Markus 11

Yesus tama Yerusalem, ema waꞌin simu Nia hanesan naꞌin boot

(Mateus 21:1-11; Lukas 19:28-40; Yohanis 12:12-19)

1Hotu, Yesus sia laꞌo liu toꞌo kreꞌis Yerusalem. Sia nanawa sala-sala kreꞌis leo rua iha Foho Saitun#11:1Sia nanaran foho nia ‘Saitun’, tan iha nia no toꞌos ai saitun waꞌin. Ai saitun fuan, sia nalo baa mina. Foho Saitun nia, takseer dook nosi Yerusalem, kilo ida. tehen. Leo rua nia, ida naran Betfage, ida naran Betania. Iha nia, Yesus naruka Niakaan maktuir naꞌin rua baa uluk. 2Nia katak naꞌak, “Emi naꞌin rua baa uluk leo nebaa. Oras tama baa, emi atu haree kuda keledai oan matan ida mak ema kesi iha nia. Kuda keledai nia, ema sei la saꞌe dauk. Baa kore hola hodi mai. 3Kalo ema nusu naꞌak, ‘Tan saa emi kore kuda keledai nia?’ emi musti hataa haꞌak, ‘Naꞌin atu saꞌe. Saꞌe notu, Nia solok fila kedan.’ ”

4Rona nola nunia, maktuir naꞌin rua nia baa. Toꞌo baa, sia netan kuda keledai oan nia, ema kesi iha dalan tehen. Sia moos kore nola, atu nodi baa Yesus. 5Haree nunia, ema mak nariik iha nia sia nusu naꞌak, “Tan saa emi kore hola ema niakaan kuda keledai nia?”

6Sia moos nataa naꞌak, “Naꞌin atu saꞌe. Saꞌe notu, Nia solok fila mai kedan.” Rona nola nunia, ema nia sia nabusik sia nodi baa. 7Toꞌo Yesus baa, sia nola tais nalo baa sela, taka baa kuda keledai nia. Hotu, Yesus saꞌe baa.

8Oras Yesus sia tama kota laran, ema waꞌin moos nola siakaan tais, naꞌe baa dalan klaran. Balu baa taa nola beet tahan#11:8Markus niakaan hakerek naꞌak ‘ai lain’. Mais ita hatene hosi Yohanis 12:13 naꞌak, ai lain nia ‘beet tahan’. iha dalan tehen, nodi baa, naꞌe keke iha dalan klaran. Nodi nafutar nunia, sia foo tadak naꞌak, sia simu Yesus nodi kneter, hanesan sia simu naꞌin boot. 9Ema nia sia balu laꞌo uluk Yesus, balu tenik nosi kotuk. Sia nahii bele-bele naꞌak,

“Hosana! Ami tonu-haboot Naꞌi Maromak,#11:9Siakaan lia fuan ‘Hosana’ nia naꞌak ‘foo moris’. Sia katak lia fuan nia bodik tonu-naboot Naꞌi Maromak.

tan Nia natuun matak-malirin baa Ema mak mai nodi Niakaan naran.#Kananuk Sia 118:26

10Hosana! Ami tonu-haboot Naꞌi Maromak,

tan Nia atu nariik nikar Naꞌi Daud fohorain!

Hosana! Ami tonu-haboot Naꞌi Maromak,

tan Nia nabesi aan iha laleꞌan mak aas kaliuk!”

11Toꞌo kota laran, Yesus sia tama baa Uma Hamulak Huun. Iha Uma Hamulak Huun lalawar, Nia titu satan leur fatik nia. Mais, tan atu kalan ona, sia moos fila baa leo Betania.

Yesus nasee ai huun ida nebee keta nafua ona

(Mateus 21:18-19)

12Baa awan seisawan, Yesus sia sai nosi Betania, baa nikar Yerusalem. Toꞌo dalan klaran, Yesus salaen. 13Nia naree ai huun ida iha dalan tehen. Ai nia fuan ema bele naa.#11:13Iha Hakerek Moon lia Yunani, ai huun nia naran ‘sukei’. Hakerek Moon tuir lia Indonesia naꞌak ‘pohon ara’. Mais, ‘sukei’ natudu ai huun ida mak ema kuda atu naa fuan. Iha rai Timor, ema la naa ‘ai huun ara’ fuan. Dadi, ai huun ‘sukei’ iha Hakerek Moon, la manesak no itakaan ai huun ‘ara’ iha rai Timor. Hotu, Yesus nareꞌis aan baa, atu naree kokon ai nia noo fuan ka lale. Mais, ai nia la no fuan, tan foin nataha. 14Naree nunia, Yesus nasee ai nia naꞌak, “Tan o la mafua bodik Haꞌu, nahuu baa oras neꞌe moos, o la mafua tenik bodik ema ona!”

Yesus Niakaan maktuir sia moos rona Nia nasee nunia.

Yesus tama baa Uma Hamulak Huun nodi sobu karin ema makfaꞌan iha nia

(Mateus 21:12-17; Lukas 19:45-48; Yohanis 2:13-22)

15Yesus sia laꞌo liu toꞌo kota Yerusalem, hotu tama tenik baa Maromak Uma Hamulak Huun. Iha lalawar nia, noo ema mak faꞌan manu lakateu sina mak ema nalo baa sera oras namulak. Titu-naree nunia, Yesus baa teꞌur sai sia. Nia soe karin hadak mak ema nalo baa fatik taruka osan. Nia moos baku fila fatik mak ema nodi faꞌan manu lakateu. 16Nia moos badu ema hotu-hotu, nebee keta hodi siakaan naha sai-tama tesi tuir Uma Hamulak lalawar nia. 17Hotu, Nia katak baa ema nia sia naꞌak, “Hori uluk Maromak naruka Niakaan makoꞌan nakerek nela naꞌak, ‘Haꞌu kariik Haꞌukaan Uma, nebee ema raiklaran tomak bele mai namulak baa Haꞌu iha nia!’ Emi hatene lia nia tiꞌan, mais emi sei halo luku Uma neꞌe dadi baa ema naꞌok nuuk!”#Yesaya 56:7; Yeremia 7:11

18Oras naꞌilulik no manorik ukun Yahudi sia rona lia nosi Yesus Niakaan hahalok nia, sia hirus tebes. Sia buka dalan atu noꞌo Yesus, mais sia nakerat ema waꞌin mak beer basuk Yesus Niakaan hanorin.

19Kreꞌis loro monu, Yesus sia sai nela kota Yerusalem, fila baa toba iha Betania.

Kalo ita fiar metis baa Naꞌi Maromak, nanis Nia foo saa mak ita husu

(Mateus 21:20-22)

20-21Baa awan seisawan, Yesus sia fila nikar baa Yerusalem. Toꞌo dalan klaran, sia laꞌo liu ai huun mak hori sehik Yesus nasee nia. Niakaan maktuir sia blaar, tan ai nia mate maran tiꞌan toꞌo abut. Petrus moos nanoin nola Yesus nasee hori sehik nia, hotu katak baa Yesus naꞌak, “Ama Boot! Haree lai! Ai huun mak Ama nasai lian manas hori sehik nia, mate maran tiꞌan!”

22Yesus nataa naꞌak, “Tebes! Surak emi fiar baa Naꞌi Maromak. 23Kalo emi fiar tebe-tebes, emi bele haruka foho ida nakfokit lori baa tasi. Nanis foho nia nakfokit lori baa tasi, surak emi fiar metis hodi neon no laran.#Mateus 17:20; 1 Korintus 13:2 24Keta haluꞌa! Kalo emi hamulak hodi husu sa-saa baa Naꞌi Maromak, Nia nanis foo baa emi. Surak emi fiar tebe-tebes! 25Mais baa oras hamulak, kalo ema ida nosi emi laran sei manas no ema seluk, musti baa diꞌak hikar ho ema nia lai. Foin, emikaan Ama iha laleꞌan kasu mohu emikaan salan. 26[Kalo emi rai hirus hodi la foo pardua baa ema, emikaan Ama iha laleꞌan moos la foo pardua baa emi.”]#11:26Tohar 26 nia la tama iha Hakerek Moon lia Yunani balu. #Mateus 6:14-15

Ema boot sia nalo lia nosi Yesus beran

(Mateus 21:23-27; Lukas 20:1-8)

27Nunia hotu, Yesus sia laꞌo liu. Toꞌo Yerusalem baa, sia tama nikar baa Uma Hamulak Huun. Baa oras tama baa lalawar, naꞌilulik ulun sia no manorik ukun sia mai 28nusu baa Yesus naꞌak, “Tan saa hori sehik O mai tokar lauk iha neꞌe?! See mak naruka O?”

29Mais Yesus natene sia buka Niakaan ain. Hotu, Nia nataa naꞌak, “Haꞌu moos kakara kusu lia ida baa emi. Emi hataa Haꞌu lai, foin Haꞌu kataa emi. 30Haꞌu kakara kusu nuneꞌe: ita hotu-hotu hatene Yohanis nia mak sarani ema. See mak latan beran baa nia, nebee nia sarani ema? Naꞌi Maromak ka, ema raiklaran?”

31Rona nola nunia, sia nanoin baa-mai. Hotu, sia kabuar lia fuan naꞌak, “Adeei! Ita kona diꞌa tiꞌan! Kalo ita hataa haꞌak, ‘Naꞌi Maromak mak latan beran,’ Nia atu nataa nikar naꞌak, ‘Kalo nunia, tan saa emi la fiar Yohanis?’ 32Mais ita moos la bele hataa haꞌak, ‘Ema raiklaran mak latan beran’ keta arumak ema lear krakat ita, tan sia fiar naꞌak, Yohanis nia, Maromak makoꞌan.”

33Koꞌa notu lia, sia nataa badak dei naꞌak, “Ami la hatene!”

Yesus moos nataa nikar baa sia naꞌak, “Kalo nunia, Haꞌu moos la katak baa emi, see mak latan beran baa Haꞌu.”

Currently Selected:

Markus 11: tetNTPO

Highlight

Copy