Lukas 4

Diabu ulun sokur Yesus

(Mateus 4:1-11; Markus 1:12-13)

1Yesus simu sarani tiꞌan, Nia laꞌo nela mota Yordan. Maromak Kmalar Lulik namutuk no Nia, no nalaꞌo Nia baa fatin fuik ida. 2Yesus nein iha fatin nia toꞌo loron haat nulu. Nia la naa sa-saa, toꞌo salaen mate. Hotu diabu ulun mai sokur kokon Nia.

3Nia dale baa Yesus naꞌak, “Kalo O Naꞌi Maromak Oan tebes, O moo beran. Dadi maruka fatuk neꞌe sia dadi tubi, nebee O maa toꞌo bosu.”

4Mais Yesus nataa naꞌak, “Lale! Hakerek Moon naꞌak,

‘Ema raiklaran moris lahoos nosi haan dei!’ ”#Hanoin Hikar Dalan Moris 8:3; Mateus 4:4

5-6Nunia hotu, diabu ulun nalaꞌo Yesus baa fatin aas ida. Nia natudu kabaas nosi ukunrai hotu-hotu iha raiklaran. Nia namaus Yesus naꞌak, “Ukunrai beran no kabaas hotu-hotu neꞌe sia, haꞌukaan. Haꞌu koo beran atu kfoo baa see dei mak kakara. 7Haꞌu kbele foo baa O, surak O loꞌu-sudur baa haꞌu. Nia dei!”

8Mais Yesus nataa naꞌak, “Lale! Hakerek Moon naꞌak,

‘Ita musti loꞌu no sudur baa Naꞌi Maromak dei.

Nia, mak ita musti haliku.’ ”#Hanoin Hikar Dalan Moris 6:13

9Nunia hotu, diabu ulun nalaꞌo Yesus baa kota Yerusalem. Hotu nia nodi Yesus saꞌe baa fatin mak aas kaliuk iha Uma Hamulak Huun. Hotu nia katak naꞌak, “Kalo O Naꞌi Maromak Oan tebes, soe aan tuun ona! 10Tan Hakerek Moon naꞌak,

‘Naꞌi Maromak atu naruka Niakaan makbukar laleꞌan sia,

nebee sia daka nola O.

11Sia mai tane nola O,

nebee Okaan ain la roos aan baa fatuk.’ ”#Kananuk Sia 91:11-12

12Mais Yesus nataa naꞌak, “Keta kli-liꞌis mo haꞌu. Tan Hakerek Moon naꞌak,

‘Keta sokur Maromak!’ ”#Hanoin Hikar Dalan Moris 6:16

13Hodi nunia, diabu ulun koko Yesus nodi dalan oi-oik, mais la bele sokur nola. Hotu, nia nakiduk nela Yesus atu nein leet seluk.

Yesus baa Galilea atu nahuu katak lia Naꞌi Maromak

(Mateus 4:12-17; Markus 1:14-15)

14Nunia hotu, Kmalar Lulik nalaꞌok Yesus fila nikar baa rai Galilea. La kleur, ema rai nia tomak natene tiꞌan Niakaan naran. 15Nia nanorin iha ema Yahudi siakaan uma hamulak sia. Ema hotu-hotu mose naꞌak, “Yesus nia, makaꞌas tebes!”

Ema iha Yesus leon duꞌuk la simu Nia

(Mateus 13:53-58; Markus 6:1-6)

16Dala ida, Yesus mai Niakaan leo Nasaret duꞌuk. Natoon baa ema Yahudi siakaan loron hamulak, Yesus tama uma hamulak hanesan Nia nalo sura loron hamulak. Iha uma hamulak nia laran, Nia nariik atu leno Hakerek Moon. 17Sia lolo foo Bei Yesaya niakaan hakerek. Nia loke, hotu leno naꞌak:

18“Naꞌi Maromak Kmalar Lulik natuun beran baa Haꞌu.

Nia boi Haꞌu

atu katak Manfatin Diꞌak baa ema susar.

Nia solok Haꞌu

atu katak kaꞌak,

ema bui, atu sai;

ema delek, atu naree;

ema mak oin kraik, atu foti ulun.

19Tan oras neꞌe, Naꞌi Maromak oras toꞌo tiꞌan

atu sori Niakaan ema.”#Yesaya 61:1-2

20Leno notu, Yesus lulun nikar hakerek nia, hotu foo baa uma hamulak ulun. Hotu Nia tuur. Ema hotu-hotu iha nia nobun Nia bei-beik. 21Hotu Nia katak baa sia naꞌak, “Lia mak emi rona ohin nia, oras neꞌe dadi tiꞌan!”

22Rona nola nunia, ema nia sia mose Yesus naꞌak, “Adeei! Saa mak Nia dale ohin nia, kabaas liu! Mais Nia neꞌe, Yusuf oan! Tan saa bele nuneꞌe?”

23Yesus nataa naꞌak, “Noo lia hatetek naꞌak, ‘Hoi, makdook! Malo okaan isin lolon diꞌak uluk lai, foin madiꞌak ema seluk.’ Nanis emi hatene tiꞌan lia hatetek nia. Emi balu hakara hodi lia nia taꞌe fila Haꞌu, hodi husu Haꞌu haꞌak, ‘Tan saa O la maseꞌi tadak blaar bodik ami iha neꞌe, hanesan uluk O maseꞌi iha kota Kapernaum?’ 24Rona, tan Haꞌukaan dalen neꞌe, tebes no loos! Ema la nakara simu Maromak makoꞌan iha siakaan leo duꞌuk.#Markus 6:4; Yohanis 4:44 25-26Hola lia hatetek ida hosi Maromak makoꞌan uluk Elia. Baa dala ida, udan la tau rai tinan tolu no balun. Baa oras nia, feto faluk waꞌin iha Israꞌel. Masik nunia moos, Naꞌi Maromak la solok Elia baa tulun sia hotu iha Israꞌel. Nia solok Elia baa feto faluk mesak ida iha leo Sarfat kreꞌis kota Sidon. Tuir loos, ferik nia lahoos ema Yahudi, mais tan nia fiar baa Naꞌi Maromak.#1 Naꞌi Israꞌel Sia 17:1,8-16

27Hola lia hatetek seluk hosi Maromak makoꞌan Elisa. Baa oras nia, ema Yahudi waꞌin moras funi mea iha Israꞌel. Mais Naꞌi Maromak la nadiꞌak nola sia. Naꞌi Maromak naruka Elisa nadiꞌak nola ema moras funi mea mesak ida dei. Ema nia, naran Naaman. Tuir loos, nia ema Siria, lahoos ema Yahudi, mais tan nia fiar baa Naꞌi Maromak.”#2 Naꞌi Israꞌel Sia 5:1-14

28Rona Yesus dale nunia, sia hotu-hotu krakat. 29Sia nariik bele-bele, nabuꞌa sai Nia nosi uma hamulak nia. Sia dada nodi Nia baa leo diꞌin, atu soe baa horun laran. 30Mais Nia sai luku tuir ema lear nia leet. Hotu Nia laꞌo nela sia.

Yesus teꞌur sai diabu nosi ema ida

(Markus 1:21-28)

31Nunia hotu, Yesus tuun baa kota Kapernaum iha debu boot Galilea tehen. Sura loron hamulak, Nia nanorin ema iha uma hamulak Yahudi. 32Ema mak nanono Nia dale, blaar karin tan Nia natene tebes hanorin nia isin.#Mateus 7:28-29

33Dala ida, oras Yesus nanorin iha uma hamulak, noo ema ida mak diabu tekar. Nia nakrake makaꞌas naꞌak, 34“Hoi Yesus, ema Nasaret! O moo lia saa mo ami! O mai atu madodok ami ka? Ami hatene O. O neꞌe, Ema Moon mak uluk Naꞌi Maromak nameno atu solok mai.”

35Mais Yesus nakanas nia naꞌak, “Taka ibun! Sai mela ema nia!” Teki-tekis diabu nia foti ema nia nitak baa rai iha ema sia leet. Nitak notu, diabu moos sai nela nodi la nahoras tenik nia.

36Ema hotu-hotu blaar. Sia dale naꞌak, “Ita blaar tebes! Ema neꞌe dalen, noo beran makaꞌas! Toꞌo diabu sia moos tuir Niakaan haruka nodi sai nela ema!” 37Hotu ema nia sia laꞌo nasirin rai nia, katak lia nosi Yesus baa ema hotu-hotu.

Yesus nadiꞌak nola Simon banin feto no ema waꞌin

(Mateus 8:14-17; Markus 1:29-34)

38Yesus sai nosi uma hamulak nia tiꞌan, Nia baa ema ida uman. Ema nia naran, Simon.#4:38Simon nia, Petrus naran ida seluk. Simon banin feto moras kiki. Sia nusu baa Yesus naꞌak, “Ama! Tulun madiꞌak mola ferik nia lai!” 39Rona nola nunia, Yesus baa nariik kreꞌis ferik nia toba fatin. Hotu Nia teꞌur sai moras kiki nia nosi nia. Oras nia moos, moras kiki nia lakon kedas. Ferik nia moos nadeer kedan, baa nadiꞌa haan bodik sia.

40Kreꞌis loro monu ona, ema loi nodi siakaan ema mak moras oi-oik baa Yesus. Nia rai liman baa, nadiꞌak nola sia hotu-hotu. 41Ema mak moras nia sia, naꞌin hira diabu tekar. Yesus moos nesi diabu sia sai nela ema nia sia. Sia sai nodi nakrake naꞌak, “O neꞌe, Naꞌi Maromak Oan!” Tebes. Diabu nia sia natene naꞌak, Yesus nia, Kristus, mak uluk Naꞌi Maromak nameno atu solok mai. Tan baa nia, Yesus nakahik diabu sia nebee keta dale lia fuan ida moos nosi Nia.

Yesus baa katak Manfatin Diꞌak iha uma hamulak sia

(Markus 1:35-39)

42Baa awan kreꞌis rai naroma, Yesus nadeer atu baa fatin mamuk ida iha kota luan. La kleur, ema buka Nia nasiri fatin hotu-hotu. Sia nasoru tiꞌan, sia namaus Nia naꞌak, “Ama, mein mo ami dei! Lalika baa fatin seluk sia!”

43Mais Yesus nataa naꞌak, “La bele! Haꞌu kmusti baa leo seluk sia atu katak Manfatin Diꞌak nosi Naꞌi Maromak ukunrai. Tan Nia solok Haꞌu kmai atu kalaꞌok serwisu nia.”

44Hotu Yesus nosi leo ida baa leo ida iha rai Yudea, nodi nanorin iha uma hamulak sia.

Currently Selected:

Lukas 4: tetNTPO

Highlight

Copy