Rɔmnda 2

Yamɛi sandɛi Hala-e

1Éé nɔm vanacieo! Nɔm co yaman caanda kiolɔɔ-o, mɛ̀ɛ́-mɛ̀ɛ́ n va, a nɔ mɛɛ kɔɔsaa le, kani le dɛnɛ n co yamɛi caanda kiolɔɔ-o, nɔm bɛɛ co ndu tosaa, mɛɛ nɔm pila cii yaalan. 2N sina maa a toɲaa Hala kilu vanaa vaa lende yamɛi ni. 3Éé nɔm vanacieo! Nɔm co hoo yaman caanda kiolɔɔ-o, kɛ nduyɛ, nɔm pila bɛɛ co dɛnnda nda co tosaa lan tosaa, a co yiyanndo maa a hialunnin yamɛi Hala-e? 4Te kon te vɛ̀ɛ̀ a co vanakɛndɛyɛi bɛndui Hala-e, biuvɔn ndɔɔ a dɛnɛ kɛndɛ ndɔɔ yii luɛyɔɔ le? A co sínà le maa le mangalan nɔmndo Hala co kon kpow tosaa ni? 5Kɛ le tùú n co nila kalulan tosaa mà va kɛɔ dɛnnda lan bilaa biyɔɔ-o, kɔltuw bɛndu Hala-o hun toalnin nɔm coo o paale kɔltuwlen coo, paale yamɛi sandɛi Hala-e fulanin ceen-nden. 6O salanin vana-vana mɛɛ dɛnnda ndɔlan la co yɛ. 7O kenin vanaa co biuvɔnndo le dɛnɛ kɛndɔɔ tosaa-a yoomu fɛɛn-fɛɛndo, a co kindinndo le biiloo, bɛɛlen a si lɔ́ɔ́-lɔ́ɔ̀-o sɔlaa-a pɛɛn. 8Kɛ o tuisinin kɔltuw ndɔɔ a hiilɛi ndɔɛi vanaa sɛɛngiaa ndu, má kɛɛ toɲaa, má muungu bollen vowvo o dɛnɛ vɔɔndo nin-nda coo. 9Dɛnɛ palaa a ɲɛ kindilaa vanin le vana-vana co dɛnɛ vɔɔndo tosaa, kandɔɔ a Yuifia, kɔ bii a vanaa co N'Yuifi le-a. 10Kɛ nduyɛ, biiloo, bɛɛlen a kɔlɲuloo vanin le vana-vana co dɛnɛ kɛndɔɔ tosaa, kandɔɔ a Yuifia, kɔ bii a vanaa co N'Yuifi le-a. 11Kani Hala hiyan vannda le.

12Vanaa tosa hakio a siná tɔŋndo le-a kpow, nda sɔlanin yaalaa mɛɛ tɔŋndo dimi yɛ le. Kɛ vanaa síná tɔŋndo, kɛ má tosa hakio-a kialunnin iyama mɛɛ tɔŋndo dimi yɛ. 13O co le tɔŋndo tueyɔɔ le vana sɔla dío Hala o hɔl te, kɛ vanaa co tɔŋndo biyɔɔ-a, nda Hala kenin dio ni. 14Te vanaa sínà Hala le-a, a nɔ tɔŋ te-a tosa pɛ ɲɛ tɔŋndo dimi-o, mɛɛ tɔŋndo nda co le nda pila ni, hali mà nɔ tɔŋ te. 15Kon co cɔmndo ni maa dɛnɛ tɔŋndo co o sɛvaa nda o lakɔl, kɔlta ndalan la co lesei le ken. Yiyannda ndalan bɛɛ la co lesei, lan la yaala nda lɔ́ɔ́ lepum ni, mì la cɔm nda kɔɔsɔɔ. 16Ken fulanin ceen o paale Hala tosanin mì Yeesu Krista kelu dɛnnda viannannda vanndacieea yamɛi len, maa mɛɛ Yoongu kɛndɛ ya co dimio-o co yɛ.

Mɛɛ tɔŋndo dimi a Yuifia o kɔɔ yɛ

17Tofa-vɔ, nɔm pila co veelɔnndo aa Yuifnɔɔ, a tiindan tɔŋndo, a co lisanndo maa a sínà Hala, 18maa a sínà hɛnan ndɔɔ, maa a nɔlà dɛnnda hiow naŋɔɔ lan kɔlɔɔ solio, kani a pɛɛku tɔŋndo. 19A laalan maa vana co vanaa sumɛiya tindaa see-o n co ni, ɲɛ-tengaa le vanaa co o ɲumndan nin-nda, 20maa vana pɛɛkaa le vanaa kindu lakɔl te-a, a vana pɛɛkaa cuaambɔa, kani a pɛɛku tɔŋndo má síná toɲaa. 21Kɛ nɔm co caanda pɛɛkoo-o, vɛ nɔm pila pɛɛkun te? A co vannda yondallo maa vana yɔŋ levui le, vɛ mì nɔm pila va vuilen tosaa? 22A co dimio maa vana suunda le, vɛ mì nɔm pila va suundaa? Piɔmnda nɛinun nɔm, kɛ nduyɛ a co kɔlan ɲɛm co o máánndan nin-ndon ciimbuuo. 23A co kuundianndo maa a sínà tɔŋndo, kɛ a co Hala bɛ̀ɛ̀lan tɛɛmbuuo a tɔŋ n co tɛɛmbuuo-o. 24Maa mɛɛ o sɛvan yɛ aa: «Sɔɔn tanan dimin a diola Hala lan o kɔɔ vanaa súúla celen tɛɛn le niaa vanaa sínà Hala-a.»

25I co toɲa maa o naŋ mì vana dii toomaa, te vana kela pɛ o sɔɔn tɔŋndo dimi-on coo. Kɛ vana tɛɛmbuu pɛ tɔŋndo, mɛɛ tooma n dii-o siŋnun maa lekɔ̀ndé. 26Te kɔ̀ndénɔɔ kela pɛ mɛɛ tɔŋndo dimi yɛ, vɛ̀ɛ̀ a kɔ̀ndéle ndɔle len kpede, o co maa falenɔ le o co le? 27Hali mì vanndo dii tooma o falon nin te, kɛ te o co pɛ kelaa o sɔɔn tɔŋndo dimi-on coo, mɛɛ ndu yaalanin nɔm. Kani nɔm síná hoo tɔŋndo, má dii toomaa-o co sɔɔn tɔŋndo dimi-on biyɔɔ le. 28O co dɛnnda vana ca a lehɔltan te la tosa mì vana va Yuifinɔ le, o co vɛlɛ toomaa o diallon nin te cɔm ken te. 29Kɛ Yuifinɔ kpeekpeiyo, ndu co vana co dɛnndan tosaa a kɔl ndɔɔ-o ni. Tooma kɔllo co tooma kpeekpeiyo ni, o fula Kɔl Hala-o o ba-o, o co ɲɛ co o sɛvaa-o le. O co n'vanndaciee o ba le candɔɔla vana kon la fula le, kɛ Hala o ba.

Currently Selected:

Rɔmnda 2: BKG

Highlight

Copy