Rɔmnda 13

Le tuisinndo simlacia lelɛŋnda o labɛngunin

1Vana-vana bɛnda mò tuisin simlacia lebolla o labɛngunin, kani masale kɛ́-kɛ̀ co le, le kɛɛ fula Hala o ba len. Simlacia co-a, ndu kɛsi nda ni. 2Lelan vana simul pɛ masalen, mɛɛ tuu Hala-o o ciŋilan lende ni. Nduyɛ vanaa simul pɛ simlacia, mɛɛ nda pila yaalan. 3Vana tosa pɛ dɛnɛ kɛndɔɔ, siòòŋii ve nɔm a simlacia lelɛŋnda le, fɔ mà tosa dɛnɛ vɔɔndo. Vɛ̀ɛ̀ a yeema ma nɔ isiòòn a simlacia lelɛŋnda le? Mɛɛ tosa dɛnɛ kɛndɔɔ, o kon mà candu nɔm, 4kani baala Hala-o simlacia co tosaa ni, le dɛnɛ kɛndɛ nɔmndo. Kɛ taa tosa pɛ dɛnɛ vɔɔndo, mɛɛ yɔŋ siòònde, kani o co fondo le nda tuisi vana sangaa coo le, le baala Hala nda co tosaa-o ni, le maa ndɔɔ mingio a le kɔl ndɔ fulaa tuisio vanaa tosaa dɛnnda vɔɔnda coo. 5Lelan, o bɛnda mì vana tuisin simlacia o labɛngunin, o tasoo, le kɔltuw Hala-o kpakpalaa, kɛ handɔɔ o kon coo vɛlɛ, yɔŋii kɔlta naalan la yaala naa.

6Lelan koni niaa co muloo yɔngoo ni. Kani baala Hala vem simlacia co ndu biyɔɔ-a-o co kon ni. 7Lelan, la ke vana-vana ɲɛ o bɛnda le niaa sɔlaa o ba-o: la yɔngu vanaa niaa bɛnda le cuungiaalan yɔngoo-a cuungiaalan, mì la yɔngu vanaa niaa bɛnda le muloo yɔngoo-a muloo, mì la ke vanaa niaa bɛnda le bɛɛlen keo-va bɛɛlen, mì la biilu vanaa niaa bɛnda le biiloo-a.

O bɛnda mì kaolianndo va niaa tɛɛn

8Kuee vana-vana va niaa le, fɔ kaolianndo vellaa-velle. Kani vana kaola pɛ caanda, mɛɛ ndu peelu tɔŋndo. 9Kani tɔŋnda dimi lan aa: «Suunda le, dii vana le, yɔŋ levui le, fula ɲɛ pila lehɔl te» a tɔŋnda tɔ́lan kpow la co la liimaalan o sɔɛi he nin aa: «Kaola caanda maa nɔm pila.» 10Vana kaola caanda-o ndu tosal vana dɛnɛ vɔɔn te. Lelan, kaolaa co peelɔn tɔŋndo ni.

Bɛɛndianndo le hunɔɔ Krista-o

11La cua sɔɛi he bala tiɔn mì la sina maa telen naa n co hoo-o, telen niaa bɛnda le tiondɔɔ o lɔan-ndo tiiya, kani sunsun cindaa sɔɔnguu niaa macɛlu hiovɔɔ telen naa n laalan-ndo. 12Ɲumndan ma co cuvɔɔ, ɲɔɔ co le tengaa. Lelan n malnun dɛnnda maɲumndan, mì n cuannun volɔɔla cɔwla ɲɛ-tengaalan. 13N kelan kela sandaa, maa kela ipala déŋ. N vannun vanaa lepulua hiw dioo a kolɔɔ-a le. N vannun vanaa yiyannda vɔɔn, te kon te vanaa laasi-laasi le. N kpakpalan sɛɛngianndan a paŋalianndan. 14Kɛ n vownun Maalii Yeesu Krista maa doma. N malnun falon o ba le yeemɛi ndɔɛi vɔɔnde tosaa le.

Currently Selected:

Rɔmnda 13: BKG

Highlight

Copy