Ɉaan 5

Jesus ə kpɛlɛɠɛlɛ ɲɔ̨n gɛmun da kɔ́lɔi pono

1Yili pulu, Ɉuifəɠaa di kɛi di wɔ hɛli ta pu, nąąlɔwai Jesus ə li Ɉerusalɛmə daai. 2Ɉįį tii kɛ Ɉerusalɛmə taa ɓa, naaləi ta ə kɛ laa, diɛ kɛ naa ɓa: ɓɛlaaɠaa lɔi. Gɛɛnąąi tii tənə ma, powa ta ə kɛ laa, diɛ kɛ mą: Ɉuifə woo hu: Bɛtzata. 3Kələ lɔɔli ə kɛ ɲái tii kwɛlɛ. Ɲɔ̨n gɛ nu tamąą di kɛ gələɠaai tii mu laani. Daɠaa diɛ ɓo a: ɲɛ̨ipu nuą, kɔ́wɔ nwąną nuą da kpɛlɛɠɛlɛ ɲɔ̨n gɛ nuą. Di kɛ laa diɛ ɲá tumoɔ mąąkpɔn. 4Mąąhɔlɔɓo, nąąlɔwai a ɉəli mą, Yálá nwɔ malaka ə kɛi yɛɛ ɲai, yɛ ɲa tumo. Nu tɔlɔɔ a too ɲái, ɲá tumoɔ pulu, ɲɔ̨n kpɔ gaa mą, a kpɛɛ. 5Hulɔnu ta ə kɛ laa, gbɛlɛɠɛlɛn ɲɔ̨n aa kɛ kwɛlan bow haaɓa gɔw mɛ̨ihaaɓa kɛ mą. 6Jesus ə gaa laa laani, ə gaa yɛ ɲɔ̨n tii aa kɛ lamu mą. Jesus yɛ mą: «'Ə́ kaa bɔ ə́ ɓalo?»

7Ɲɔ̨n gɛmun tii yɛ mą: «Nwɔ́ mɛ̨nį nąmu, nu hvo ɲə́i hvo dóó ɲá! Ŋą́ kɛ lɔ bɔ ŋą yɛɛ yai, ya tumoɔ pulu, nu takpɛli ə tɛɛ dɔ́wɔ.»

8Jesus yɛ mą: «'Ə́ muhəɠə, ə́í laa haɠa kpinįn ə́ li.»

9Ɲąąɓa, ɉulɔnui tii kɔ́lɔi ə pono, ə naa haɠa kpinįn yɛ li. Ɲələ ə kɛ a hvįitɔɔ yələ 10Yili ɓə gɛ, Ɉuifəɠaa diɛ mą: «Háá ɓaa hvįįtɔɔ yələ, gu wɔ tɔ́n gaa mą nu hvo ə́ laa hɛn ɉəɠə yɛ́ hiɛ la.»

11Kɛlaa, ə di woo ŋąąpənə yɛ diɛ: «Nui ŋɛ̨i gɔ́lɔi pono, ya ɓə kɛ mąą: ‹'Ə́ laa haɠa həɠə, ə́ li.›»

12Di ɉulɔnui tii mąąni kɛ diɛ mą: «Gbɛɛ ɓə kɛ yɛ: ‹Ə laa haaɓa həɠə, ə́ li?›»

13Kɛlaa nui tii di ɓalo, hvo kɛ Jesus kɔ́lɔn, mąąhɔlɔɓo Jesus aa kɛ kulɔ nu kpului tii lɔwai.

14Nąąta wolo gɛɛ, Jesus ə gaa Yálá hee pɛlɛ́ mu, yɛ mą: «Yii kɛa ə́ kɔ́lɔi aa pono, hvó kɛa nɛ̨ŋɛ̨n ɉəɠə, əgɛ, mɛ̨nį nwąnąą ta hvo pa laa yɛ́, hvo tɛɛ yili ɓa.»

15Nui tii ə li ə nwoo hukulɔ Ɉuifəɠaa diɛ, yɛ diɛ: Jesus ɓə málo. 16Ə həɠə ɲələ ɓa, Ɉuifəɠaa di hvilɛn Jesus pulu, mąąhɔlɔɓo, aa nu ɓalo a vįitɔɔ yələ. 17Jesus yɛ diɛ: «Bələi lɔ Ną́n vaŋąlɔɔ la kólo ɓa, bələ lɔ ɓə váŋąlɔɔi la.»

18Nwooi tii mąą mɛ̨nį ɓa, Ɉuifəɠaa di kɛi Jesus paa pələ kwɛli. Mąąhɔlɔɓo, hvo lɛɛ lɔ a vįitɔɔ yələ mąą kala mɛ̨nį, kɛlaa, ə kɛi nwɔ̨nɔ̨ Yálá kɛ a Ną́n, ɛlɛɛ, yɛ kɛ, da Yálá di pɛliɛi.

Jesus gbɔwɔ kiliin

19Kɛlaa Jesus ə pənə ə mo diɛ yɛ diɛ: «A tɛ̨ą, tɛ̨ą kpɔkpɔɔ, gaa moi kaa: Lon va pɛli mɛ̨nį lɔpee ta kɛi bɔɔ ɓa, yii hvo nąn gaa li yɛ gɛ; mąąhɔlɔɓo, yii lɔpee Nąn a gɛ, Non yaa kpɛli mąn a ɲɔ̨nwɔ̨mąn gɛ lɔ. 20Mąąhɔlɔɓo, Nąn a Non nwɛlilakɛ. Yii Nąn a gɛ, a gəlee lɛ Non ma. Gaa nwɔ̨nɔ̨ pai kólo kpɛa-kpɛaɠaa lɛi Non ma, yii a ka kwəi pili kaa. 21Bələi lɔ Ną́n a haa nuą nwun na, yɛ yɛnɛ̨ɛ̨ tɛɛ di pɔ, bələ lɔ ɓə Non a yɛnɛ̨ɛ̨ tɛɛ la nwɛlikɛmąą nuą pɔ. 22Gbala ə tɔɔ, Ną́n va nu ta kiti tee, Ə gití təɛ kəlee mąąlaa tɛɛ Non bɔ. 23Yili ɓə a gɛ, nu kəlee diɛ Non mąąwiɛ, yɛ bələi da Nąn mąąwiɛ la. Nui hva Non mąąwiɛ, hva Nąn gbɛli mąn mąąwiɛ, yai Non dɔɔi.

24«A tɛ̨ą, a tɛ̨ą kpɔkpɔɔ gáá moi kaa: nui a nwəli tɔɔ nwóó ɓa, ɛlɛɛ, nui dɔ́ɔ́, yɛ laa na, a yɛnɛ̨ɛ̨i kpɛɛ hvo mą hɔlɔɓo. Kiti mɛ̨nį hvo mą, kɛlaa, aa kulɔ haa yəi, yɛnɛ̨ɛ̨i kpɛɛ hvo mą, aa ɉɔlɔɓo. 25A tɛ̨ą, a tɛ̨ą kpɔkpɔɔ gáá moi kaa: gaa pai kɛi a yələ ta, aa gbɛa mun həli, Yálá Lon nwoo a too hąąuą wəlii; yiiɠaa da mąn, da ɓalo. 26Mąąhɔlɔɓo, bələi lɔ yɛnɛ̨ɛ̨ kaa la Nąn ɉu, bələ lɔ ɓə Ə mąąlaa tɛɛ la Non bɔ. 27Ə kiti teɛ mąąlaa tɛɛ bɔ, mąąhɔlɔɓo, Nu Lon ni. 28Mɛ̨nįɠaa ŋɛ̨i hvo ka kwəi pili kaa, yələ ta kaa pai ɉəli, hąąuą kəlee kaa pai nwoo mąn ɉii. 29Nuąi túwɔ́ pələ lɛlɛ kulɔ da nwun, diɛ yɛnɛ̨ɛ̨ kpɔkpɔɔ hɔlɔɓo. Nuąi túwɔ́ pələ ɲɔ̨n gulɔ, da nwun di kiti tee mɛ̨nį ɓa. 30Vá pɛli mɛ̨nį ta kɛi gbɔ́ɔ́ ɓa, yii ŋį́ mąn Ną́n na, ya ɓə ŋą kiti tee la, ɛlɛɛ, nwɔ́ kiti haŋąąi. Mąąhɔlɔɓo, vá nííɓa kwɛli, kɛlaa nui dɔ́ɔ́ nííɓa ɓə ŋą gwɛli.

31«Akɛ ŋą kɛi gbɔ́ɔ́ mąą kɛla hvaa ɓo, yii ŋą mo hva kɛ a tɛ̨ą. 32Kɛlaa, nu takpɛli ɓə a kɛ mą́ą́ kɛla hvaa ɓoi, yii a mo mą́ą́ mɛ̨nį hu, gaa a tɛ̨ą. 33Kaa nuą tɔɔ Ɉaan Baptistə pɔɔli, yaan, aa tɛ̨ą ɓo kaa. 34Nwɛ́i, mą́ą́ kpaan və nu ta nwɔ kɛla hvaa ɓa, kɛlaa, gáá mɛ̨nįɠaai tii ɓoi kaa, əgɛ, ka nwun mąą ə ɓo. 35Ɉaan ə kɛ yɛ labon daa dɔɔ yɛ lən. Ka kɛ bɔ ka da hɔlɔɓo, ka ɲąąnɛ̨ɛ̨ gulɔ. 36Kɛlaa, nwɛ́i, nwɔ́ kɛla hvaai kɛnɛ̨i dɛɛ Ɉaan ɓa. Golóɠaai Ną́n ə dɔ́ɔ́ yɛ ŋį́ gɛ, yai gáá di kɛi, diɛ ɓə mą́ą́ tɛ̨ą ɓoi, diɛ Ną́n mə dɔ́ɔ́. 37Ną́n ŋɛ̨i dɔ́ɔ́, yaa kpinįi ɓə a mą́ą́ kɛla hvaa ɓo. Ka hvo ta nwoo mąn ni, ka hvo ta ɲɛ̨ilaa kaa li. 38Nwoo kili hva lɛɛ ka ŋą, mąąhɔlɔɓo, nui Ə dɔɔ, ka hvo mąą mɛ̨nį kaa li a tɛ̨ą. 39Ka kɛ Yálá nwɔ hɛɓɛ́i hupilii, ə ɓo ka kwəi kaa, ka káá pai yɛnɛ̨ɛ̨i kpɛɛ hvo mą hɔlɔɓoi a yili, yaan, ɉɛɓɛ́i tii ɓə mą́ą́ kɛla hvaa ɓoi. 40Kɛlaa, ə mą kɛ tii, ka hva gɛ, ka hvo pa bɔ́, ka hvo yɛnɛ̨ɛ̨i kpɛɛ hvo mą hɔlɔɓo.

41«Nwɛ́i vá ɲɛ̨́i pono mɛ̨nį kwɛli nu yəi. 42Kɛlaa, ŋą ka kɔ́lɔn, Yálá nwɔ wɛlikɛmąąlaa hvo ka yəi. 43Ŋą́ pa Ną́n Naa hu, ɛlɛɛ, ka hvo gɛ li ka hvo ka yee hee li mú. Nu takpɛli a pa gbɔwɔ laa hu, ka ka yee hee mu. 44Nuą di wɔ mąątɛ̨nɛ̨ ɓə ka gwɛli, ka hvo Yálá nwɛi pɔ. Ka pɛli ka laa pələ kɛ ləi ná? 45Hvo kɛ ka kwəi kaa, gáá pai ka kalamąɓoi Ną́n ma, nui pai ka kalamąɓoi ya ɓaa a Moisə, yai ka ka kilitɔɔ mą. 46Akɛ kɛ ka laa Moisə la, ka li lɔ laa ɲą́ą́ gbɛ́li na. Mąąhɔlɔɓo, mą́ą́ mɛ̨nį ɓə ə bɛ̨ɛ̨. 47Akɛ mɛ̨nįɠaa ŋɛ̨i Moisə ə bɛ̨ɛ̨ ka wala laa na, mɛ̨nįɠaai gáá moi kaa, ka pɛli laa pələ kɛi ləi na?»

Currently Selected:

Ɉaan 5: BKPG

Highlight

Copy