Romanos 14

Lá inisi be xmen Cristo be ltsaꞌa na

1Utsin gok bega ndoꞌ bexa tilaw ndangea ladna Cristo, lá kuyotoꞌono bega xa. 2Leꞌa ncho bexa ndab syoꞌo gan gaw itea be taꞌa, ná leꞌa ncho bexa tilaw ndangea ladna Cristo ndi ndaw xa sbeꞌen ta ugeꞌa. 3Leꞌa bexa na ndaw itea be taꞌa wa lá nsabndoꞌ inisi bexa na lá ndaw‑a. No liga leꞌa bexa na lá ndaw itea be taꞌa lá nsabndoꞌga inisi bexa na ndaw ta wa, leꞌa iteanak bexa wa dubtsa nsak ndoꞌ Dios. 4¿Ton nak bego nisi bega bexa wa, bexa na no ndun tiꞌin ndoꞌ Dios? Leꞌa Dios leꞌa nak xa nibeꞌe bexa wa, gab xa tal leꞌa ta ndun bexa wa ta wen natal ta lid leꞌa nak‑a. Leꞌa Dios ndap juers ndakno xa bexa gun bexa ta wen.

5Leꞌa ncho bexa ndab leꞌa dub wizh mas nsak ndoꞌ stub wizh, no ncho bexa ndab leꞌa itea be wizh parej nak. Leꞌa kadga dub beuna nsabndoꞌ iniꞌí xteꞌe ndanbeꞌe beuna cuent ten ta wa. 6Leꞌa xa na ndab leꞌa dub wizh mas nsak ndoꞌ stub wizh wa, no xa na ndab leꞌa itea be wizh parej nak wa, leꞌa itop bexa wa nsak leꞌa ta ndun xa wa ta nsak ladna Dios. No liga leꞌa xa na ndaw itea be taꞌa wa no xa na lá ndaw‑a, leꞌa itop bexa wa nsak leꞌa ta ndun xa wa ta nsak ladna Dios, no nsaꞌa bexa xno ndoꞌ Dios.

7Leꞌa zha nban beuna no zha gat beuna leꞌa beuna naꞌanpa leꞌa nibeꞌe beuna. 8Leꞌa zha nban beuna leꞌa beuna nde ndoꞌ yaꞌa Dios. No zha gat beuna, leꞌa beuna nde ndoꞌ yaꞌaka Dios. Tal nban beuna natal gat beuna, leꞌa beuna ndeka ndoꞌ yaꞌa Dios. 9Leꞌa Cristo ngut no mban xa ndontsa gak xa Xa Nibeꞌe ten bexa ngut nsea bexa nban.

10¿Parea xtaꞌan nisi bega stub xa no nak xmen Cristo zhaga? ¿No xtaꞌan ndab bega zha leꞌa bega mas nsak ndoꞌ xa wa? Leꞌa gal dub wizh leꞌa beuna itea kwe ndoꞌ Cristo. 11Lak nkeaniꞌi diꞌizh ten Dios, ndab Dios:

Leꞌa naꞌ gáp leꞌa itea be men isaxib ndoꞌ naꞌ.

No igondoꞌ iteanak be men leꞌa naꞌ leꞌa nak Dios.

12Leꞌa ta wa gab leꞌa kadga dub beuna isoꞌ ndoꞌ Dios, gab beuna ndoꞌ Dios ná xtaꞌan mbin beuna.

Lá gun beuna dub ta utsabgix stub xa

13Ta weꞌe lá nsabndoꞌ inisi beuna stub xa no nak xmen Cristo. Ndi ulaꞌach beuna lá gun beuna dub taꞌa utsabgix xa ndoꞌ ta ugap. 14Leꞌa naꞌ uní lak mluu Jesús ndoꞌ naꞌ, leꞌa ni dub ta ndaw men naꞌanpa gab Dios lá gaw beuna‑yá. Ná leꞌa tal ton gunbeꞌe leꞌa Dios lá nlad gaw xa dub taꞌa, leꞌa xa wa lá nsabndoꞌ gaw ta wa. 15Ná leꞌa tal ta ndaw bega wa gun lá utsin yoo ladna dub ltsaꞌa bega, leꞌa ta wa nluu leꞌa bega naꞌanpa nkweaꞌ ladna xa wa. Leꞌa Cristo no sakndoꞌ xa wa ngut, ta weꞌe leꞌa bega lá nsabndoꞌ gaw dub taꞌa tal leꞌa ta wa utsabgix ltsaꞌa bega wa. 16Tal leꞌa bexa no nak xmen Cristo gab leꞌa ta ndun bega wa ta lid leꞌa nak, yá gunta bega ta wa. 17Leꞌa lak nibeꞌe Dios beuna, leꞌa ta ndaw beuna no ta ndo beuna naꞌanpa ta nsak. Leꞌa ta nsak wa ndi ta ndun beuna ta utsin nak, no wen nchono beuna be ltsaꞌa beuna, nsea nten ladna beuna, lak nsaꞌa Espíritu ten Dios. 18Leꞌa tal ton bexa li gun tiꞌin ndoꞌ Cristo, leꞌa Dios isak ladna lak nak bexa wa no gab be men leꞌa bexa wenka nak.

19Leꞌa beuna nsabndoꞌ gunta ta gun wen yoono beuna be ltsaꞌa beuna no ta gakno bexa wa. 20Lá ulaꞌa bega leꞌa ta ndaw bega wa utsabgix stub xmen Cristo. Leꞌa itea be ta ndaw be men wa umbiꞌi nak ndoꞌ Dios, parea tal leꞌa ta ndaw beuna gun leꞌa stub xa gailaꞌ ndoꞌ ta ugap, leꞌa beuna lá nsabndoꞌ gaw ta wa. 21Mas wen lá gaw beuna beꞌal, no ni lá goo beuna ta nsudna men, no ni lá gun beuna ni stub taꞌa, tal leꞌa ta wa utsabgix stub xa, natal lá utsin yoo ladna xa, natal gach ladna xa. 22Leꞌa ta ndanbeꞌe bega cuent ten be ta ndee wa, leꞌa ta wa leꞌatsa bega uniꞌí nsea Dios. Uzheꞌeb wen yoo ladna bexa na uniꞌí len ladoꞌo na leꞌa utsin ndun ndoꞌ Dios. 23Ná leꞌa tal ton gaw dub taꞌa ndanbeꞌe xa lá nsabndoꞌ gaw xa, leꞌa ta wa dub ke geal leꞌa xa naꞌanpa ndun lak ndanbeꞌe xa len ladoꞌo xa. Leꞌa itea be ta ndun bega tal ndanbeꞌe bega leꞌa ta wa lid leꞌa nak, leꞌa ta wa dub ke ndoꞌ Dios.

Currently Selected:

Romanos 14: zpt

Highlight

Copy