Matie 7

La kialu yamɛi caanda le

(Luke 6.37-38,41-42)

1«La kialu yamɛi vana le, haliko vana kialu yamɛi niaa le. 2Kani yamɛi niaa co caanda kilullo-e kilulunnin niaa ni. A ɲɛ niaa co tuuvo nda tuunin niaa ni. 3Le yɛɛ n co yɛ bilte co puapilɛ nɔmndo o hɔl-ten tofaa, a dow yɔm ipɛngɛ co nɔm pila o lehɔl-lo taasi le? 4Te kon te, vɛ̀ɛ́ n dimul-lɛnin puapilɛ nɔmndo aa: ‹Mɛi-yɔ i soli nɔm bilte co nɔm o hɔl-ten›, te yɔm ipɛngɔɔ co pɛ nɔm pila o lehɔl? 5Nɔm vana muuluanndo ho, nɔm pila solin fɔlɔn yɔm ipɛngɔɔ o lehɔl, o kon a ce niko válán le puapilɛ nɔmndo bilten solio o lehɔl.

6La ke tunnda ɲɛm diandan#7.6 ɲɛm diandan: Nanu, vana nɔla mì vana dimi aa «ɲɛm co le Hala-on», «ɲɛm co teengen le baala Hala-o-on». te, yɔŋii nda mulin ma kisikisi niaa. La vuulu pewva ɲɛm niaan báà kalan te, yɔŋii nda nɛw mun.»

Le piɛilen biuvɔnndo

(Luke 11.9-13)

7«La piɛi, a kenin niaa. La nuwviaa, la saalunnin. La lɔɔ dioo, a kumbilnin niaa. 8Kani vana-vana piɛi pɛ, ndu sɔla. Vana nuwviaa pɛ, ndu saalun. Nduyɛ vana lɔaa dioo-o nda kumbil ni. 9O niaa tɛɛn, ɔ́ɔ̀ vana po ndɔɔ piɛi buloo mò ke ndu powvo-o? 10Nɛɛ po ndɔɔ piɛì yɛ suwvo, mò ke ndu kɛwvo? 11Niaa vanaa vɔɔnda ha, te niaa sinà pɛ le cuavaa niaa ɲɛm kɛndɔn keo, vɛ̀ɛ̀ Fuɲa niaa co o halataala-o ndu kɛɛ yɛnin le vanaa ɲunanin ndu-a ɲɛm kɛndɔn keo?

12Ɲɛ-ɲɛ niaa yeema pɛ mì caanda tosal niaa, mɛɛ niaa bɛɛ la tosal nda lende, kani lende tɔŋndo a vanaa-tɛɛngaa-diom Hala-a dimi ni.»

Nɛilan tan tiɔn

(Luke 13.24)

13«La luɛi o dio sɔɔkɛɲɛɛo! Kani dio tongu taw-vo, nɛi kela kindu coo loo, ndu yaa vana o ɲánndávàà ni. Nduyɛ, vanaa bɔɔ-bɔɔ a co luɛyɔɔ o dio kon. 14Kɛ dio sɔɔkɛɲɛɛo, nɛile piondonnde kɔlan la kendu coo len, ɲɛm mun yaa vana o cinda fɛɛn-fɛɛndo nin ni. Vanaa saalun lan-nda co sɛ́lɛ́ le.»

Le vanaa-tɛɛngaa-diom Hala-a lacòòvaa

(Luke 6.43-44)

15«La mandan a vanaa-tɛɛngaa-diom Hala-a lacòòvaa. A co hunɔɔ o niaa lo maa n'saa, kɛ lenin ndaa tunaa yondoa vɔɔn-vɔɔnda nda co ni. 16O komɔɔ ndaa niaa sinanin nda ni. Vɛ̀ɛ̀ vana kiandu pá rɛsɛnndon o yɔm n'yɔɔ, te kon te vooson o siɛmbullo? 17Yɔm oo yɔm co yɔm kɛndɔɔ, kulun kɛndɔn o koam ni. Kɛ yɔm co a naa-o, kulun vɔɔnndon ndu koam ni. 18Yɔm kɛndɔɔ kum kulun vɔɔnndon te, yɔm co a naa-o bɛɛ kum kulun kɛndɔn te. 19Yɔm oo yɔm kum kulun kɛndɛ le, a kelu ndu, a viow ndu o yin. 20Lelan o komɔɔ ndaa niaa sinanin vanaa-tɛɛngaa-diom Hala-a locoovaa ni.»

Kaandeŋaa kpeekpeiya

(Luke 13.25-27)

21«O co vanaa co ya veeloo aa: ‹Maalii, Maalii›-a kpede le a luɛinin o masale halataala len nin te, kɛ vanaa co hɛnan Fuɲa ni co o halataala-o tosaa-a daama a luɛinin ni. 22Vanaa bɔɔ-bɔɔ a dimulnin ya paale len aa: ‹Maalii, vɛ̀ɛ̀ o co o diola nɔmndan te naa n tɛɛngul vannda sɔɔn Hala-on te? Vɛ̀ɛ̀ o co o diola nɔmndan te naa n tow ɲinaa vɔɔnda, mí n tosa dɛnnda kaamaalan taw le?›» 23O kon, i dimulnin nda aa: «Lepilɛ bɛɛ i sina niaa le. La faŋan ya, niaa vanaa tosaa dɛnnda vɔɔnda ha!»

Cɛila tiɔnndan

(Luke 6.47-49)

24«Lelan, vana-vana tuei pɛ sɔɔn nun mun, mò kela lecoo, ndu vanin maa vana taasi tangul cɛi ndɔɔ o pow bandíláà coo-o. 25Mí piɔɔ sia, mí mɛnndan ma hun, mí hoeiye hɔŋ, mí i lɔaa cɛi kalaa, kɛ o komba le. Kani o pow bandíláà coo ndóò kilan ni. 26Kɛ vana tuei pɛ sɔɔn nun mun, mò kela lecoo le, ndu vialnin vana pe lebol too, o tangul cɛi ndɔɔ o siòòndon coo-o. 27Mɛɛ piɔɔ sia, mí mɛnndan ma hun, mí hoeiye hɔŋ, mí i lɔaa cɛi kalaa, mó komba, mó tambu tambei pila.»

Kpaaya Yeesu-o

28Yeesu ciiyo sɔɔn mun dimio, mí sɛ́lɛ́ bɛndu o dimi mun o hɔl-lo dɔawnun kɔndɔfili a pɛɛku ndɔɔ. 29Kani kpaaya bɛndoo pila va o pɛɛku ndɔɔ nin ni, o ve maa pɛɛkula vanaa ndaa pɛɛkaa latɔŋnda le.

Currently Selected:

Matie 7: BKG

Highlight

Copy