Lia Uluk Fohon 20

Abraham no naꞌi Abimelek

1Hotu, Abraham lori nosi Mamre baa rai Negeb iha rai Kanaꞌan lorokbelan. Nia nein iha fatin ida iha leo Kades no leo Syur leet. Hotu, nia lori tenik baa leo Gerar atu nein heik iha nia. 2Toꞌo nebaa, nia katak baa ema naꞌak, Sara nia, niakaan alin. Oras nia, naꞌi rai Gerar naran Abimelek. Rola nola lia nia, Abimelek naruka niakaan ema sia baa saka nola Sara, nodi baa naꞌin tofatik. 3Mais kalan ida, Maromak natadu aan baa Abimelek tuir meꞌi naꞌak, “O makara buka mate mak neꞌe! Tan o mola ema seluk feen.”

4-5Mais naꞌin simu naꞌak, “Naꞌi Maromak! Haꞌu ksei la rose aan baa feto nia. Haꞌu la sala. Abraham mak naꞌak duꞌuk, feto nia niakaan alin! Feto nia duꞌuk moos katak nunia! Tan lia nia, haꞌu karuka ema baa nola nia, kodi neon moos! Dadi Naꞌi Maromak keta masalak haꞌu!”

6Hotu, Maromak nataa naꞌak, “Tebes. Haꞌu katene o neon moos! Tan baa nia, Haꞌu ksaseni o, nebee keta rose aan baa feto nia! Hodi nunia, o la malo sala. 7Oras neꞌe, o musti solok fila feto nia baa laꞌen! Laꞌen nia, Haꞌukaan makoꞌan. Musu nia namulak bodik o, nebee o keta mate. Mais, kalo o la solok fila, manoin diꞌa-diꞌak! Tan o mo okaan ema sia hotu-hotu nanis mate!”

8Baa seisawan, Abimelek bolu nola niakaan klosan sia, hotu nasara meꞌi nia. Rona meꞌi nia, sia hotu-hotu nataꞌuk. 9Hotu, Abimelek bolu nola Abraham nodi nusu naꞌak, “Haꞌu kalo sala saa baa o, toꞌo o malo dinu kona baa haꞌu ko haꞌukaan renun nuneꞌe? La bele malo nuneꞌe. 10O maneo saa, toꞌo malo nuneꞌe?”

11Abraham nataa naꞌak, “Ama Naꞌi! Haꞌu kaꞌak falik emi la hatene Maromak! Tan baa nia, kataꞌuk ema atu noꞌo haꞌu, hotu nola haꞌukaan feen. 12Haꞌu kdale nia tebes, tan nia haꞌukaan alin tebes. Ami, aman ida, inan rua! Tan baa nia, ami hola malu dadi baa feen-laꞌen! 13Dadi, baa oras Maromak naruka ami rua baa ema rain, haꞌu katak baa haꞌukaan feen kaꞌak, ‘Kalo ita rua baa nabee dei, hotu ema nusu itakaan hatalin malu neꞌe, kalo o madomi haꞌu, o mataa maꞌak ita rua feton-naan’.”

14-16Rona nola nuneꞌe, naꞌi Abimelek foo fila Sara nodi katak baa naꞌak, “Oras neꞌe, haꞌu kselu baa okaan naan osan murak tomak rihun ida, dadi tadak naꞌak, haꞌu la kalo sala saa ida ko o! Nebee, ema hotu-hotu natene!”

Hotu, naꞌin dale baa Abraham naꞌak, “Abraham! Haꞌukaan rai neꞌe, luan bodik o. O makara mein iha nabee dei moos, bele.” Hotu, naꞌin latan baa Abraham, karau baka, bibi no bibi malae. Naꞌin moos latan ata feto, ata mane.

17-18Uluk, MAROMAK taka notak feto hotu-hotu mak nein iha Abimelek rain, tan Abimelek nadau nola Abraham feen. Mais, oras Abimelek foo fila Sara, Abraham moos namulak, nebee Maromak loke nikar feto hotu-hotu notak. Hamulak tiꞌan, feto mak iha rai nia nahuu nahoris tenik.

Currently Selected:

Lia Uluk Fohon 20: tetNTPO

Highlight

Copy