Mak 4

A warwara larlar ana tena omomai

(Mt 13:1-9; Lk 8:4-8)

1E Iesu i tur ulak pas a asasaer tumokorot na puka tasi. Pa a tnan kunum a tarai la tur talilis pasi. Pa i kas uting na mon pa i kes sa na puka tasi. A tnan kunum a tarai rop la tur tumo korot na hang. 2Pa i asaer la ana galis a utna ana warwara larlar. I asaer la mange, 3“Longor! A tena omomai i han sur ir sapran a pat a witla. 4Ning i sapran amon la, dingla la punga ting na ngas pa a manila la rowoi ot pa la ien sen la. 5Dingla otleng la punga ting na pukna ning i hatat, pa belal galis a piu ono, pa la gomo kapit, anasa a piu bel i but. 6Ika ning a kamis i sasai ot, la main pa la marang rop, anasa belal wakirinla. 7Dingla na patna otleng la punga tar ting na tinine rosrosla, pa a rosrosla la gomo ot pa la rau alar pas la, pa bel la wai. 8Pa dingla na patna otleng la punga ting na wakak a piu. La gomo pa la itna amon pa la wai, dingla natol a bonot a wanala, dingla diono na bonot, pa dingla takai a mar.” 9Lamur e Iesu i mang, “Esining a talngana kaning, i wakak ning ir longor ono.”

E Iesu i asaer ana warwara larlar tetek a tarai rop

(Mt 13:10-17; Lk 8:9-10)

10Ning e Iesu kama taum ana ning a bonot pa pisir naur a kakak a asaer pa dingla na tarai la kes, la dekeni ana warwara larlarla. 11Pa i atai la mang, “E God ka saran tar a tastasim ta mulo sur mulor talapor ana ututnala ana nuna matanitu, ning nating i kes kumna. Ika tetek a tarai masik, dir asaer la ona utnala rop ana warwara larlar, 12sur,

‘lar oroi pa lar oroi, ika bel lar oroi lalani,

lar longori pa lar longori, ika bel lar longor lalani,

pa bel lar tastasmai ono.

Ngandek ning lar oroi lalani pa lar mananos,

pa, lar ulak tetek e God, pa ir kepsen a toltol laulau anunla.’”

E Iesu i pak a kamkama warwara larlar ana tena omomai

(Mt 13:18-23; Lk 8:11-15)

13Pa e Iesu i deken la mange, “Bel mulo talapor ana kamkama warwara larlar ne? Mulor tasman mangamangasa a kamkama ana dingla na warwara larlar otleng? 14A tena omomai i arlar ana tena warawai ning i asaer ana warwara ane God. 15A pat a witla ning la punga ting na ngas, la arlar ana tarai ning la longor a warwara, pa e Satan i hanot, pa i kepsen a warwara miting na balanla. 16Dingla na tarai otleng la arlar ana pat a witla ning la punga ting na pukna ning i hatat. Ning la longor a warwara la tong akesi ana gasgas. 17Ika a warwara bel i kes rakrakai ting na balanla, bel lar tur rakrakai arlar ana witla ning belal wakirinla. Ning a mamahatla ir hanot, pa dir alaulau la ana warwara ning la tortorot ano, lar punga kapit. 18Dingla na tarai la arlar ona pat a witla ning la punga tar ting na tinine rosrosla. La longor a warwara, 19ika a nuknukinla sur a wakak a keskes te lapiu, pa nuknuk otleng sur anunla na gongon ning i asongo a nuknukinla, pa a nuknuk sur a ututnala masik, la rau alar a warwara ane God, pa bel i wai. 20Dingla na tarai la arlar ana pat a witla ning la punga ting na wakak a piu. La longor a warwara pa la muri, pa la wai, dingla na tarai natol a bonot, dingla na tarai diono na bonot, pa dingla na tarai otleng takai a mar.”

A warwara larlar ana lam

(Lk 8:16-18)

21Pa e Iesu i atai la mange, “Bel tik ir los pas ta lam pa ir aroh alari ana paket, pa bel ir suah i otleng ting nahai a logo. Ir suah i ot saot na turtur ngasna. 22A ututnala rop ning i kes kumna, lamur ir kes puasa. Pa a ututnala rop ning di bunuri, lamur ir hanot talapor. 23Esining a talngana kaning, i wakak ning ir longor ono.” 24E Iesu i atai la mange, “Mulor nuknuk wakak ana sa ning mulo longori. Ning mulor longor wakak, dir saran a wakak a tastasman ta mulo. Pa mulor kibasi ir itna kol. 25Esining i tong akes anuka asasaerla, dir tabar ulaki ana wakak a nuknuk, pa tik ning bel i tong akes anuka asasaerla, dir kepsen otleng anuna siklik wakak a nuknuk kusuni.”

A warwara larlar ana pat a witla ning la gomo

26E Iesu i atongi otleng mange, “A matanitu ane God i arlar ana barsan ning i sapran tar a pat a witla ting na kabalapiu. 27Ning i borbor ana moromla pa i sira mata ana kabakiarla, a pat a wit la pusa ot pa la gomo, pa a barsan bel i tasmani mang la pusa ot pa la gomo mangmangasa. 28A piu ot i agomo a rakai a wit larne: a pakana i pusa nigo, pa lamur a sarna i gomo ot, pa a patna i mur ot. 29Ning a patnala ka makos pa a kalang a sol ka hanot, a barsan ir pirat pas la.”

A warwara larlar ana pat a mastad

(Mt 13:31-32, 34; Lk 13:18-19)

30E Iesu i atai la mange, “Ar larlar a matanitu ane God ana sa? Pa esi na warwara larlar ar papak ono? 31I arlar ana pat a mastad. I natarna kol tana pat a rakai rop, ning di omani ting na kabalapiu. 32Ning di ka oman tari, pa i gomo, i itna kol tana rakai a hanganla rop pa i suah sarara a tatatnan rakrakana, pa a manila la sira tol pios saot na rakrakana ning i molmol.”

33E Iesu i warwara tetek la ana galis a warwara larlar ning i arlar ana nunla na mananos, 34pa bel i warwara tetek la ana ta maskan a warwara, a warwara larlar rop ka. Pa ning la kama taum ana nuna kakak a asaer lar kes, ir papak bot ana kamkama warwara larlarla.

E Iesu i sairas a top pa a wuwu

(Mt 8:23-27; Lk 8:22-25)

35Ning a rah ma ana pukakiar ning, e Iesu i atai anuna kakak a asaerla mang, “Dalar han lakai utumo na ris a puka tasi.” 36La kas tetek e Iesu ting na mon, pa la han kusun a kunum a taraila. Pa dingla na mon otleng la han taum onla. 37Pa a rakrakai a wuwu i hanot, pa a top i song a mon pa siklik ir murung. 38E Iesu i borbor tumo lamur ana mon pa i ululnge ana pilo. A kakak a asaer la amata i, pa la atai i mange, “Tena Asaer, dala kar hirua! Mangmangasa, bel u ngara ondala?” 39Pa i kamtur, i sairas a wuwu, pa i atai a top, “Ur manah! Ur mililo.” Pa a wuwu i manah pa a tasi i mililo rop. 40E Iesu i atai la mange, “Sur asa ning mulo matmataut? I mangasa, belot mulo tortorot?” 41La matmataut kol, pa la deken artalai la mange, “Esi na ngas a barsan ne, sur a wuwu pa a top diar longor tana?”

Currently Selected:

Mak 4: lbb

Highlight

Copy