Lukə 19

Jesus ə lɔ Zase yəi bɛlɛ́n

1Jesus ə tɛ Ɉeriko daai, ə kɛi pa tɛɛi laa. 2Hulɔnu ta ə kɛ laa diɛ kɛ naa ɓa Zase, nįįhɔ̨nwɔ̨ kulɔ nuą nwun nąmu li kɛ, yɛ ɓo a hɛn gɔw nąmu kɛnɛ̨. 3Ə kɛ bɔ ə Jesus kaa, ə gɔlɔn. Kɛlaa hva pɛli mą kɛ gaai, nu kpulu mąą mɛ̨nį ɓa, ɛlɛɛ, gbua. 4Ə gilɛ həɠə ə li tɔwɔ pələ, ə tɛ wulu ta hu, əgɛ, ə Jesus kaa, hvo gaa nąą ɓə ə kɛi pa tɛɛi laa. 5Həlii Jesus nąą, ə ɲɛ̨i tɛ ɲələi ə mo mą, yɛ mą: «Zase, yɛ́mun, hvilɛn a mąąhulaa; ə́ yəi bɛlɛ́n ɓə kələi gáá yíi laa.»

6Zase ə hvilɛn ə hvilɛn a gilɛ, ə Jesus nwɛ̨ąlaa kɛ a gwəinɛ̨ɛ̨ ɲəi bɛlɛ́n. 7Nąą kaai kɛa nuą di mo, di dɛi kɛi Jesus ɓo, diɛ kɛ mą: «Gaa li yɛ yii nɛ̨ŋɛ̨n ɉəɠə mun ɲəi bɛlɛ́n.»

8Zase ə́ muhəɠə yɛ Ną́mu Jesus ɓa: «Ną́mu! Gáá ɲə́i hɛn gɔw bələ tɔ̨nɔ̨ tɛɛi yeehvowolo nuą pɔ, ɛlɛɛ, akɛ ŋą nu ta hulu, ŋą hɛn gulɔ ɲəi, ŋą bɔɔi tɛɛ mąą nu pɔ gee mɛ̨i nąąn.»

9Jesus yɛ diɛ: «Ɓalo mɛ̨nį aa həli bɛlɛ́i ŋɛ̨i ɓa háákələi, mąąhɔlɔɓo, ɉulɔnui ŋɛ̨i yaa kpɛli gaa a Abrahamə lon da. 10Nuą yiiɠaai di piliɛ kɛ, Nu Lon ə pa di kwɛli mɛ̨nį ɓa, əgɛ, di ɓalo.»

Yálá-taa tɔɔlaa mąą hanwon

(Matie 25.14-30)

11Nuą ŋɛ̨i Jesus woo mɛ̨n, ə hanwon ɉɔɔ diɛ yɛ diɛ pələi mąą kpua kɛ la Ɉerusalɛmə taa ɓa, nuą di kɛi di kiliŋąhiɛ diɛ kɛ diɛ: Yálá-taa tɔɔlaa kaa pai kulɔi kpɔlɔ tii ŋąąɓa di gaa. 12Ɉanwon ə ɉɔɔ diɛ ya ka; yɛ diɛ: «Tɔɔ kwɛlii mun da, ə li lɔi takpɛli hu kwɛala, əgɛ, di tɔɔlaa tɛɛ bɔ, ə pa əgɛ bɔ tai. 13Gɛɛ hvə li, ə nwɔ tínuą powi təli, ə wəli kwələ waa tɛitɛi tɛɛ di pɔ, yɛ diɛ: ‹Ka yɔw kɛ a ɉɛn gɔwi ŋɛ̨i, ɛlɛɛ ɉu ŋą pənə ŋį́ pa.› 14Kɛlaa, nwɛli hvo kɛ nwɔ lɔi hu nuą diɛ; di kɛla tɔɔ bulu, diɛ mą: ‹Ku hvo bɔ ɉulɔnui ŋɛ̨i ŋą tɔɔlaa pɔ.›

15«Ɉulɔnui tii ə tɔɔlaa hɔlɔɓo, ə pənə ə pa nwɔ lɔi hu, nwɔ tínuąi hiɛ ə nwali tɛɛ di pɔ, ə di təli, əgɛ yii di ɉɔlɔɓo, di di kwɛlanmo kɛ. 16Nu tɔlɔɔ ə pa, yɛ mą: ‹Ŋą mɛ̨nį nąmu, nwalii hiɛ ə́ dɛɛ bɔ́, ŋą́ą́ pow hɔlɔɓo mą.›

17«Tɔɔmun yɛ mą: ‹Yaa gɛ a nɛlɛɛ, koló kɛmun nɛlɛɛ ɓaa yɛ yii yaa tələnmolaa kɛ mɛ̨nį logolo hu, gáá pa ə́ heei taa pow nwun na.›

18«Nu veelɛ nąą ə pa yɛ mą: ‹Ŋą mɛ̨nį nąmu, nwalii ə́ dɛɛ bɔ́, ŋą́ą́ nɔɔli hɔlɔɓo ŋą́ą́ bɛlɛ mą.›

19«Tɔɔmun yɛ mą: ‹Ə́ wɛi gáá ə́ taa lɔɔli nwun na.›

20«Da kpɛli ə pa yɛ mą: ‹Ŋą́ mɛ̨nį nąmu, yɛ́ waa tɔ̨nɔ̨i ə́ dɛɛ bɔ́, ŋą mąą kpinįn gɛ, ŋį́ naaikɛ. 21Ŋą́ kɛi ɲɔw yá, mąąhɔlɔɓo, ə́ kaa a nui nwɔ mɛ̨nį walawala. Hɛn hvo ɉeei kɛ li ya ɓə ya ɉəɠə, ɓɛi hvo tíi kɛ li laa, nąą ɓə ya mɔ̨nun dee la.›

22«Tɔɔmun yɛ mą: ‹Kóló kɛmun ɲɔ̨nwɔ̨ɔ̨ ɓaa yɛ; ə́ woo tii ə́ mo ya lɔ ɓə gáá ə́ kiti teei mɛ̨i. Ə́ gɔlɔn gbɔ kɛ yɛ́, gáá a nui nwɔ mɛ̨nį walawala, ɓɛi və́ hɛn nąą li laa, nąą ɓə ŋą ɉəɠə laa; ɓɛi və́ tíi kɛ li laa nąą ɓə ŋą mɔ̨nun dee laa. 23Akɛti, lə mɛ̨nį ɓa hvo kɛ nwɔ́ walii tii tɛɛ li yɔw kɛ nuą pɔ di hvo tɔ̨nɔ̨ kwɛli mą; ŋą pənə ŋą pa tɔ̨nɔ̨ hɔlɔɓo ɉu?› 24Yili pulu, nuą tii kɛ laa tɔɔmun yɛ diɛ: ‹Ka nwali tɔ̨nɔ̨ tii kulɔ ɲəi, ka dɛɛ nui nwaa bow kaa ɲəi, bɔ!›

25«Nuą diɛ mą: ‹Ku wɔ mɛ̨nį nąmu, bow ə ɓo nwɔ̨nɔ̨ ɲəi!›

26«Yɛ diɛ: ‹A tɛ̨ą gáá moi kaa, nui hɛn gaa ɲəi, da da pɛlɛ mą. Kɛlaa nui hɛn və ɲəi, yii woloi ɲəi, da gulɔ ɲəi. 27Yii ɓaa nuą tii kɛ diɛ, di hvo nwɔ́ tɔɔlaa pɔi, ka pa a diɛ ɓɛ, ka di paa ɲɛ̨́i ɓa.›»

Jesus ə tɛ Ɉerusalɛmə

(Matie 21.1-11; Markə 11.1-11; Ɉaan 12.12-19)

28Yii kɛa ə kpɛɛ a nwooɠaai tii ɓoɔ, ə tɛɛ di tɔwɔ yɛ tɛ Ɉerusalɛmə pələ. 29Nɛɠɛɛ kɛa Bɛtfaze da Bɛtani taa diɛ; diɛ ŋɛ̨i di kaa Olivə yee koo mu, ə nwɔ kalan nɛai veelɛ tɔɔ tɔwɔ. 30Yɛ diɛ: «Daa ŋɛ̨i gu ɲɛ̨i tɔwɔ, ka li laa. Ka lii, ka káá lii hoohvaalən non da kaai gbulon ŋąą, yii nu ta hvo ni hee li mɛ̨i; 'ka volóon ka paa la ɓɛ. 31Nu a kɛ kaa: ‹Lə mɛ̨nį ɓa, ka káá volón ɉi?›, ka kɛ mą: ‹Ku Ną́mu yɛ ə gbaan dee la.›»

32Nuą ŋɛ̨i Jesus ə di tɔɔ, di li kpɔlɔ di gaa yɛ pələi tii ə mo la diɛ. 33Di kɛɛ ɉoohvaalən non volóon nąmįną diɛ diɛ: «'Ka káá volóon ɉi lə mɛ̨nį ɓa?»

34Di di woo pulu pənə diɛ mą: «Ku Ną́mu yɛ ə gbaan dee la.»

35Di paa la Jesus pɔ, di di mąąhəɠəɠaa pɛlɛ bulu, di Jesus tɛ di ɉee mɛ̨i. 36Gɛɛ kɛa lii, nuą diɛ di mąąhəɠə kulɔ di kwaną diɛ bɛlɛ bələ mɛ̨i. 37Di kɛɛ kɛa olivə yɛɛi, nwɔ kalan nɛai kəlee kwəinɛ̨ɛ̨i kɛ, diɛ Yálá hɛɠɛɛɓo a di woo kɛnɛ̨ɛ̨, gbalo mɛ̨nįɠaai di gaa mąą mɛ̨nį ɓa. 38Diɛ kɛ mą:

«Dɔɔmun pai gu Ną́mu Yálá laa hu, lúwɔ́ kaa mą!

Liilaa ə kɛ yələkɔlɔn ɉu, mąąwiɛ ə kɛ Yálá ɓa!»

39 Farisiɛ̨ taɠaa di kɛ nu kpului tii lɔwai, di mo Jesus ɓa, diɛ mą: «Mąąkwɛli kɛmun, mo ə́ nwɔ́ kalan nɛai diɛ, di di laapilɛ.»

40Jesus yɛ diɛ: «Gáá moi kaa, da di laapilɛ, kwɛniɠaa ɓə pai hvaai.»

Jesus ə Ɉerusalɛmə taa mąą wɔlɔ ɓo

41Jesus ə lɛɠɛɛ kɛa Ɉerusalɛmə taa ɓa, ə ɲɛ̨i hee daa ɓa, ə wɔlɔ, yɛ mą: 42Ee Ɉerusalɛmə! Yɛ́ kpɛlimąn, əli kɛ mɛ̨nįi a liilaa tɛɛ ə́ pɔ, ə́ gɔlɔn gɛ háákələi! Kɛlaa nooŋąąi ə́ ɲɛ̨i mu. 43A tɛ̨ą, gaa pai kɛi a yələ ta, ə́ yowoɠaa di ə́ mąątínɛ̨n a kɔlaɠa, di ə́ hvaną bələ kəlee. 44Di kaa pai ə laɠan ɉii nɔi ɓa, yɛ́ ka ə́ kwəi lonnii, di hvo kpɛli pai kwɛni lɛɛi ɓɛ kwɛni mɛ̨i. Mąąhɔlɔɓo, hvó ə́ ɓalo yələ kɔ́lɔn ni.

Jesus ə lɔ Yálá hee pɛlɛ́ mu

(Matie 21.12-17; Markə 11.15-19; Ɉaan 2.13-22)

45Yili pulu, Jesus ə lɔ Yálá hee pɛlɛ́ mu yɛ nuą kpɛ, 46yɛ kɛ diɛ: «Yálá ə mo nąąwoo hɛɓɛ́ hu yɛ diɛ: ‹Ŋą́ pɛlɛ́i kaa pai kɛi a: Yálá hvɛli pɛlɛ́.› Kɛlaa ka wɛi, kaa gɛ a nwuɔ̨ nuą hee pɛlɛ́.»

47Jesus ə kɛi nuą kalan hvóló kəlee Yálá hee pɛlɛ́ mu. Ɉaláá laa həli nuą kpɛa-kpɛaɠaa, tɔ́n galamɔ̨ɔ̨ɠaa da nɔi kalanɉonŋaa di kɛi baa pələ kwɛli. 48Kɛlaa, pələi kɛ di tɛɛ la, di hvo kɛ bələ kɔ́lɔn, mąąhɔlɔɓo, nɔi nuą kəlee wəli tɔɔ kɛ nwoo ɓa kpaan.

Currently Selected:

Lukə 19: BKPG

Highlight

Copy