Yon 12

Maria sanda aawep Yeesus merena ifomak

(Matiu 26.6-13, Mak 14.3-9)

1Aria Pasowa maapora fofa ikur okaiwi-pa kuisow ikaeya Yeesus Betani ikiwok. Betani-na Lasarus owowa-ke, eena umeya Yeesus-ke iikirowak, mua nain owowa. 2Owowa nan Yeesus maa enowa onomamik, ne Mata pun wia asipam-ikua. Ne Lasarus pun nan ikua. Wi unowiya kame kiir inep ikok maa enem-ikemik. 3Naap ikaiwkin Maria sanda aawep feekiya ekapok. Sanda nain sesa manek akena. Ekapep sanda nainiw Yeesus merena sawikomap ona afif fuuliw sanda supuka ipiwomak. Ne koor kemena nain sanda ikina nain-keriw arek. 4Ne ona teeria mua oko unuma Yuudas Iskariot, ikoka os-ke Yeesus wi iiwua wapena-pa wiar wuinon. Os-ke maek, 5“Nee, sanda naap nain sesekekamik ya, naeya maamuma nain aawep wi mua oorpowa wia asipekamik,” naap maek. Maamuma nain maneka, mokoma kuisow uuwimik sesa naap. 6Naap maek nain me wi maa marewa nain wia naep naap maek, weetak. Moram o ikum muaiya naap maek. Yeesus teeria unowa nain maamuma os-ke urufiya, ne iir kui-kuisow maamuma nain ikum wiar aawem-ikua. 7Ne Yeesus-ke maek, “Neek sira efa oninok. Naap onap ikaeya ikoka yo efa soopowa epa kererinon. 8Wi mua oorpowa anane niamiya ikaimik. Ne yo anane niamiya me ikainen.”

9Aria Yeesus Betani-pa ikaeya wi Yuuda teeria maneka naap miimap ookap ikiwemik. Me o urufowa muutiw, weetak. Lasarus eena umep ikaeya iikirowak nain pun urufowa ikiwemik. 10Naapeya wi pris woos mua Lasarus pun ifakimowa maemik. 11Moram Lasarus iikireya wi Yuuda unowa o muuta nain Yeesus makena-ke naemi o ona-pa arem-ikemik.

Yeesus Yerusalem urupok

(Matiu 21.1-11, Mak 11.1-11, Luk 19.28-40)

12Ne iir nain wi Pasowa maapora onowa naep emeria mua Yerusalem ekapep taanep ikemik. Uurik ona wi miimamik, Yeesus fan ekapiya naemik. 13Naemi nomokow mekira wu-wuepap opap feekiya miira puuk-iwamik. Iwam-ikok urufap faremi maem-ikemik,

“Oo Mua Maneka iinan akena! Maneka, mua eena no unuma-pa ekapiya nain kekanowa iwe! O i Isrel Saria Maneka-ke.”

14Aria Yeesus donki iimarow eremina pekapomiwkin iinan-pa pokap Yerusalem urupok. Mua Maneka opora maek kakeniw naap. 15Feenap,

“Ni Saiyon,#12.15 Yerusalem unuma oko Saiyon naimik. ni maa muutitik me keker opaka! Moram niena saria maneka donki iimarow eremina iinan-pa pokap ekapem-ikaiya, ni nain urufeka.” (Sekaraiya 9.9)

16Ne iir nain ona teeria opora nain kemena-ko me aawemik. Ne aakisa fan Yeesus parin maneka onaiya ikok unum maneka aaweya opora eena Mua Maneka opora-pa ikua nain kema suuwamik. Ne Yeesus sira naap onamik nain pun kema farerep maemik, makena.

17Aria wi mua Yeesus iiriw Lasarus fareya iikirak nain urufap aakisa mua unowa wia maakiwkin meta manekarek. 18Naapeya mua unowa oram me ikiwemik, weetak, Yeesus maa miililina onak nain miimap o urufowa ikiwemik. 19Naap oniwkin wi Farisi-ke wi-wieniw wiam maakemik, “Sa, urufeka, i iiriw sira-ko onekamik-na eliw! I naap wia urufam-ikemkun emeria mua unowa iiwawun maneka o kame-pa arikimik!” Naap maemik.

Wi Grik papako Yeesus urufowa maemik

20Aria Pasowa maapora-pa mua unowa lotu onowa naep Yerusalem urupemik. Ne wi Grik papako pun nain urupemik. 21Wi nan ikok ikiwep Filip wiar kereremik. Filip-na Betsaida mua-ke, owowa nain Galili kame-pa ikua. Aria kererep urufap maakemik, “Oo saria, i Yeesus urufu naep.” 22Ne os-ke ikip Andru maakep ikos ikiwep Yeesus maakemik. 23Ne wia maakek, “Mua Muuka eena unum maneka ne kekanowa ariman wiar arowa nain epa aakisa fanek. 24Yo makena nia maakiyem, maa makena miiwa-pa wafuriwkin naap ikok opa urupeya makena nain beelalinon. Ne naap me arinon-na ona oram akena ikainon, mokoka me pukinon. Aria maa makena nain-ke miiwa-pa orop opa urupemi makena nain mesenalinon. Opa nain-ke arimemi makena unow akena wuinon. 25Neemi maiyem, mua ona muutiw wame kema suuwiya nain samor aawinon. Ne mua eena miiw mua wiamiya ikok me wame kema suuwowa eliw samor aawinen naiya nain, ikoka anane maneka eliwa ikainon. 26Ne o mua yo yookami mauwowa onam-ikomeya-na mua nain yo baliwep akena yookam-ikainok. Ne yo ikoka epa kaanek ikaiyem nain os pun efamiya ikainon, o eena yo uuwowa opomiya nain ikoka yena Auwa-ke unum maneka iwinon.”

Yeesus ona umowa wame maek

27“Oo-ya, yo kema efar pinar-afuriya. Yo kamenap mainen? Oo Auwa, yo sirirowa aawowa fain efar iirare. Aa wia, moram yo muut nain ekapem. Ne aakisa epa nain fan efar imenariya. 28Oo Auwa, nena unuma ne kekanowa maneka ariman name wue.” Naap maeya iwakara oko iinan-pa feenap maek, “Yo unum maneka iiriw ariman yame wuam, ne ikoka pun nainiw naap oninen.” 29Naeya wi mua teeria maneka nan ikemik nain naap miimap maemik, “Nee, aapereka-ke paranek,” ne papako-ke maemik, “Sa, weetak, ensel-ke opora maakiya.” 30Naap aakunem-ikaiwkin Yeesus-ke wia maakek, “Ni opora eena miimaman nain me yo efa naep maek, weetak. Ni nia naep naap maek, ni makena amisareka naep. 31Aakisa miiw mua wia mekawowa epa fan kereriya. Ne miiw fain woos mua ikoka Mua Maneka-ke iiwawun iirarinon. 32Ne yo ikoka efa fakeriwkin miiw mua unowa yena wia mufep purupemkun efamiya ikaikuan.” 33Yeesus ikoka umowa nain wame maemi naap maek.

34Aria teeria maneka nain-ke maakemik, “Mua Maneka opora feenap maek, Krais anane ikainon. No moram feenap main, Mua Muuka ikoka fakeriwkin uminon. Mua Muuka nain naarew main?” 35Ne wia maakek, “Ni parina epa maala me niar ikainon. Naapeya aakisa parina naap niar ikua nain-pa soomareka, oko epa kokoma-ke nia wakesiminon. Mua epa kokoma-pa soomariya nain kaanek ikiwowa nain me amisarek. 36Mua eena parina niiya nain makena-ke naeka. Naeya ni parin teeria-pa ikowen.” Opora nain wia maakep weesereya wi nainiw me efar ekapuk naep oram mesenalep ikiwok.

Wi Yuuda Yeesus opora me wiar ookamik

37Yeesus mua unowa mokok epa-pa maa miililina onam-ikua, nain wi makena-ke me naem-ikemik. 38Naapeya iiriw Mua Maneka profet Aisaiya maek nain makena wiar arek. Feenap,

“Maneka, i opora maemik nain mua kuisow-ko makena-ke yiar naek-i? Ne pun no kekanowa ariman-ko wueya nefar urufamik-i? Weetak.” (Aisaiya 53.1)

39Naapeya aakisa Yeesus opora maem-ikua nain makena-ke me wiar naemik. Moram Aisaiya opor oko pun feenap maek,

40“Mua Maneka-ke mokoka ne kema wiar iiwkeya wi maa me urufikuan ne o opora kema me wiar suuwikuan. Ne pun wia maek, ‘Wi yia saliwinok naep me efar ekapikuan,’ naap wia maek.” (Aisaiya 6.10)

41Aisaiya iiriw Yeesus kekanowa wiar amisarep o maemi naap maek.

42Ne iir nain wi Yuuda woos mua pun lawisiw unowa Yeesus opora makena-ke naep opora wiar opap ikemik. Nain wi Farisi wia keker opap ariman me maem-ikemik, oko wi sisina-pa yia wuiwkin wiamiya lotu me ariyen, naap maemik. 43Moram wi feenap maemik, i miiwa fain ikowa unum onaiya ikaiyen naemik. Mua Maneka-ke ni mua eliwa-ke yia naowa nain me kema suuwamik.

Yeesus ona opora-ke ikoka mua wia mekawinon

44Aria naap ikok Yeesus opora kerewa maek, “Wi mua yo opora efar opimik nain me yo yaisow opora efar opimik, weetak. Makena, o eena efa sesekak nain pun opora wiar opimik. 45Ne wi mua yo efa urufap anane yo kemaiw ikaimik nain pun naap, aria o eena efa sesekak nain pun naap onimik. 46Yo parina-ke, wi miiw mua parina wiowa ekapem. Ne wi mua yo opora makena efar naimik nain wi parina-pariw efar ikaikuan, epa kokoma-pa me ikaikuan.

47Wi mua eena yo opora efar miimap me opimik nain yos-ke me wia mekawinen, moram yo me nain ekapem, weetak. Wia asipami wia aawowa ekapem. 48Ne wi mua yo efa miatinep opora me efar miimimik nain ikoka opora eena yo maiyem nain-ke wia mekawinon, wiimar miiwa weeserow epa-pa. 49Moram yo me yena kema-pa opora maiyem, weetak. Auwa ona efa sesekak nain-ke efa maakeya maiyem. 50Yo amisarep maiyem, opora eena Auwa maiya nain-ke anane eliwa ikowa nain imeniya. Ne yo opora maiyem nain Auwa ona efa maakiya nain kakeniw naap maiyem.” Naap maek.

Currently Selected:

Yon 12: mhlNT

Highlight

Copy