Lukas 4

Dhèu aae nidhu sèku Lamatua Yesus

(Mateos 4:1-11, Markus 1:12-13)

1Ropa Yohanis sarani nare Yesus, hèia Yesus laꞌe, tèke eele loko Yarden. Roh Ama Lamatua bera-bera dènge Ne, ka pakako Ne asa dꞌara mamoo èci. 2Ka Yesus pea ètu èèna toke èpa nguru lodꞌo. Ètu era neꞌe, naꞌa-ninu boe ngaa-ngaa, ka Na manganga titu kèna. Aa dhèu aae nidhu mai sèku Ne.

3Na peka dènge Yesus, aku nèngu na, “Ladhe Èu ne tareꞌa Ana Ama Lamatua, Èu dènge koasa. De tao hadhu se jꞌajꞌi roti, ho muꞌa si.”

4Te ngaa Yesus bꞌala ne, peka na, “Èu hari! Meꞌa boe, do? Dhu suri tèke le ètu dꞌara Sasuri Ama Lamatua, peka na,

‘Mamuri dhèu rai-haha, mesa boe dhoka nèti ngangaꞌa-nganginu di!’ ”#Lole Hari Jꞌara-jꞌara Mamuri 8:3, Mateos 4:4

5-6Èle èèna ka, dhèu aae nidhu nèti hari Yesus asa era èci dhu dedha aae, hèia na pajꞌujꞌu dènge Yesus aꞌèra dènge koasa paredha aaꞌi-aaꞌi ètu rai-haha ne. Hèia na pamako Yesus, na, “Aꞌèra dènge koasa paredha aaꞌi-aaꞌi sèra, ètu dꞌara kacui-aai jaꞌa. De jaꞌa dènge hak ho pangèdꞌu mi cee èèna ka, sadꞌi jaꞌa koꞌo. 7Aaꞌi-aaꞌi se, jaꞌa neo hia mi Èu. Te ngaa sadꞌi Èu tao ku ca jꞌara, heka jaꞌa hia Èu kèna. Mudꞌa iiki-iiki! Èu pahaha iisi mi jaꞌa! Dhoka èèna di.”

8Te ngaa Yesus dhaa, peka na, “Abhu ètu mia jꞌara na sèmi èèna? Te ètu dꞌara Sasuri Ama Lamatua, dhu suri, na,

‘Èu dhoka pahaha iisi mi Ama Lamatua di.

Aa èu sogo-tagu dhoka mi Nèngu di.’ ”#Lole Hari Jꞌara-jꞌara Mamuri 6:13

9Èle ka, dhèu aae nidhu nèti hari Yesus asa kota Yerusalem. Dꞌai era neꞌe, na pacaꞌe Yesus asa era dhu dedha risi ètu Èmu Kapua Manèngi-Mangajꞌi. Ka na peka, “Ladhe tareꞌa-reꞌa Èu ne Ana Ama Lamatua, na, ridhu asa haha nèi! 10Te dhu suri ètu dꞌara Sasuri Ama Lamatua, peka na,

‘Pe Ama Lamatua pua ana pajuu Na nèti sorga,

ho mai jꞌaga Èu.

11Èèna na ra sibhe Èu,

sèna ka haga Èu goi lèke boe hadhu sa hèi.’ ”#Lii Sodꞌa Koa-Kio 91:11-12

12Te ngaa Yesus bꞌala lii nidhu ne, “Èu baku karihu kahadhu dènge Jaꞌa ne. Lula dhu suri tèke ètu dꞌara Sasuri Ama Lamatua, na,

‘Baku sèku Ama Lamatua.’ ”#Lole Hari Jꞌara-jꞌara Mamuri 6:16

13Dhèu aae nidhu ne tenge jꞌara rupa-rupa ho sèku Yesus, te ngaa tao nare boe. Ka laꞌe tèke eele Yesus, na mate hari lodꞌo dhu beꞌa.

Lamatua Yesus laꞌe Galilea ho lole Lii Lolo Beꞌa Ama Lamatua

(Mateos 4:12-17, Markus 1:14-15)

14Èle èèna ka, Yesus lèpa hari asa propensi Galilea, te Roh Lamatua dhu Mola-Mèci hia Ne koasa. Nèbhu boe ka dhèu-dhèu ètu dꞌara rai èèna, mulai tadhe kolongara Na. 15Na ajꞌa-nori dhèu ètu dꞌara èmu manèngi-mangajꞌi dhèu Yahudi ètu mia-mia. Ka dhèu koa-kio Ne, peka na, “Yesus ne dhu ele madha, nga!”

Dhèu roꞌo boe sèmi rare Lamatua Yesus ètu Nasaret

(Mateos 13:53-58, Markus 6:1-6)

16Ca tèka, Yesus mai asa rae Na Nasaret. Lèke dènge lodꞌo manèngi-mangajꞌi dhèu Yahudi, dhu ra pangare na ‘sabat’, hèia laꞌe asa dꞌara èmu sabajꞌa sèmi dhu tema Na tao. Ka Na kèdꞌi titu ho neo baca nèti Sasuri Ama Lamatua. 17Ka ra jꞌole hia Ne sasuri nèti baki Yesaya. Hèia Na bhoke tenge ayat, ka Na baca, peka na,

18“Koasa Roh Ama Lamatua abhu ètu Jaꞌa.

Nèti èèna ka, Na pajꞌujꞌu Jaꞌa,

ho peka-padhai Lii Lolo Beꞌa Ama Lamatua mi dhèu-dhèu dhu unu aadꞌo.

Nèngu pua le Jaꞌa mai,

ho lole, na,

dhu ana bèdho, èèna na patalala si;

dhu bèdhu, èèna na bisa rèdhi hari;

dhu lèke ènyi nèti dhèu, èèna na patabuli eele.

19Te limuri ne dꞌai le lodꞌo Lamatua,

sèna ka pala mamuri mi dhèu unu Na.”#4:19Ayat dua ra ètu neꞌe madhutu sasuri lii Yunani asli. Alkitab lii Idhonesia (TB) tao nomer 19 ètu era dhu lèke boe. #Yesaya 61:1-2

20Baca nare sasuri ne, ka Yesus lulu hari, hèia Na jꞌole asa ama dhu nèdꞌu kasasi, ka Na madhèdi. Dhèu aaꞌi-aaꞌi ètu dꞌara èmu sabajꞌa èèna ladhe patae Ne. 21Hèia Na peka dènge ra, “Dhu miu tadèngi nèti Sasuri Ama Lamatua deo na, neꞌe ne, jꞌajꞌi le!”

22Ka dhèu sèra mulai padhai lii padedha Yesus, aku rèngu na, “Waa! Ngaa dhu Na padhai lii deo na, beꞌa titu kèna! Te ngaa Nèngu ne Ana Yusuf, si? Tasamia ka Na bisa sèmi neꞌe ne?”

23Hèia Yesus lole dènge si, “Tatu miu tadèngi le lii dhu peka na, ‘Wee, dote! Puri uuru ku ngiꞌu èu!’ Miu neo pake lii èèna, ho kabèli hari sa Jaꞌa, peka na, ‘Nga tao ka Èu tao boe tadha malaa èci hia jiꞌi ètu neꞌe, sèmi dhu Èu tao le ètu kota Kapernaum nèi?’ 24Mamola na sèmi neꞌe: dhèu roꞌo boe sèmi rare dhèu rèti lii padhai Ama Lamatua nèti dꞌara rae unu na.#Markus 6:4, Yohanis 4:44 25-26Tare conto nuka sèmi baki Elia, ca dhèu nèti lii padhai Ama Lamatua. Ca tèka, èjꞌi mai boe tèlu tèu catenga. Taa èèna, abhu bhèni balu ae ètu Israꞌel. Te ngaa Lamatua hia boe Elia ho soru-bara si ètu Israꞌel sèra. Lamatua dhoka pua laꞌe asa ca dhèu bhèni balu ètu rae Sarfat, dhu dètu dènge kota Sidon. Masi ka bhèni ne dhèu Yahudi boe, te ngaa na parcaya koasa Ama Lamatua.#1 Dhèu Aae sèra 17:1,8-16

27Tare hari conto leo nèti Elisa, dhèu nèti lii padhai Ama Lamatua. Taa èèna, dhèu Yahudi ae dhu lèke èi papèdꞌa kusta ètu Israꞌel. Te ngaa Lamatua paꞌèle boe si nèti papèdꞌa ra. Ama Lamatua dhoka pua Elisa laꞌe puri-paꞌèle dhèu kusta èci, ngara na Naaman, masi ka nèngu ne dhèu Siria, dhèu Yahudi boe. Te ngaa na parcaya koasa Ama Lamatua.”#2 Dhèu Aae sèra 5:1-14

28Ropa ra tadèngi lii padhai lii Yesus ne, hèia aaꞌi-aaꞌi ra nasa titu kèna dènge Ne. 29Ka ra kèdꞌi aaꞌi-aaꞌi, ra babège eele Ne nèti dꞌara èmu sabajꞌa èèna. Hèia ra nuni rèti Ne asa karasa rae, ho neo tule Ne nèti dedha tèbhi ètu èèna, asa haha laꞌe. 30Te ngaa Na kako asa liꞌu laꞌe re talora aae rèngu, ka tèke eele si ètu era èèna.

Lamatua Yesus babège eele nidhu nèti dhèu èci

(Markus 1:21-28)

31Èle èèna ka, Yesus puru laꞌe asa kota Kapernaum ètu sebhe dano Galilea. Dꞌai lodꞌo-lodꞌo sabajꞌa, Na ajꞌa-nori dhèu ètu dꞌara èmu manèngi-mangajꞌi. 32Dhèu sèra malaa ladhe ra nanene lii padhai Na, te neꞌa mèu isi lii holo-nori sèra.#Mateos 7:28-29

33Ca tèka, ropa Yesus ajꞌa-nori ètu dꞌara èmu manèngi-mangajꞌi, abhu ca dhèu dhu nidhu tao, na paꞌoo-parodha, peka na, 34“Ee! Yesus, Dhèu Nasaret! Èu neo tao ngaa mi jiꞌi? Èu mai sèna ka palaho jiꞌi, do? Jiꞌi se tadhe Èu. Èu ne, Dhèu Mola, dhu uru èèna Ama Lamatua pajaji tèke ho hia mai.”

35Te ngaa Yesus jèke ne, peka na, “Rèno laa! Hutu hèbꞌa èu na! Kalua ka nèti dhèu neꞌe!” Cagꞌagꞌa laa, nidhu dedꞌe kalabhe dhèu ne asa rai, ètu talora aae dhèu sèra. Ropa pabèbhe nare, hèia nidhu ne kalua tèke eele aa papèdꞌa boe isi dhèu ne hèi.

36Dhèu aaꞌi-aaꞌi malaa-maloha, ka ra peka na, “Ira ii! Lii padhai Dhèu neꞌe, dènge koasa kapai bia! Toke nidhu madhutu paredha Na kahèi, ka kalua nèti dhèu!” 37Hèia lii lolo lula-nèti Yesus pale-lème rai èèna aaꞌi-aaꞌi.

Lamatua Yesus paꞌèle papèdꞌa ina dhèu èmu Petrus, dènge papèdꞌa dhèu-dhèu leo

(Mateos 8:14-17, Markus 1:29-34)

38Lodꞌo rèngu kalua nèti èmu sabajꞌa, Yesus laꞌe asa èmu dhèu èci, ngara na Simon.#4:38Simon ne, ngara leo na, Petrus. Lodꞌo èèna, teto na dhu pèdꞌa maringi-sagoro isi pana bia. Hèia ra manèngi Yesus, peka na, “Ama! Puri-paꞌèle ku bhèni heka ne, laa!” 39Ka Yesus laꞌe titu ètu sebhe koi, ka puri papèdꞌa bhèni heka ne. Cagꞌagꞌa laa, èi papèdꞌa na ele dènge ka. Hèia na kèdꞌi laꞌe lalau ngangaꞌa hia si raꞌa-rinu.

40Ètu dꞌara lodꞌo nihia èèna kahèi, ropa lodꞌo oe cèna, dhèu lere rèti dhèu pèdꞌa ae-ae mai asa Yesus. Èi papèdꞌa ra rupa-rupa. Hèia Na bane ai mi dhèu pèdꞌa seꞌe, ka aaꞌi-aaꞌi ra èle nèti papèdꞌa-tarègu ra. 41Nèti dhèu pèdꞌa se abhu kahèi dhu nidhu tao. Hèia Yesus paredha nidhu se, sèna ka kalua nèti dhèu sèra. Ra rai kalua dènge lii taraa, peka na, “Èu ne, Ana Ama Lamatua!” Te nidhu se reꞌa, na, Nèngu ne Kristus, dhu Ama Lamatua pajaji karèi nèti uru ka, ho hia mai. Nèti èèna ka, Yesus kai si sèna ka bisa boe ra padhai ca hèbꞌa sa, lula-nèti Nèngu.

Lamatua Yesus laꞌe lole Lii Lolo Beꞌa ètu èmu-èmu sabajꞌa

(Markus 1:35-39)

42Asa bèli dꞌara oe mèu sa, Yesus kèdꞌi, ka laꞌe asa era dhu kaliu èci ètu liꞌu kota. Hèia dhèu tenge Ne asa mia-mia. Ropa paraga dènge Ne, ka ra pamako Ne, aku rèngu na, “Ama pea ka dènge jiꞌi laa! Lamu iia ka asa era leo!”

43Te ngaa Na dhaa, aku Nèngu na, “Jaꞌa hudꞌi laku asa rae-rae leo, ho peka-padhai Lii Lolo Beꞌa nèti paredha Ama Lamatua. Te Ama Lamatua pua Jaꞌa mai ne, sèna ka pakako sasabꞌa èèna.”

44Hèia Na kako nèti rae èci asa rae leo, ho ajꞌa-nori dhèu ètu dꞌara èmu-èmu sabajꞌa ètu propensi Yudea.

Currently Selected:

Lukas 4: nfaNTPO

Highlight

Copy