Kabavelamu 12
12
Iave Ebelam iqoleni
Tutuya kaniakwanina inaqonaqo, Noa natuna Semi tubuleleleqina waineye'eqa Ebelam itubuqa.
1 #
Aposi 7:2, 3 Matautauda Iave Ebelam ivoneni ivo, “Kutovoi, muvikai, mumanuqa wete tamamu navanuqa kubailedi. Kunaqo vikainina kawaie aivevemu waineye.
2“Tubuleleleqimu puedi aivelemu,
wete dimanuqa inavebwaiga wete veluvelulunidi.
Waimue aivalabubuna giagiamai
wete kamuavaqa aikavebwaigi.
Beqa kawaie tupwaidiavo tomo'otoqa digiamaina
inababaneni komu waimue'eqa.
3Tutuyanina tomo'otoqa inavalabubuna-giagiamai waimue,
we Yau aivalabubuna giagiamai waidie.
We kago tomo'otoqa inavalabubuna-kapo waimue,
we Yau aikaimatavuloqidi.
Kamuwavaqaeqa aivalabubuna giagiamai tomo'otoqa dimanuqavo
puepuena waidie pwayapwaya dede waineye.”
4-5Kaiatanina waineye Ebelam kanadiqaba 75, vakai puena Iave ivoneni bona kiaveneye'eqa ivalabubunidi. Memwanena Selai wete taina natuna, Lota, Elana ibaileni. Nakaisaya puepuena, nasakuvo wete natolituqavo ikewadi taiauda Elanaeqa itauya Kenani pwayapwayana waineye. Tutuyanina Kenani kanakabavekakava waineye ilekwa, 6Ebelam menasusuvo ibala inaqo kanaketoava Sikemi taoni waineye ilekwa. Welavi bwaigina lamuneye ivekwada vikainina kanawavaqa Mole waineye. No tutuyanina waineye me Kenani giladi iekalamia vikainina waineye. 7#Aposi 7:5No waineye Iave ilausimatala Ebelam waineye ivo, “Kenani pwayapwayanina dede tubuleleleqimwavo aiveledi.” Beqa Ebelam didiqa ilauqi no waineye Tomwaya kanavelomu kabakanigabu paipaina.
Kenani pwayapwayana naqeneye, Ebelam menayokovo kaia isasasalamo vikai tamoqana tamoqana waidie. We vanuqa ge idayoqonidi kabamiavaqata paipaidi kaia ukwetaqa waidie imiamia. Kaiatanina inatauya mali vikaie, ukwetanina inakewai, inanunumi, kaisaya kanawavaqa kameli dumweneye inayatoi inakavalai taiauda inanaqo.
We kanikani ge idabagubagula, we kaia kaisaya iekisabodebodedi. Tutuya puena dikaisaya meyokodi libi iekalakani beqa libi inalauala paipaidi. Kaiata tupwaidiavo dikaisaya waidie ikanikani wete tupwaidiavo dikaisaya tomo'otoqa igimwagimwane kadi paipaina. Ebelam menatomo'otoqavo kanikani witi igimwagimwane malitomo'otoqa waidie. Witi beqa pwalawa ivalabubuni wete beledi ietavoqidi.
Currently Selected:
Kabavelamu 12: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
