Rɔmnda 10
10
1Puapilɛa nia, yeemɛi co ya o kɔl-le, o ya co Hala piɛi le Israɛlla-o co ni, mà sɔla cindaa. 2Kani i co seile ndalen timbi, maa a fula diallon le dɛnɛ Hala-o, kɛ a nɔ kɔlkalu o dialun fulan mun nin te. 3Kani a siná dɛnɛ sandaa Hala-o le, mí nda pila a va kindinndo le dɛnɛ sandaa ndaa cɔmndo, a cɛl dɛnɛ sandaa Hala-o le. 4Nduyɛ mɛɛlula tɔŋndo la co Krista ni, haliko mi vanaa laalannda kpow a siŋnun vanaa sandaa.
Le vanaa laalan Mɛlɛka-a cindaa co ni
5Mí Moise sɛva le dɛnɛ sandaa vana sɔla o tɔŋndo biyɔɔ nin-ndo aa: «Vana bii pɛ sɔɔn tɔŋndon mò kela lecoo, ndu sɔlanin cindaa.» 6Kɛ sandii fula o laalanndo nin-nde ndi dimi aa: «Dimin o kɔl nin te aa: ‹Nɛ̀ɛ́ hel-lɛnin o halataala?› Le kɔlan Krista tuisio lɛŋ nanu co kon ni.» 7Dimi vɛlɛ le aa: «Nɛ̀ɛ́ toal-lɛnin o soon nɔ lamɛɛlu loo nin?» Le Krista heeloo fulaa vanvílɛ́iya tɛɛn co kon ni. 8Yɛɛ sandii ken dimi yɛ niko? Aa: «Sɔɛi co nɔm ikɛi, nɔm o sondo a nɔm o kɔl.» Nduyɛ, sɔɛi laalaŋii ken naa n co vannda tiiyallo ni aa: 9«Taa sɔlɔlan pɛ a sondo nɔmndo maa Yeesu co Maalii ni, ma laalan o kɔl nɔmndo nin maa Hala tindi ndu fulaa vanvílɛ́iya tɛɛn, a sɔlanin cindaa.» 10Kani vana laalan pɛ a kɔllo, a sɔla dɛnɛ sandaa. Vana sɔlalan pɛ a sondo, a sɔla cindaa. 11Sɛbɛ Hala-o dimi aa: «Vana-vana laalan ndu pɛ, siɛmbula biinin ndu le.» 12Lelan, hiyan co Yuifia a vanaa co N'Yuifi le-a tɛɛn te. Bau nda kpede, Mɛlɛka pilɔɔ nda nɔ ni, o co vanaa co ndu veeloo-a ɲɛm ndɔn keo-vo. 13Kani o dimin aa: «Vana-vana veelu pɛ diola Mɛlɛka lan o piɛilen nin, ndu sɔlanin cindaa.»
14Kɛ vɛ̀ɛ̀ nda veelu yɛnin vana nda laalan too? Vɛ̀ɛ̀ nda laalan yɛnin vana nda tui tɔ́ɔ́ loo? Nduyɛ vɛ̀ɛ̀ nda tuɛi yɛnin ndu tɔ́ɔ́, te o co mì vana yondal nda sɔɛi ndɔɛi le? 15Nduyɛ vɛɛ nɛ nda yonda yɛnin, te vana vim nda le? Maa mɛɛ o sɛvan yɛ aa:
«O naŋ bɔɔ le vanaa kan cɔu hunɔɔ,
vanaa co yoongula kɛndɛlan yondaa-a.»
16Kɛ o co vannda kpow le a cɛl Yoongu kɛndɔɔ le. Mí Esai dimi ndi aa: «Mɛlɛka, nɛ̀ɛ́ laalan yɛ sɔɛi naa n co yondaa-e?» 17Lelan, o tueyɔɔ nin laalanndo fula ni, ɲɛ vana tuɛi yɛ kon-ndo, o sɔɛi Krista-e nin o fula ni.
18Kɛ i co ɲuna: Mò va maa Israɛlla tui sɔɛi ken te? A tuei ndi tɛ́ɛ́.
«Kani diom ndaa kɔɛ, mó tiw o lɛŋnden kpow coo,
mí sɔɔn ndan tiiya o ceendo mɛɛlulan di.»
19I co vɛlɛ ɲuna: Mò va maa Israɛlla bii ndi bila le? Moise dimi ndi o tasendɔ aa:
«I co niaa paŋalaa luei o kɔl a vanaa co vanaa-mangalaa-isɔɔ kpeekpei le-a,
mì tosa, mì la tuulu kɔl a vanaa-mangalaa-isɔɔa kindu kɔl te-a.»
20Mì Esai ndu tɔɔndan bɛɛ mò dimi le aa:
«Vanaa ve ya nuwviaa le-a,
nda saalun ya ni,
mí cɔmnun vanaa ɲuna ya ɲɛ-ɲɛ le-a.»
21Kɛ a Israɛl o kɔɔ, mó dimi aa:
«Niinoo kpɛŋ, i va vanaa tui haa isɔɔ le-a a vanaa sɛɛngiaa kan balan siɛndullo.»
Currently Selected:
Rɔmnda 10: BKG
Highlight
Share
Copy
Want to have your highlights saved across all your devices? Sign up or sign in
© Alliance Biblique en Guinée
