San Marcos 10
10
Jesús ndab leꞌa be men lá nsabndoꞌ ulaꞌa xa ten na
(Mt. 19:1-12; Lc. 16:18)
1Leꞌa Jesús cha utoꞌo gezh wa nchaꞌa xa distrit Judea no stub toꞌo yowbeꞌe Jordán lad nlen wizh. Cha usaxangal mzhealbe kwaꞌad be men wats Jesús. Leꞌa Jesús cha mluugal bexa lakka ndun xa. 2Weꞌe leꞌa pla bexa fariseo ulen wats Jesús, nlad bexa gab Jesús dub ta lid leꞌa nak. Ta weꞌe unabdiꞌizh bexa ndoꞌ Jesús ndab bexa:
—¿Utsin nak ulaꞌa dub xabgiꞌi xagots ten na zha?
3Leꞌa Jesús cha ukaꞌab ndab xa:
—¿Xteꞌe ndab ley mkeꞌa Moisés, ta unibeꞌe Dios wa zha?
4Leꞌa bexa cha ukaꞌab ndab:
—Leꞌa ley mkeꞌa Moisés ndab syoꞌo gan ulaꞌa dub xa xagots ten xa, tal ned usaꞌa xa dub git ndoꞌ xagots wa, gab‑a leꞌa xa ulaꞌa xa wa.
5Cha ukaꞌab Jesús ndab xa:
—Geal ngud nak ladoꞌo bega, ta weꞌe mkeꞌa Moisés ta wa. 6Ná leꞌa zha utexan gizhliyo leꞌa Dios mbindeꞌe xabgiꞌi nsea xagots. 7Ta weꞌe ulaꞌa xabgiꞌi xus na nsea xnaꞌa na, zha na nkaꞌa xa xagots ten xa. 8Leꞌa cuent ten Dios leꞌa itop xa wa yak dubtsa men, yá lid topta xa. Weꞌe leꞌa bexa wa dubtsa men myak. 9Ta weꞌe gáp naꞌ leꞌa bexa na mchealte Dios, lá nsabndoꞌ dub men uteltsaꞌa bexa.
10Leꞌa gor na mlanseaꞌ bexa ta lid bexa, leꞌa be xmen Jesús cha unabdiꞌizh stub biaj cuent ten ta mbidiꞌizh Jesús wa. 11Leꞌa Jesús cha ndab:
—Leꞌa tal ton dub xabgiꞌi ulaꞌa xagots ten na, cha ikaꞌa xa stubga xagots, leꞌa xabgiꞌi wa ugap ndanno xagots ned ten na wa, no ndap xa ke ndoꞌ Dios. 12No liga tal leꞌa dub xagots ulaꞌa xabgiꞌi ten na, cha ikaꞌa xa stubga xabgiꞌi, leꞌa xagots wa ugap ndanno xabgiꞌi ned ten na wa, no ndap xa ke ndoꞌ Dios.
Jesús nsea be meꞌed
(Mt. 19:13-15; Lc. 18:15-17)
13Weꞌe leꞌa be men ulanseano be meꞌed ten na wats Jesús, uxoꞌob Jesús yaꞌa na gek be meꞌed wa, inab xa ulaꞌach Dios be meꞌed. Ná leꞌa be xmen Jesús uteyo bexa na nseabeno be meꞌed wa.
14Leꞌa Jesús cha uniꞌí ta wa, cha ngokloo xa ndoꞌ be xmen xa, cha ndab xa:
—Blaꞌa bego giꞌid be meꞌed baꞌ wats naꞌ. Lá uka bega giꞌid be meꞌed, leꞌa Dios nibeꞌe len ladoꞌo be men nak lak be meꞌed ndee. 15Leꞌa naꞌ gáp ndoꞌ bego, leꞌa tal ton lá ulaꞌa inibeꞌe Dios xa lak dub meꞌed, leꞌa xa wa nunk lá yate sa nibeꞌe Dios.
16Cha udiꞌid Jesús be meꞌed wa, nsea mxoꞌob xa yaꞌa xa gek be meꞌed. Cha unab xa ndoꞌ Dios ulaꞌach Dios be meꞌed.
Dub xabgiꞌi rik mbidiꞌizhno Jesús
(Mt. 19:16-30; Lc. 18:18-30)
17Leꞌa gor na yaꞌikanes Jesús, leꞌa dub xabgiꞌi karrel ulen cha usaxib ndoꞌ Jesús, unabdiꞌizh xa ndab xa:
—Mech wen, ¿xtaꞌan nsabndoꞌ gun naꞌ ndontsa no naꞌ gap gealnaban ndoꞌ Dios, ta nunk lá idub zha?
18Leꞌa Jesús cha ukaꞌab ndab:
—¿Xtaꞌan ngi wen ndab lu ndoꞌ naꞌ zha? Naꞌan ton wen, ndon nab Dios nak wen. 19Yá nchandoꞌ lu ley ten Dios ndab‑a: “Lá ugal lu xa ten stubga men. Lá gut lu men. Lá gun lu gealwaꞌan. Lá gun lu gealkwiꞌin. Lá ukedino lu men. Wankea xus lu nsea xnaꞌa lu.”
20Leꞌa xabgiꞌi wa cha ukaꞌab ndab:
—Mech, itea ta ndab go baꞌ ndunka naꞌ idub zha tuzhta naꞌ.
21Weꞌe leꞌa Jesús mwiꞌi ndoꞌ xa, cha mkweaꞌ ladna Jesús xa, cha ndab Jesús ndoꞌ xa:
—Stubtsa taꞌa ndun jwalt gun lu: nat byaꞌ, cha bdoꞌo iteanak ta ndap lu, cha btseꞌa med wa ndoꞌ bexa uban nak. Weꞌe gap lu sian taꞌa gibeꞌa. Cha utsea usankea tsoꞌo naꞌ, guniꞌi tal men xteꞌe gunno lu.
22Leꞌa xabgiꞌi wa kweaꞌ myoꞌo ladna gor na mbiꞌín xa ta wa. Ndon uban myoꞌo ladna xa nseaꞌ xa, geal leꞌa xa uzhebpa sian taꞌa ndap.
23Weꞌe leꞌa Jesús mwiꞌila gangeak, cha ndab xa ndoꞌ be xmen xa:
—Uzheꞌeb ugan ulaꞌa dub men rik inibeꞌe Dios xa, bexa na li ndap sianpa be taꞌa.
24Leꞌa be xmen Jesús ngwanseana be diꞌizh ndab Jesús wa, ná leꞌa Jesús cha ndabgal:
—Bego bexa nak xiꞌín utsid naꞌ, uzhebpa ugan ulaꞌa dub xa rik inibeꞌe Dios xa, bexa na ngeꞌ ladna be ta sian ndap na. 25Ndi mas lid bid itid dub came geꞌed xan dub yagux, ndoꞌ yate dub xa rik sa nibeꞌe Dios.
26Cha mas ngwanseana bexa, ndab bexa ndoꞌ be ltsaꞌa xa:
—¿Tonxá syoꞌo gan yate sa nibeꞌe Dios zhaga?
27Leꞌa Jesús mwiꞌi ndoꞌ bexa, ndab xa:
—Leꞌa cuent ten nabtsa be men leꞌa‑yá lá yoo gan, ná leꞌa cuent ten Dios itea taꞌa syoꞌoka gan.
28Weꞌe leꞌa Pedr cha ndab:
—Unaꞌ go, leꞌa besa mlaꞌa itea ta ndap besa, cha ndi usankea besa tsoꞌo ga.
29Cha ukaꞌab Jesús ndab xa:
—Leꞌa naꞌ gáp ndoꞌ bego, leꞌa tal ton ulaꞌa lid na no wit na no bsan na no xus na no xnaꞌa na no xagots ten na no xmeꞌed na no be yo ten na ta na ndangea ladna xa naꞌ no diꞌizh ten naꞌ, 30leꞌa xa wa ikayaꞌa dub gayoꞌo biaj mas sian be ta wa tiemp ndee. Leꞌa bexa wa gap lid na, wit na, bsan na, xnaꞌa na, xmeꞌed na, nsea yo. No kweaꞌ itid bexa, parea gal tiemp tiꞌi ilen leꞌa bexa gap gealnaban nunk lá idub. 31Ná kwaꞌad bexa nsak nat wa yak bexa naꞌanpa nsak; leꞌa bexa naꞌanpa nsak nat wa yak bexa nsak.
Biaj yon mbidiꞌizh Jesús leꞌa xa gat
(Mt. 20:17-19; Lc. 18:31-34)
32Leꞌa gor na nsoꞌ bexa nes ikea bexa Jerusalén, leꞌa Jesús nchaꞌa ned. Leꞌa be xmen Jesús nchankea tsoꞌo Jesús, leꞌa bexa ndanseana no nzheb bexa. Weꞌe leꞌa Jesús cha mbiꞌi bexa wa dub lad, cha mbidiꞌizhgal xa be gealkweaꞌ iniꞌí xa, ndab xa:
33—Blaꞌach bego leꞌa beuna nchaꞌbe Jerusalén, sa leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be uleꞌay nibeꞌe no ndoꞌ be mech ten ley. Leꞌa bexa wa gab nsabndoꞌ gat naꞌ, cha yun bexa cuent naꞌ ndoꞌ be men naꞌanpa xa judio. 34Leꞌa bexa wa inisi naꞌ, nsea kin bexa naꞌ, nsea uchukko bexa ndoꞌ naꞌ, no gut bexa naꞌ. Parea gal wizh yon leꞌa naꞌ iban ndoꞌ gealgut.
Jacob nsea Juan unab dub taꞌa ndoꞌ Jesús
(Mt. 20:20-28)
35Weꞌe leꞌa Jacob nsea Juan be xin Zebedeo ubii wats Jesús ndab bexa:
—Mech, leꞌa besa nlad usaꞌa go dub ta inab besa.
36Cha ndab Jesús:
—¿Xtaꞌan nlad bega usa naꞌ zha?
37Leꞌa bexa cha ndab:
—Usaꞌa go wats go sa inibeꞌe go kwe besa, dub besa wats ga lad gaꞌal, leꞌa stub besa lad raves.
38Leꞌa Jesús cha ndab ndoꞌ bexa:
—Bego ni lá iniꞌí xtaꞌan unab bega. ¿Sxik bega itid bega gealkweaꞌ lakta gealkweaꞌ itiꞌid naꞌ zha? ¿No sni bega gat bega lak gat naꞌ zha?
39Leꞌa bexa cha ndab:
—Leꞌa besa sxikka.
Leꞌa Jesús cha ndab:
—Leꞌa naꞌ gáp leꞌa bega stidka be gealkweaꞌ lakta gealkweaꞌ itiꞌid naꞌ, no sat bega lak gat naꞌ. 40Parea leꞌa sa kwe bega, dub bega wats naꞌ lad gaꞌal, no stub bega wats naꞌ lad raves, leꞌa sa wa naꞌanpa naꞌ inibeꞌe. Leꞌa Dios leꞌa gab ná ton kwe sa wa.
41Leꞌa gor na mbiꞌín isatiꞌi be xmen Jesús ta unab Jacob no Juan wa, cha ngokloo bexa. 42Ná leꞌa Jesús cha utezh itea be xmen xa, ndab xa:
—Leꞌa bego uniꞌíka leꞌa bexa nibeꞌe be nacion naꞌanpa ulaꞌa gun be men dub taꞌa naꞌanpa nibeꞌe bexa, no bexa mas nsak ten bexa uzhebpa nibeꞌe ndoꞌ be men. 43Ná leꞌa bego ndee naꞌanpa li nsabndoꞌ gak. Ndi tal ton bega nlad gak dub xa nsak lat bega, leꞌa xa wa nsabndoꞌ gakno itea bega. 44No tal ton bega nlad yansu lat bega, leꞌa xa wa nsabndoꞌ gun tiꞌin ndoꞌ iteanak bega. 45Leꞌa naꞌ, Xa Myak Men Ndoꞌ Gizhliyo, naꞌanpa ndal gun be men tiꞌin ndoꞌ naꞌ. Leꞌa naꞌ ndi ndalyun tiꞌin ndoꞌ be men, no usa naꞌ gealnaban ten naꞌ gat naꞌ, kix naꞌ ke ten kwaꞌad be men.
Jesús myunyakna ngusndoꞌ Bartimeo
(Mt. 20:29-34; Lc. 18:35-43)
46Leꞌa Jesús no be xmen xa cha nchaꞌtid gezh Jericó. Cha gor na nseatoꞌo bexa toꞌo gezh wa no kwaꞌad be men, leꞌa dub xabgiꞌi lá naꞌ nsobnab med toꞌo nes sa nchaꞌtid Jesús. Leꞌa xa wa nsaleaꞌ Bartimeo, xin Timeo. 47Leꞌa gor na mbiꞌín Bartimeo leꞌa xa nchaꞌtid wa nsaleaꞌ Jesús xa Nazaret, cha usaxan xa ugeꞌ ndab xa:
—¡Jesús, xin David, blats ladna go naꞌ!
48Cha kwaꞌad bexa uteyo xa wa ndab bexa ndoꞌ xa yá naꞌanta xteꞌe gab xa. Ná leꞌa xa wa ndi mas ugeꞌ ndab:
—¡Xin David, blats ladna go naꞌ!
49Weꞌe leꞌa Jesús cha ngwaꞌisoꞌ ndab xa:
—Utezh bega xa na li ugeꞌ níꞌi wa.
Cha ngwaꞌtezh bexa Bartimeo, ndab bexa:
—Bten ladna lu, gosoꞌ, leꞌa Jesús nbezh lu.
50Leꞌa xa wa cha ngwasoꞌ, udabi xa lad nbix xa, cha ubii xa wats Jesús. 51Leꞌa Jesús cha ndab ndoꞌ xa:
—¿Xtaꞌan nlad lu gunno naꞌ lu zha?
Leꞌa xa wa cha ndab:
—Mech, leꞌa naꞌ nlad inaꞌ.
52Leꞌa Jesús cha ndab:
—Nat syoꞌo gan yaꞌ lu, leꞌa lu myaklana ta na mgeꞌ ladna lu naꞌ.
Cha bi leꞌa gor wa leꞌa xa cha mnaꞌla. Weꞌe cha no xa usankea tsoꞌo Jesús nes wa.
Currently Selected:
San Marcos 10: zpt
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
