Isauyedi 17

Gileu waineye'eqa bwasi isauyeni

1Me Isileli pwayapwayamaiqa kanawavaqa Sini ibaileni, we tutuyanina Iave iloina-pakaledi inanaqo vikai tamoqana tamoqana waidie. Lepidimu navikaie ivebaekwa, we no waineye ge tamo bwasi idakenokeno tomo'otoqa inayemu. 2Beqa tomo'otoqa Mosese taiauda ivekawadibidibi ivesipupu ivo, “Bwasi kuvelema. Kaiyemu!”

We Mosese ibaivila waidie ivo, “Uvale kwaekawadibidibigu? Uvale Iave kwaekautovoni?”

3We tomo'otoqa kaniqodi isaya-otoqa bwasi paipaina, beqa Mosese ibwaduyeni ivo, “Uvale, kukewaluguaqetema Itipita pwayapwayana waineye, beqa dede waineye kikavewapama kima wete natumavo wete makaisayavo paina bwasi gebuka?”

4Beqa Mosese ivelaukui-veluveluluna Iave waineye ivo, “Vakai aivalabubunidi dede tomo'otoqanidiavo paipaidi? Gunabeida kadikapoka ioqala saiqanaqa gileu beqa inanigegu inaluvewapagu!”

5Iave Mosese ivoneni ivo, “Tomo'otoqa matadie kutauya. Mu'utoqana kukewai kukavikavini dimamue, gumanina beqa kuvelituqeni base Bwasi Naili kunigei. We tupwaidiavo me Isileli tomoqovo bwaigidi kuqoledi inatalakwavinimu kwainaqo. 6We Yau matamue aitovotovoi gileunina tabwaneye Sainai navikaie, we gileu kinigei, waineye'eqa bwasi inasauyeni, we tomo'otoqa inayemu.” Beqa Mosese kaia mesaida ivalabubunedi me Isileli tomoqovo bwaigidi matadie. 7Mosese no vikainina iqoleni Masa #17:7 Ibeliu bonadieqa Masa kanagiavemaqeta ivekautovoni. wete Meliba,#17:7 Ibeliu bonadieqa Meliba kanagiavemaqeta “ivekaibwadubwadu.” paina me Isileli Mosese taiauda ivekawadibidibi wete Iave ivekautovoni tutuyanina waineye ivesipupu ivo, “Iave kida taiauda o gebuka?”

Me Isileli wete me Ameleki taiauda ivetalaqa

8Matautauda me Ameleki imai ivalabubuna me Isileli taiauda inavetalaqa vikai Lepidimu waineye. 9Beqa Mosese Iosua ivoneni ivo, “Tomoqovo tupwaidiavo kuvesinuedi paipaida, komi matatabumi kwainaqo kwaivetalaqa me Ameleki taiauda. Kawaie yau aitovoi koyanina siaina tabwaneye gu'utoqana taiauda, gumanina Iave ivonegu aikewai aikavikavini.”

10Beqa Iosua ivalabubuni mesaida Mosese ivoneni, we me Ameleki ditovetalaqavo taiauda ivetalaqa. No kaiatanina tamoqana waineye, Mosese, Eloni wete Kuli ilaga koyanina siaina tabwaneye. 11Tutuyanina Mosese dimana we na'utoqana isisilagai, me Isileli ditovetalaqavo ieluluna. We tutuyanina dimana isisiobuyedi inaveyawai, me Ameleki ditovetalaqavo ieluluna. 12Mosese dimana ikawavualidi, beqa ge kanasala inasilagaidi. Beqa Eloni wete Kuli gileu dibuneye iyatoi waineye imiabui, we kadikailuqa itovoi, tamo iana vilaneye itovoi wete tamo iana vilaneye itovoi, dimana ikavikavinidi isilagaidi, beqa dimana ge idapetodiqa kanaketoava valavala iketoniveni. 13We Iosua wete menatolauqaviavo dikepata beqa me Ameleki ditolauqaviavo ivelulunapeledi.

Currently Selected:

Isauyedi 17: mzz

Highlight

Copy