Kabavelamu 4

Keni wete Ebeli

1Adama Ibe taiauda ikenoluqa. Ibe ive'ina'inaqe ivetubuqa natudi lamoqina. We ivo, “Yau Iave nakaivaisa beqa natugu lamoqina kababaneni!” Beqa kanawavaqa iqoleni Keni.#4:1 Keni kananoqaya mesaida Ibeliu bonadi “babana” paipaina. 2Mulineye wete mwau waidie ivetubuqa natudi kanaveluqa iqoleni Ebeli. Kaiatanina itaulai, Ebeli sipi kaditovekisabodaboda, we Keni tobagula tanoqe.

3Mulineye Keni nabagula waineye'eqa tupwaidiavo kanikani ikewadi navenapwayewa ikalaqeieni Iave waineye. 4Wete Ebeli tupwaidiavo nasipi natudiavo gumegumetadi iluvewapadi, we dukudi giamaiotoqidi ikewadi imaiedi navenapwayewa paipaina ikalaqeiedi Iave waineye. We Iave Ebeli taunina wete navenapwayewa paipaina imwasana, 5we Keni taunina wete navenapwayewa ge idamwasaneni wete idakawagiagiamaieni. Beqa Keni nuana ikapo maiqina ikawavivili ivekaiveveneni kanakapoka ioqala-otoqa.

6Matautauda Iave Keni ivelautolieni ivo, “Uvale kamukapoka ioqala? Uvale maiqimu kanakisa ikawavivili? 7Kago giamaina kivavalabubuni kanasala aimwasanemu. We kago kapoina kivavalabubuni kuvekisabodebodemu! Paina kapoina ivaigavu ilalaugamasemu vivimue mesaida tamo kaisaya dabadabana imasomasoi kanakaisaya inaovai. Kapoina wayaqina inakavekapoimu, we komu kapoina kuvelulunapeleni.”

8Matautauda Keni taina Ebeli ivoneni ivo, “Tainaqo walakaie.” No waineye inaqo walakaie, Keni itovoi taina Ebeli inigei iluvewapai.

9Matautauda Iave Keni ivoneni ivo, “Vakaiebei taimu Ebeli?”

Keni ivo, “Ge adayagovi. Yau ge taigu kanatovekisabodaboda.”

10We Iave ivoneni ivo, “Dede vakai kuvalabubuni? Taimu dayaqina pwayepwayeye ieqole waigue baivila paipaina. 11Beqa deqoina aivonemu aikavekapoimu dede mesaida: Komu taimu kuluvewapai pwayapwaya dayaqina iyemuya beqa deqoina aiketobodemu pwayapwaya kanalituqa waineye. 12Deqoina waineye inaqonaqo kivekautovona pwayapwaya waineye kibagula, we kanikani ge tamo kibabaneni, we dede waineye komu ge memuvanuqa kivetosasala-maimaiqa vikai puedi waidie.”

13Keni Iave waineye ivesipupu ivo, “Yau kagukaniqodadaqa isaki-otoqa. Ge kagusala aikavalai. 14Deqoina kuketobodegu pwayapwaya kanalituqa waineye we aimiakanikie waimue'eqa; aivetosasasala vikai puedi waidie. Tutuyanina tamo aitoi inababanegu inaluvewapagu.”

15We Iave ivoneni ivo, “Gebuka, kago aitoi komu inaluvewapamu kanabaivila inakavesulaia 7 tabwaneye.” Matautauda Iave Keni maiqineye saba iyatoi beqa ge tamo aitoi inababaneni inaluvewapai.

25We wete Adama memwanena ikenoluqa natudi lamoqina ivenatuneni. Ibe ivo, “Yaubada tamo gwamana ivelema Ebeli kanaketopesala, paina Keni Ebeli iluvewapai,” beqa iqoleni Sete.#4:25 Sete kananoqaya mesaida Ibeliu bonadi “kalaqei” paipaina.

26We Sete inaqi mwanena ivenatuna. Natuna iqoleni Inosi. No tutuyanina waineye Inosi imiamia, tomo'otoqa ivelamu sobwanu Iave waineye.

Currently Selected:

Kabavelamu 4: mzz

Highlight

Copy