqo Ieisu Sebedi menatunavo Iemesa, Ioni ikisedi divuata kawalabukina iyaluyalumi diwaga waineye. 20We Ieisu iveqole waidie ivo, “Kwamai. Kwavemuliegu.” Beqa tamadi menatolituqavo wageye ikiawedi, we ivemulieni.

Ieisu vaitabu kapoina tomoqo waineye'eqa iveuqeuqeni

Luke 4:31-37

21We tutuyanina ilekwa tamo taoni kanawavaqa Kapeneumi waineye, no Kaiata Kabaveyawai waineye Ieisu ilugu sinagogi naqeneye iekaivevena Yaubada valeana tomo'otoqa waidie. 2212 Taunina navelulunaeqa iekaivevena, we ge mesaida loina kaditovekaivevenavo iekaivevena beqa tomo'otoqa nuadi ivilele bwaigina.#1:22 Basenaqaida Yaubada Mosese loina iveleni me Isileli paipaidi inavekimataneni.

23We tutuyanina sinagogi naqeneye iekaivevena, we tomoqo vaitabu kapoina iekuniqeni iveqole bonana bwaiginaeqa 24ivo, “Ieisu tomoqo Nasaleta, uvale kumai waimeye? Banikodiqa, kumai dede waineye kileoma? Ayagovimu komu Mesaia Yaubada waineye'eqa kumai.”

25We Ieisu iloineni ivo, “Kuvekwada! Tomoqo waineye'eqa kusauyemu.” 26Matautauda vaitabu kapoina ibwau bonana bwaiginaeqa tomoqonina ivelaudididiqa we vaitabu kapoina tomoqo waineye isauyeni.

27Tutuyanina isauyeni tomo'otoqa puedi nuadi ivilele kaisedi waidie iesipupu ivo, “Dede vakai? Dede vekaivevena kaivauna wete menaveluluna. We tomoqonina menaveluluna vaitabu kapoidi iloinedi naloina ivematamataneni.” 28We vedimadimanaeqa Ieisu valeana ivebwaiga isapayavula Galili Polovinisi matatabuna waineye.

Ieisu tomo'otoqa puedi ikavegiagiamaidi

Madiu 8:14-17; Luke 4:38-41

29We vedimadimanaeqa Ieisu mekanatovemulivo sinagogi ikiaweni inaqo Saimoni metaina Anidulu divanuqe Iemesa, Ioni ikweyabudi. 30Tutuyanina waineye Saimoni lawana mokamokaidi vovodi iveyauyauta iviqa kadikivi waineye ikenokeno, no waineye Ieisu ivoneni paipaidi. 31Beqa inaqo ilugu waidie dimadie ikavikavina isivetovoidi. Vedimadimanaeqa vovodi yauyauta ikakava matautauda kadi isiobu ikani.

32We tutuyanina lavilavie, valavala iketoniveni#1:32 Valavala kabaketonivena kanayagova Kaiata Kabaveyawai gunabeida ikakava. Diu Dikaiata Kabaveyawai Palaide valavala iketoniveni ivelamu inaqo Satade valavala inaketoniveni waineye inakakava. tomo'otoqa ditoviqavo wete gumanidiavo vaitabu kapoidi iekuniqedi ikewadi imaiedi Ieisu waineye. 33We tomo'otoqa puedi taoni waineye isikauqidi vanuqa mataneye. 34Vanuqa mataneye Ieisu tomo'otoqa puedi kadiviqa sulidi, sulidi ikavegiagiamaidi wete mesaida gumanidiavo vaitabu kapoina waidie iveuqeuqedi isauyedi. We vaitabu kapoidi iyagovi Ieisu gumanina Mesaia beqa ge idatagwanedi tamo vakai inavesipupuyedi.#1:34 Ieisu iyagovi ivo, “Kago vaitabu kapoidi aitagwanedi inavo, dede Ieisu Keliso, beqa tomo'otoqa inawewesegu inavo, ‘Komu kamatogumeta.’” Kwaiwawai Ioni 6:15

Vikai Galili waineye Ieisu ilauguguya

Luke 4:42-44

35We matalovalovanineye Ieisu itovoi vanuqa ikiaweni inaqo kawalawamaiqe no waineye ielaukui Yaubada waineye. 36Mulineye Saimoni mekanakweyabuvo inaqo ilalaualeni. 37We ibabaneni ivoneni ivo, “Tomo'otoqa puedi ilalaualemu.”

38Ibaivila ivonedi ivo, “Kwamai tainaqo taoni tupwaidiavo sulidi vivideye waidie. Yaubada valeana ailauguguyeni tomo'otoqa waidie. Dede lamunanina amai.” 39Beqa Galili kanamatatabu waineye inaqo Yaubada valeana ilauguguyeni sinagogi naqedie wete vaitabu kapoidi tomo'otoqa waidie'eqa iveuqeuqedi isauyedi.

Ieisu tomoqo mekanaviqa lepelo ikavegiagiamaia

Madiu 8:1-4; Luke 5:12-16

40Tamo kaiata tamo tomoqo mekanaviqa bununeye kanawavaqa lepelo imai Ieisu waineye manawaneye isobwanu ielaukui-vaituqana ivo, “Kago wayaqimu kigiavemaqetagu.” #1:40 Me Diu diloina tomo'otoqanidiavo viqa bunudie lepelo ikewadi wete ge maqemaqetadi ge taiauda inamiamia. We viviqidi wete ge maqemaqetadi tomo'otoqanidiavo ge kaditagwana vanuqe inamiamia o inanaqo inasobwanu kabavelaukui waineye. Beqa kago tomoqo inavegiagiamai wete mesaida inamaqeta-vaituqana tagwatagwanina Yaubada waineye kanasala tomo'otoqa taiauda inamia wete kabavelaukui naqeneye inasobwanu.

41We Ieisu tomoqo bonana inoqai nuana inaqei dimana isiketoi ikavikavini ivo, “Ee, Yau tagwatagwanigu. Kuvegiagiamai!” 42We vedimadimanaeqa tomoqo bununeye lepelo ikakava ivegiagiamai-vaituqana. 43Wete Ieisu bonana veluveluluninaeqa ivoneni 44ivo, “Ge tamo aitoi kivoneni paipaigu, we kunaqo kuvekaivevenemu tovelomu waineye. Kaisaya kiveleni inavelomuyeni Iave waineye paipaimu, mesaida Mosese naloina tolepelo kadigiavemaqeta paipaina kiakiaya tomo'otoqa waidie gunabeida kuvegiagiamai.” #1:44 We tovelomu gumanina Yaubada waineye ikakalaqeieni tomo'otoqa paipaidi iyagovi wete ivo tomoqo kanaviqa bununeye ikakava.

45We tomoqonina Ieisu ge idavekimataneni inaqo vikai puena waidie tomo'otoqa ivonevonedi, we valea isapayavuleni vikai puena waidie. Beqa Ieisu ge kanasala inanaqo taoni waidie tutuyanina tomo'otoqa ietonovi paina kago mesaida yoko bwaigina inamai. Beqa vikai bwaigidi ikiawedi inaqo kawalawamaiqe, we no waineye tutuya puena imiamia. We vikai puedi waidie'eqa kaditomo'otoqavo inaqo Ieisu waineye.

Currently Selected:

Malika 1: mzz

Highlight

Copy