Zakari 14
14
Yálá nwɔ tɔɔlaai pa mɛ̨nį
1Hvóló ta kaa pai həlii, a Yai-Laa nwɔ kuui,
da Ɉerusalɛmə mąąkpoloon,
di hee daa kwəi, diɛ ɲąąkwɛlɛ.
2Gáá pai lɔiɠaa kəlee ɲąąkpɔn ɉii,
Ɉerusalɛmə kwɛlɛ, da diɛni diɛ gɔ́ yili ŋą.
Di kaa pai daa hon ɉii, diɛ bɛlɛ́ɠaa pu,
diɛ too nɛ̨ąą mɛ̨i;
daa bələ tɔ̨nɔ̨ kaa pai lii luwɔlaa hu,
Kɛlaa nu kpəlii pai lɛɛi, di hvo pai di kpɛi laa.
3Nąąlɔwai, Yai-Laa a kɔ́ pɛlɛ nɔiɠaai tii diɛ,
gaa pai gɔi tii kɔ́i, yɛ bələi ə wɔlɔ kɛi gɛ la a bɔlɔ.
4Mąą yələi tii, gaa pai gɔwɔɠaa hvilɛn ɉii Olivə yee nwuɔ̨,
yai tii Ɉerusalɛmə tənən ma, voló kulɔi pələ.
Olivə yee kaa pai ɓɛlai ɉɛ̨ąi,
ə həɠə voló kulɔi pələ, ə li voló tooi pələ.
Ɛlɛɛ, nąą mąą kaa pai pənəi a nɛ̨ŋɛ̨ lɔi kɛnɛ̨,
ɲee bələ tɔ̨nɔ̨ kaa pai lii ɲələi pələ,
bələ tɔ̨nɔ̨ ə li ɉɛɠɛɛ pələ.
5Kaa kaa pai kɛi pui kaa li nɛ̨ŋɛ̨ lɔi hu,
yai gaa ɲeeɠaa lɔwai,
mąąhɔlɔɓo, nɛ̨ŋɛ̨ lɔi tii ɲee lɔwai, gaa pai həlii kpɔ Asalə,
ka káá pai pui lɔ yɛ bələi ka pu la,
a ɲələi nɔi ə kpɛlin na,
a Ɉuda tɔɔmun Oziasə nwɔ yələi.
Yili pulu, Yai-Laa nwɔ́ Yálái kaa pai pai,
nwɔ nu mąąhəɠɛɛɠaa kəlee di ɓo bɔ.
6Mąą yələ, kɛɛpono hɛn hva kɛ laa,
kwɛ́lɛ́ hva pa, luwuluwu hva pu.
7Gaa pai kɛi a hvóló mąą pɔlɔɔ,
Yai-Laa yaa tanɔ̨n lɔ ɓə gɔlɔn,
yələ ɓɔɔ mɛ̨nį hva kɛ ɉu,
kpįnį mɛ̨nį hva kɛ ɉu;
kɛɛ a kɛ lɔ a bonɔɔ.
8Mąą yələi tii, yá nwun gulɔiɠaa kaa pai kɛi Ɉerusalɛmə,
bələ tɔ̨nɔ̨ yɛ li voló kulɔi bələ gboloyá hu,
bələ tɔ̨nɔ̨ yɛ li voló tooi bələ gboloyá hu;
gaa pai kɛi lɔ tii a hvóló laa teɛ, da hamą lɔɔ.
9Mąą yələi tii, Yai-Laa a gbɔwɔ lɛ a yɛnɛ̨ɛ̨ kəlee nwɔ tɔɔmun,
a kɛ tii, Yai-Laa yaa tanɔ̨n mə a kɛ laa, naa ə ɓo tanɔ̨n.
10Nɔi kəlee mąą a pənə a nɛ̨ŋɛ̨ hu,
ə həɠə Gɛva, ə həli la Rimɔn Ɉerusalɛmə kɔ́wɔla pələ.
A kɛ tii, Ɉerusalɛmə a lɛɛ di nwun mɛ̨i pələ,
ə həɠə Bɛnɉamɛn nwɔ kpon ɓa,
ə həli la gbon bɔlɔ pɔlɔ kɛɛnąą,
gbon tii bɛlɛ́ nwąną hveelɛi a gee kaa mɛ̨i,
ə həɠə Hananeɛlə nwɔ pələ́i-kaa-pɛlɛ́i ɓa, ə həli la tɔɔmun ɲəi gɔwɔla.
11Nuą kaa pai heei laa,
di hva kɛa nɛ̨ŋɛ̨nnaa kɛ,
Ɉerusalɛmə kaa pai kɛi liilaa hu.
12Nɔiɠaai tii gɔ́ pɛlɛ Ɉerusalɛmə ɓa,
vaɠai Yai-Laa kaa pai di kɛlɛi la, ya ka:
Di kaa pai lɛɛi di hvulú kɔ́wɔ ŋą,
kolo ə pu di hu,
di ɲɛ̨i kɔ́w yɛ luwun galai,
di nɛ̨n yɛ luwun di la.
13Mąą yələi tii, Yai-Laa kaa pai ɲɔw kɛnɛ̨ pilii di hu,
nuą diɛ wolo di kee ɓa, diɛ gɔ́.
14Ɉuda kaa pai Ɉerusalɛmə mąą kɔ́nwɔ̨i gɔ́ hu,
di kaa pai di kwɛlɛ lɔiɠaa di wɔ hɛn gɔwɠaai kulɔi di yəi,
hɛni, wali, da həɠə, yii lono hva kɛ mą.
15Vaɠa taaləi tii a ɉooɠaa kɛlɛ lɔ, da wɛlɛhooɠaa,
da ɲɔ̨ɔ̨mɛ̨ɛ̨ɠaa, da hoohvaalənɠaa,
da taatɛlɛɛ lɔpee pai kɛ di pɔ;
di kɛlɛ pələ a kɛ lɔ tanɔ̨n.
16A kɛ tii, nɔiɠaa kɔ́ pɛlɛ Ɉerusalɛmə ɓa,
nuąi pai lɛɛi di hu,
di kaa pai kɛi pai a kwɛlan ɉəli pələ tɛitɛi,
diɛ pɛlɛ Yai-Laa Mɛ̨nį Kəlee ŋą Hééɓomun lííla,
diɛ ɉəɠə kələ hɛli pu.
17Kɛlaa nɔi hu nuą yiiɠaa di hvo pai gɛi di hvo tɛ Ɉerusalɛmə,
di hvo pɛlɛ, Yai-Laa Mɛ̨nį Kəlee ŋą Hééɓomun lííla,
tulɔ hva pu di mɛ̨i.
18Akɛ Eziptə nuą da wala gɛ di hvo tɛ,
vaɠa hva mɔ̨ɔ̨ həli diɛ?
A vaɠai tii Yai-Laa ə nɔiɠaai kɛlɛ lai?
Yii kpɔ diɛi tii di hvo gɛ li di hvo tɛ ɉəɠə kələ hɛli pu mɛ̨nį ɓa.
19Bələ ɓə di kaa pai Eziptə hutɔɔi la,
da nɔiɠaai di hvo pai gɛi di hvo tɛ ɉəɠə kələ hɛli ɓa.
20Mąą yələi tii, di kaa pai bɛ̨ɛ̨i ɉoo kwaną talanənŋaa diɛ,
diɛ kɛ mą: «Naakwəlan moɔi Yai-Laa ɓa.»
Yai-Laa yəi bɛlɛ́n gwɛli ləɠiɠaa kaa pai kɛi yɛ,
nuą mąąhəɠə gəgənŋaa ɉaláá kulɔi lííla.
21Ɉuda da Ɉerusalɛmə di wɔ kwɛli ləɠii kəlee di kaa pai kɛi a Yai-Laa Mɛ̨nį Kəlee ŋą Hééɓomun nwɔɔ,
nui lɔpee pai pai haláá kulɔi,
a di həɠə yɛ nwɔ haláá hɛn yili di hu.
Mąą yələi tii, lɔwɔtɔɔmun va kɛa kɛ Yai-Laa Mɛ̨nį Kəlee ŋą Hééɓomun yəi bɛlɛ́n.
Currently Selected:
Zakari 14: BKPG
Highlight
Share
Copy
Want to have your highlights saved across all your devices? Sign up or sign in
