Kabavelamu 3
3
Banikodiqa kapoina ivelamuyedimo pwayepwayeye
1Baisoa nanuauya katupoe paipaina ilaga-otoqa mulineye tupwaidiavo kaisaya Iave Yaubada ivalabubunidi. Baisoa vavine ivelautoliedi ivo, “Dede mwaqitana Yaubada ivonemi no kaivuavuaqanidiavo tanoqa naqeneye ge kwaikanidi?”
2We vavine ibaivila ivo, “Gebuka kaivuavuaqa puedi tanoqanina naqeneye kanasala waidie kaikani. 3We kaivuavuaqa kanatanoqa gamwaneye, Yaubada ivonema ge kaikania wete ge kaialatovoni. We kago kaikania kaiwapa.”
4Baisoa ibaivila ivo, “Aa, we ge kanamwaqitana wete ge kwaiwapa. 5Kaiatanina kwaikaniaqa matami inakawananaqai we giamaina kapoina matatabuna waidie'eqa kwaiyagovidi. Komi Yaubada mesaida. Yaubada iyagovi beqa no iketobodemi kanakani waineye'eqa.”
6Beqa vavine ikiseni no kaivuavuaqa giamaina kabakani, kanakisa giamaina wete wayaqidi inakania beqa matana inakawananaqai vakai matatabudi inayagovidi. Beqa tupwaidiavo vuadi ikewadi, tamo ikania. We mwanedi no waineye taiauda imiamia, beqa tamo iveleni ikania. 7Matadi ikawananaqai iyagovi kayagwenegwenedi beqa welavi pigi#3:7 Welavi figi kanakisa mesaida modaba, we kanikani giamaina. lugudi iyalumidi mesaida kosi manawadi itumudi.
8We tutuyanina lavilavie saiqana gaugau, inoqai Iave Yaubada butuna itauya imaimai kaivuavuaqa kanatanoqa naqeneye. Tomoqo memwanena welavi naqedie ivaigavu beqa Yaubada ge inakisedi. 9Iave Yaubada tomoqo waineye iveqole ivo, “Ue, komu kaiebei?”
10We tomoqo ibaivila ivo, “Yau kaivuavuaqa kanatanoqa naqeneye butumu anoqai agololo paina kayagwenegwenegu beqa avaigavu.”
11Yaubada ivelautoli ivo, “Aitoi ivonemu kuvekayakaigwene? Oge kaivuavuaqanina avonemu ge kikaniaqa komu kaivuavuaqanina vuana kukania?”
12Tomoqo ibaivila ivo, “Vavinenina kuveleguqa kaivuavuaqa vuana ivelegu akania.”
13Iave Yaubada vavine ivelautoliedi ivo, “Vakai kwavalabubuni?”
Vavine ibaivila ivo, “Baisoa ikatupwaiema beqa kakania.”
14Iave Yaubada baisoa ivoneni ivo,
“Paina komu kapoina kuvalabubuni
beqa avekaiwemu kaisaya tauvanuqa
wete kaisaya walawalakai waidie'eqa!
Komu kamukaniqodadaqa ilaga-otoqa
mulineye kaisaya tupwaidiavo.
Tutuya puena manawamueqa kidaledale,
we pwayapwaya kikanikani yawaimu kanamatatabu.
15Aivekaiwemu komu wete vavine kwaivetalavuala
tubuleleleqimwavo wete vavine tubuleleleqinavo inavetalavuala.
Vavinenina tubuleleleqina kunukunumu inatutuguali,
we komu kaqekedukeduna kiovai.” #3:15 Dede vonawakedubala Ieisu naveluluna paipaina. Ieisu Seitani inavelulunapeleni.
16Iave Yaubada vavine waidie ivona ivo,
“Avona waimie kamikaimatavuloqa paipaina.
Kamukabeida mwau waimie veviqa bwaigina kwaibabaneni
gwamana natubuqa waineye.
We kamikaimatavuloqa kanaveluqa dede mesaida,
komi wayaqimi mwanemi kwailoineni
we mwanemi inaloinemi menaveluluna.”
17Iave Yaubada Adama ivoneni ivo, “Avona waimue kamukaimatavuloqa paipaina. Komu mwanemu bonadi kunoqai, we kaivuavuaqa kukania gumanina avonemu avo, ‘Ge kikania,’
“Beqa pwayapwaya aikavekapoi,
we komu lituqaeqa kiveviqa kanikani kigoyovi
kikani yawaimu kanamatatabu waineye.
18Komu kanikani kibaguli
we pwayapwaya waineye libi mwalamwalaqidi inavekalatabwatabwa.
19We kilituqa-veluveluluna kilaugamweai kanikani kibabaneni,
we kivila-vaituqana pwayapwaya waineye.
Pwayapwayaeqa pwayapwaya kaupualina akewai avalabubunimu
wete kivepwayapwaya-vaituqana.”
20Tomoqo iyagovi mwanena inave'ina tomo'otoqa yawayawaidi puena waidie beqa iqoledi Ibe.#3:20 Ibeliu bonadi waineye wavaqa Ibe kananoqaya mesaida vona “miavaqata.”
21Iave Yaubada kaisaya bunudi ikewadi ivalabubunidi Adama wete Ibe paipaidi ivekwesenidi.
Iave Yaubada Adama wete Ibe iveuqeuqedi tanoqe'eqa isauyedi
22Iave Yaubada ivo, “Tomoqo gunabeida giamaina kapoina matatabuna waidie'eqa iyagovidi beqa mesaida kida. Beqa dimana ge inabalaqa yawaina vaqata kanakaivuavuaqa inakewai inakania, we inamia-vaqata.” 23Beqa Iave Yaubada Adama iveuqeuqeni isauyeni tanoqa Ideni naqeneye'eqa pwayapwayanina inalituqi waineye ivalabubuni. 24Mulineye tomoqo ikwavineni isauyeni, we selubima#3:24 Selubima tamo vaitabu veluvelulunina Yaubada ivalabubuni mepapena Tomwaya navikai maqemaqetana inamiagamatai. tupwaidiavo ivonedi inatovotovoi bolimana (isiti) navikaie tanoqa Ideni waineye. Wete kepata tamoqana niniqona we yabeyabelina ielauvivila vikai puena waidie iyatoi. Beqa no sakunidiavo yawaina vaqata kanakaivuavuaqa kanakeda inavekisabodebodeni, we ge tamo aitoi inalugu vikainina waineye.
Currently Selected:
Kabavelamu 3: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
