Isauyedi 14
14
Pelo me Isileli italakwavinidi
5Tutuyanina Pelo ivoneni ivo, “Me Isileli gunabeida isauyedi,” beqa Pelo wete natolituqavo bwaigidi dinuanua isiviladi ivo, “Vakai tavalabubuni? Me Isileli tatagwanedi isauyedi inaqo, beqa deqoina ge inalituqa paipaida.” 6Matautauda Pelo nawagabiubiu#14:6 Dede wagabiubiunina kanawili kailuqa wete vedimadimana ge mesaida wagabiubiunina saku kabavedodoqa kanawili pulina. Gumanidiavo vetalaqa paipaidi we tolauqaviavo kadikailuqa kanasala waineye inadodoqa—tamo tovekuniqa wete tamo tovetalaqa. ivalabubunidi wete natolauqaviavo ikewadi, 7wete nawagabiubiu giamaiotoqidi kadiwawa 600 wete Itipita wagabiubiu tupwaidiavo ikewadi, tamoqana tamoqana mekaditogumeta. 8We Iave Pelo nuapouna igiavetabodai me Isileli italakwavinidi. No tutuyanina waineye me Isileli medinuavatu isasauyedi. 9Me Itipita me Isileli italakwavinidi. Pelo nawagabiubiuvo, osi kaditolauqaviavo wete tolauqaviavo me Isileli ikautaqonidi ikisedi tutuyanina iebaekwa Ligwagwa Yamoyamoina doleneye.#14:9 Dede taoni kadiwavaqa Pi-ailoti we Balasi-poni ligwagwa vikaineye.
10Pelo wete natolauqaviavo iteyabiyabibinidi, me Isileli ikisalaga me Itipita imaimai waidie beqa igololo-otoqa itaiqavolovoloqa Iave waineye wayaqidi inakaivaisedi.
11We Mosese ibwaduyeni ivo, “Komu kwavakwavamu! Banikodiqa, Itipita waineye taumata ge idakenokeno beqa kumaiema dede pwayapwayamaiqe kaiwapa? Uvale Itipitaeqa kukewaluguaqetema kumaiema? 12Tutuyanina Itipita kamiamia kavonemu kavo, ‘Kubailema kaimiamia me Itipita paipaidi kailitulituqa.’ Mwaqitana, ielituqema Itipita waineye mwauna, we kago pwayapwayamaiqe kaiwapa kapoiotoqina. Ge wayaqima!”
13Mosese waidie ivesipupu ivo, “Ge kwaigololo! Kwatovoi pakala matautauda kwaikiseni Iave vakai inavalabubuni komi inaketoyavumi deqoina. Me Itipita deqoina kwakisekisedi kawaie ge wete kwaikisa-vaituqanidi. 14We Iave paipaimi inavetalaqa. Kwatovoi pakala!”
Ligwagwa Yamoyamoina waineye me Isileli idamana
15Matautauda Iave Mosese waineye ivesipupu ivo, “Uvale kwatataiqavolovoloqa waigue? Me Isileli kuvonedi inatauya. 16Muwelavi kusilagai dimamu kukaiyoyoweni ligwagwa waineye ligwagwa inakawa'alaqi, beqa komi me Isileli kwaibala pwayapwaya sayasayana waineye. 17Kwaetonova, Yau me Itipita debadi aigiavepakalidi beqa inatalakwavinimi ligwagweye. Matautauda Pelo natolauqaviavo, nawagabiubiuvo wete osi kaditolauqaviavo aivelulunapeledi, we tomo'otoqa inadidigegu. 18Tutuyanina Pelo menatolauqaviavo aivelulunapeledi, me Itipita matatabudi inayagovi Yau Iave.”
19Matautauda Yaubada na'anelose, gumanina me Isileli matadie igumegumeta, we ivila inaqo mulidie. Wete dede mesaida waumana tatatalina kaniakwanina inaqonaqo matadie ivila inaqo mulidie itovoi. 20Waumananina isivetovoia me Itipita wete me Isileli dibaekwa gamwaneye. Tutuyanina vaitoma isauyeni, waumana kaniakwanina isivilai ivekai. Lovane me Isileli maqeta iveledi we me Itipita vaitoma iveledi, beqa lovananina kanamatatabu waineye ge kadisala inamai me Isileli vividie.
21We Mosese dimana isiketoi inaqo ligwagweye. Matautauda Iave yaqina veluvelulunina bolimanaeqa (isiti) ivetuneni, we lovananina kanamatatabu inununuqa ligwagwa iketovegeia isaya mesaida pwayapwaya sayasayana. 22Matautauda me Isileli ligwagwa waineye ibala pwayapwaya sayasayana waineye, we ligwagwa mesaida pita itovoi kadikataqie wete kadikelie.
23Matautauda me Itipita matatabudi mulidie italakwavinidi. Diosivo, diwagabiubiuvo wete osi kaditolauqaviavo ilugu ligwagweye. 24We noko kawakawaiotoqe valavala ge idalagaqeta, Iave waumana kaniakwanina wete kai waidie'eqa ikisaobu me Itipita waidie nuadi igiaveqaudi. 25We Iave diwagabiubiu kadiwilivo ikavekapoidi, beqa ge kadisala inavekuniqedi. We me Itipita ivo, “Iave me Isileli ikakaivaisedi kida me Itipita ieqaviqaviada, beqa kwamai taideqa taivila!”
26We tutuyanina me Isileli gunabeida ibala vikaineye matautauda Iave Mosese ivoneni ivo, “Dimamu kusiketoi ligwagweye inanaqo ligwagwa inavila inamai me Itipita diwagabiubiu wete osivo kanatolauqaviavo inayamunidi.” 27We tutuyanina valavala ivelamu ilalagaqeta Mosese dimana isiketoi inaqo ligwagweye wete ligwagwa ivila kanakivie. Me Itipita wayaqidi inadeqa, we Iave iveyavuledi iobu ligwagweye. 28Ligwagwa ivila-vaituqana kiaveneye we me Itipita matatabudi iyamunidi, gumanidiavo me Isileli ivemuliedi iobu ligwagweye. Ge tamo wagabiubiu, osi kaditolauqaviavo wete tolauqaviavo idatupwa.
31Tutuyanina me Isileli Iave navalabubuna veluvelulunidi ikiseni, banikodiqa mesaida me Itipita ivelulunapeledi, beqa Iave igololoyeni. Iave wete natolituqa Mosese taiauda ivetumaqanedi.
Currently Selected:
Isauyedi 14: mzz
Highlight
Share
Copy
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved.
