Kabavelamu 11
11
Babeli Vanuqa Kaniakwanina iyoqoni beqa Iave bonana igiaveqauya
1Naqaida tomo'otoqa pwayepwayeye bonana tamoqana we vona tamoqana beqa iesipupu. 2We tutuyanina tomo'otoqa isasasala bolimana (isiti) waineye. No waineye dumia bwaigina ibabaneni vikainina Sina#11:2 Sina tamo kanawavaqa Babiloni. waineye. Beqa no vikainina waineye imia.
3We ediavo waidie ivesipupu ivo, “Kwamai, pwayapwaya taikewadi biliki#11:3 Biliki dobwadobwana ivalabubunidi, we valavala waineye iyatodi isaya ipakalidi. Wete kalakusadi kanakona pulina beqa ipitapita wete vanuqa kabayoqona paipaidi. taivalabubunidi taigabunidi inapakalidi.” Dede mesaida ivalabubunidi biliki ikewadi iyatodi kabayoqona paipaidi wete koluta mesaida kaibai iyatoi ikalapwata. 4We ivo, “Kwamai, taoni taivalabubunidi wete vanuqa kaniakwanina taiyoqoni kaiseda inalaga abama inakavekavini. Dede mesaida taivalabubunedi kadawavaqa kanakavebwaiga paipaina wete pwayapwaya waineye ge kanasala taisapayavula.”
5Tutuyanina waineye iyoqoyoqona, we Iave iobuma taoni wete vanuqa kaniakwanina tomo'otoqanidiavo iyoqoyoqonidi ikisedi. 6We Iave ivesipupu ivo, “Deqoina yoko tamoqana waineye imiamia iesipupu bonana tamoqana beqa. Deqoina dede mesaida ivalabubunidi, tutuya mulineye vakai dinuanuana wayaqidi taunidi kanasala inavalabubunidi. 7E'e, taiobu bonana taigiaveqauya beqa ediavo inavona ge kanasala inayagovidi.”
8Iave iobu bonana igiaveqauya iveyavulidi inaqo pwayapwaya matatabuna waineye, beqa vanuqa bwaigina iyoqoyoqoni ge idavekakavai. 9No waineye Iave bonana igiaveqauya we tomo'otoqa iveyavulidi inaqo pwayapwaya matatabuna waineye, beqa taoni iqoleni Babeli.#11:9 Babeli kananoqaya mesaida Ibeliu bonadi, we kida tavo giaveqau.
Currently Selected:
Kabavelamu 11: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
