Mak 3

E Iesu i alangolango pas a barsan a kuna del

(Mt 12:9-14; Lk 6:6-11)

1E Iesu i kas ulak uting na rumai lotu, pa ning a barsan kaningia a kuna i del. 2Pa a tarai la tai sur ta ngas ning lar arup e Iesu ono, pa la ngoson murmuri mang ir alangolango a tinsaman ana Pukakiar Sabat, o bel. 3Pa i atai a barsan ning a kuna i del mang, “Ur tur te lanigo tanla rop.” 4Pa e Iesu i deken la mange, “Asa ning a Warkuraila i atongi sur dir toli ana Pukakiar Sabat? Dir tol a wakakna o dir tol a laulauna, dir alangolango tik o dir saikol tik?” Ika bel la kelesi. 5E Iesu i tai taltal ana balakut tetek la. I nukmaris la anasa la tagar a nuknukinla. Pa i atai a barsan ning mang, “Ur kodos a kum.” I kodosi, pa a kuna i tostos ulak. 6Ning a Parisaiola la purum, la han tetek a taraila ane Herot, pa la warwara taum pas sur ta ngas ning lar umkol e Iesu ono.

Atnan kunum a tarai la han tektek e Iesu

7E Iesu taum ana nuna kakak a asaer la han utumo purum na puka tasi, pa a tnan kunum a tarai mitisa ana papar Galili la muri. 8Pa a galis a tarai otleng la muri misaot na papar Judia pa e Jerusalem, pa miting na papar Idumea, pa mitimo na ning a ris a malum Jodan pa mitimo e Tair pa e Saidon otleng. A tnan kunum la hanot, anasa la ka longor tar a tatatnan utna ning e Iesu ka tol tari. 9-10I ka alangolango pas a galis a tinsaman, pa la ning la kurah la sur sauran pas la, sur lar susur milau e Iesu pa lar tuki. Pa i atai anuna kakak a asaerla sur lar dulan parung a mon, sur ning a tnan kunum a tarai la kar atalilis pasi, pa ir kas onoi. 11La ning a mot i solsolong la, ning la oroi e Iesu lar punga purum namatana. Pa a motla lar kukuk mange, “U a Nat e God.” 12Ika i atumarang la sur gong la atai tar tik mang, i esi.

E Iesu i aslang pas ning a bonot pa pisir naur a aposel

(Mt 10:1-4; Lk 6:12-16)

13Lamur e Iesu i han usaot na mangir, pa i kabah pas la ning i mang sur la, pa la han teteki. 14I aslang pas ka ning a bonot pa pisir naur, pa i atong la a aposella. I kabah pas la sur lar han taum, pa ir sune sen la sur lar warawai ana warwara ane God. 15I saran tar a rakrakai tanla sur lar kepsen a motla kusun a taraila. 16Ine ning a bonot pa pisir naur ning i aslang pas la. E Saimon ning e Iesu i saran tar ning a risana otleng e Pita. 17E Jems ditas ma e Jon naur a nat e Sebedi, ning e Iesu i saran ulak a risan diau mang e Boarnerges, a kamkamna mang naur a tena warwara, 18Endru, Pilip, Batolomiu, Matiu, Tomas, Jems a nat e Alpius, pa e Tadius, pa e Saimon ning tagun a kunum Silot#3:18 Silot i a rising ning di atong a kunum a tarai ning la harum taum ana matanitu Rom sur lar langolango., 19pa e Judas Iskariot, esaning i asobor tar e Iesu.

E Iesu pa e Belsebul

(Mt 12:22-32; Lk 11:14-23; 12:10)

20Lamur e Iesu i kas ting na rumai pa a tnan kunum a tarai kale la han teteki, pa e Iesu taum ana nuna kakak a asaerla bel la tolsot sur lar hangan. 21Ning anuna mangis a tarai la longor a utna ne, la han sur lar ben pasi, anasa a tarai la mang bel ma i tostos a nuknukna. 22A tena asaerla tagun a warkurai mitisa e Jerusalem, la atongi mange, “Belsebul, a leklek anuna motla, kaning ma o e Iesu, pa i sira kepsen a motla ana rakrakai e Belsebul.” 23Pa, e Iesu i kabah la teteki, pa i warwara larlar mange, “E Satan bel ir tolsot sur ir kepsen e Satan. 24Ning ta matanitu ir sarara, a matanitu ning ir tur rakrakai mangmangasa? 25Pa ning ta kabaitamana lar harum artalai tanla ot, bel ma lar kes taum. 26Ning e Satan ir harum taum ana nuna tena titolla, anuna matanitu bel ir tur rakrakai, ir rarop ka.

27“Bel tik ir tol sot pas sur ir kas uting na rumai anuna ta rakrakai a barsan, pa ir los pas a ututnala mitisaui na rumai, ning bel ir dot akes nigon tari. Ning ot ir dot nigon tari, ir bot los a ututnala anuna barsan ning. 28A atong momoli ta mulo: E God ir kepsen a toltol laulau anuna taraila, pa nunla na warwara laulau o e God. 29Ika ning tik ir atong laulau a Talngan Tabu, bel tik ulak ma ir kepsen pasi. A toltol laulau ning ir tur tikin.” 30E Iesu i atongi manglarne anasa la atongi ono mang, “A mot kaning ono.”

Tana e Iesu taum ana tastasnala

(Mt 12:46-50; Lk 8:19-21)

31E tana e Iesu pa na tastasna la hanot, la tur tumo lapiu pa la arsune suri. 32A kunum a tarai la kes talilis pasi pa la atai i mang, “E tnam pa na tastasim la ne lapiu. La tai sur u.” 33Pa i deken la mang, “Esi e nang, pa esi la na tastasik?” 34Pa i tai tetek la rop ning la kes talilis pasi. Pa i atongi larne, “Oroi, la ne, e nang pa na tastasik. 35Anasa esining i sira mur a nuknuk e God, i ka ning a tasik barsan, pa a tasik hane pa e nang.”

Currently Selected:

Mak 3: lbb

Highlight

Copy